Luk. 18 - BUKO SIPUNENAN

Pasikat sinanalep silumang samba sipasiukum

¹ Ia geti tiboinangan Jesus sara pasikat ka matada masikolouake buita imariuriu rapanindou, bui raoreake nia.

² Kuanangan, “Ai ka sara laggai sara sipasiukum taimaloto ka Taikamanua samba taimaletsei ka sirimanua.

³ Ka laggai nenda ai leu sara sinanalep silumang simareirei moi masitaget nia masikua, ‘Sineseatnake aku ka matat pajoggoloakenenku.’

⁴ Piga pa ujunia ta aipuletsei nia. Lepa kuanangan ka paatuatnia, ‘Kenanen ta kukalotoake Taikamanua samba ta kupuletsei beri sara sirimanua,

⁵ kusisineseatnakean le sinanalep nene, amagejangan bagaku, bui ioi buruburu geti irabak aku.’ ”

⁶ Kuanangan si Tuhan, “Paatu pei kam apa sikuat sipasiukum sikatai.

⁷ Iangan pa Taikamanua, ta pa isisineseatnake sia sipilinia, sipusosoga ka matania sinago samba sinoibo, iooreake pa iromake sia?

⁸ Kukua nia ka matamui: Maruei le isineseatnake sia. Tapoi ke moi geti Togatsirimanua, isesese leu pa tonem baga ka polak nene?”

Pasikat sara tai Parise samba sipuuku cukai

⁹ Itiboi leu Jesus sara pasikat ka matada siumunake tubuna sia le simaroipo, sabagei rapaloloi.

¹⁰ Kuanangan, “Ai rua sirimanua sieei manindou ka Uman Taikamanua, sara tai Parise, sara sipuuku cukai.

¹¹ Purionangan si Parisena manindou ka paatuatnia kise, ‘Kukua sura ka matam Taikamanua, ta poi pakere aku ka sirimanua sabagei, sipasiraraurau, simapajoat, sipaeelet, ele kele sipuuku cukai nene.

¹² Rua ngaminca kupupuaso ka bagat sangamenggui, samba saparpulu ka sangamberi bibiletku kupanguruatnake.’

¹³ Sipuuku cukai geti ai le nia muririo ka sareunan, beri masiteila manua ta maro bagania, tapoi ibobo le rurukatnia kuanangan, ‘Taikamanua kau imakate bagam kaku sijo nene!’

¹⁴ Kukua nia ka matamui: Sipuuku cukai le aiparoipo Taikamanua aitoili ka lalepnia, ta si Parisena. Aipoi siabeuake tubuna tupagogoiso le nia, samba sipagoiso tubuna tuaabeuake le nia.”

Isukatnake tatoga Tuhan Jesus

¹⁵ Ia geti oi sipasiaambit tatogada sigoiso ka matat Jesus bule irape sia. Kele araitco nia sipasiuluinia golurangan sia.

¹⁶ Sogainangan sia Jesus kuanangan, “Obaake kam tatoga raoi kaku, ba kekera kam sia; sirimanua kele nene le poi sibakkati Purimataat Taikamanua.

¹⁷ Kukua nia ka matamui: Kasei pa ke ta kele tatoga ipasiala Purimataat Taikamanua, ta tuguguru nia ka bagania.”

Sirimanua simakayo mabesi tuguru ka Purimataat Taikamanua

¹⁸ Ai sara utera tai Jahudi masinounou Jesus kuanangan, “Guru simatopit, kipa kugagalai bule kuikepmake purimanuaiat sitaitatata?”

¹⁹ Kuanangan ka matania Jesus, “Nukukua kodda aku simatopit? Ta anai kasei pa simatopit, sarat Taikamanua le.

²⁰ Surukat Taikamanua anuagaian: Bui nupaelet, bui nupamatei, bui nupanangkou, bui nupaboko, suru ukkuinu samba inam.”

²¹ Kuanangan simakayo, “Sangamberinia nene akugalaiakean ka pusulekatku pei le.”

²² Kele aiarep nia Jesus, kuanangan ka matania, “Ai pei sara galaiakenennu: sakiake sangamberi sibabara ka tubum, parubeinungan bulagatnia ka simageba, baranangan pukayoatnu ka sorga; lepa oi ekeu masitut aku.”

²³ Kele aiarep tiboiet nene simakayo, mareureunangan bagania, simakope kayo le poi nia.

²⁴ Kinerenangan nia Jesus kuanangan, “Bulat mabesi ka simakayo tuguru ka Purimataat Taikamanua.

²⁵ Onta pei le malabbei tubuluk ka matat susuilak ka simakayo tuguru ka Purimataat Taikamanua.”

²⁶ Kuarangan sipasiaarep, “Kisedda bai nia, kaseian le masisesese puaragat?”

²⁷ Aleginangan nia Jesus, “Sitaioi ka sirimanua, momoi ka Taikamanua.”

²⁸ Kuanangan si Petrus, “Sangamberinia le akukaddiuake kai, kutut kai ekeu.”

²⁹ Kuanangan ka matada Jesