Luk. 19 - BUKO SIPUNENAN

Si Sakeus

¹ Kele aisege Jesus ka Jeriko, puenungnangan ka laggai.

² Ai sedda sara sirimanua utera sipuuku cukai simakayo sipuoni si Sakeus.

³ Besiakenangan masiitco kasei Jesus nenda, tapoi ta momoi igit sirimanua, matete poi tubunia.

⁴ Pabalaunangan ka mata, karainangan sileu masiitco Jesus, sedda poi itusasabau.

⁵ Kele aisege Jesus ka kudduat nenda, teilanangan ka pata, kuanangan kai Sakeus, “Sakeus, olaake tugorosot, mugogoi poi aku kineneiget ka lalepnu!”

⁶ Olaakenangan tugorosot si Sakeus, alanangan Jesus ka angkat baga.

⁷ Sangamberi sipasiitco pagalaiat nene mungungu, kuarangan, “Ameian nia mugogoi ka lalep sirimanua sijo.”

⁸ Purionangan si Sakeus, kuanangan ka matat Tuhan, “Iretalaga pukayoatku kupanguruatnake ka simageba, samba ke ai kupataju sirimanua, silikungan minca epat ngaoleat.”

⁹ Kuanangan ka matania Jesus, “Gogoi nene abarangan puuktungan ka lalep nene, aipoi punuteteu Abraham leu nia.

¹⁰ Aipoi aioi Togatsirimanua ia te masigaba samba masiarauake sirimanua.”

Pasikat pagalaiat bulagat mas

¹¹ Ai pei le raarep ipanibo Jesus, tuppaiakenangan itiboi sara pasikat, aipoi amalegerengan nia ka Jerusalem, samba rapaatu poi ka bagada sirimanua marurueian le imatoila Purimataat Taikamanua.

¹² Kuanangan ka matada Jesus, “Ai sara sirimanua muntogat rimata, sieei ka sara laggai ka sareunan rarioake nia rimata sedda, lepa toili nia.

¹³ Sogainangan sapaguguletnia sipulu, kaunangan ka sia bulagat mas patsara sia; kuanangan ka matada, ‘Pasakiake kam bulagat nene teret kubara.’

¹⁴ Tapoi malaga le bagada taikaumania ka tubunia. Kuruk teiteinia koiniakerangan pakoiniet masikua, ‘Ta koba kai nia ibailiu nia rimatamai.’

¹⁵ Kele aitoili lepa ararioake nia rimata, sogainangan sapaguguletnia pasikaunannia bulagat, bule iagai piga uktukda senenda ka pasakiatda.

¹⁶ Ia geti oi pagugulet siboiki kuanangan, ‘Tuan, sisangamas siakenu nenda aian pulu mas aiala uktuknia.’

¹⁷ Kuanangan tuannia, ‘Bulat maeru sigalainu, pagugulet simatopit! Kalulut matopit ekeu ka puukuket sigoiso, oto kuake kekeu pulu laggai kupkumennu.’

¹⁸ Oi pagugulet sikarua kuanangan, ‘Tuan, sisangamas siakenu nenda aian lima mas aiala uktuknia.’

¹⁹ Kuanangan ka matania, ‘Kekeu lima laggai kupkumennu.’

²⁰ Oi pagugulet sikatelu kuanangan, ‘Tuan, koi ne masnu akutabutnake ka komang.

²¹ Maloto poi aku ka tubum, simagege le poi ekeu; nuala le ta bakkatnu, samba numonei le buat taikakaramakenennu.’

²² Kuanangan ka matania, ‘Ekeu pagugulet sikatai! Kuukum ekeu siripot tiboiet sibebela ka ngungum. Anuagaian sirimanua simagege le aku, siala ta bakkatku samba simonei ta buat siurepku.

²³ Oto ta kodda anukau bulagatku nenda ka pasibaleat bulagat, ke tebai toili aku silokungan bulagatku nenda samba uktuknia.’

²⁴ Ia geti kuanangan rimata ka matada sipuririo sedda, ‘Ala kam mas sisara nenda ka tubunia, kau kam ka pagugulet sibara pulu mas.’

²⁵ Kuarangan ka matania, ‘Aian ka sia pulu mas.’

²⁶ Aleginangan nia, ‘Kukua nia ka matamui: Ka sibabara tukakau pei le ka tubunia, ka si ta anai geti tuaala pei le sibabara ka tubunia.

²⁷ Oto sangamberi saggakku sitaioba masipurimata aku ambit kam sia sene, mateiake kam sia ka mataku!’ ”

Katugurukat Jesus ka Jerusalem

²⁸ Lepa aikua nene Jesus, puboikinangan iei manatara ka Jerusalem.

²⁹ Kele aisege ka legeret Betpage samba Betania ka leleu Tula, koiniakenangan rua sipasiuluinia, kuanangan,

³⁰ “Kenan kam ka laggai ipot matamui; guru kam sedda, sesemuian sara togat kalidei ai kasesereat, beri pei rauddeni teiteinia. Rugut kam, ambit kam nia sene.

³¹ Ke ai sinounou kam, ‘Nururugut kodda kam kalidei?’ Kuamuian, ‘Ai kauna nia si Tuhan.’ ”

³² Lepa ei sia sikoiniakenen, seserangan kele sikuat Jesus ka matada.

³³ Airarurugut togat kalidei, kuarangan sibakkat kalidei, “Nururugut kodda kam kalidei nenda?”

³⁴ Alegirangan nia, “Ai kauna nia si Tuhan.”

³⁵ Ambitrangan nia ka matat Jesus. Apoakerangan leppeira ka teitei kalidei, uddetnakerangan Jesus ka uddutnia.

³⁶ Aimueenung Jesus, apoakerangan leppeira sirimanua ka enungan.

³⁷ Kele aimalegere ka Jerusalem ipot enungan gogorosonan ka leleu Tula, taddaakerangan sipasiului simigi mugerei masiumun Taikamanua kalulut sangamberi kerek siitcora.

³⁸ Kuarangan, “Kau imatulu tubunia Rimata siooi ka onin Tuhan! Aban ka sorga, samba pulatsanan ka Taikamanua!”

³⁹ Ia geti ai piga pa tai Parise ka talagada simigi masikua ka matat Jesus, “Guru, ase sia sipasiuluinu rapumengmeng.”

⁴⁰ Aleginangan nia Jesus, “Kukua nia ka matamui: Ke mumengmeng bai tainene, bukku nene mugegerei.”

Isoibi Jerusalem Jesus

⁴¹ Kele aimalegere Jesus, itco aiitco laggai, soibinangan nia,

⁴² kuanangan, “Ke leu pa nuseseake gogoi nene, sibaraake paabanan kekeu! Tapoi kineneiget malipput le nia ka matam.

⁴³ Babara poi gogoinia geti, galairangan saggaknu polak kekere situbokko, lepa goilikrangan ekeu, raoilot ekeu situbokko.

⁴⁴ Subuakerangan ekeu samba tatogam sikudduji ekeu, samba beri sara bukku sipalalakke taimararagat, kalulut ta nuagai gogoi katubalogatnu.”

Ipalina Uman Taikamanua Jesus

⁴⁵ Kele aituguru Jesus ka Uman Taikamanua, kekelenangan sipasasaki ka bagania.

⁴⁶ Kuanangan ka matada, “Atusuratnakean ka Surat Sipunenan, ‘Uma panindogat le umangku.’ Tapoi anukau le kam nia ngaliura sipasiraraurau!”

⁴⁷ Senen gogoi le ipungantoman Jesus ka Uman Taikamanua. Tai imam sabeu geti samba siagaisurat samba tai bajara tai Jahudi ai le ragegelai masimateiake Jesus,

⁴⁸ tapoi ta raagai kipa galaiakenenda, aipoi sirimanua simigi raoba le masiarep tiboietnia samba maottot sia ka tubunia.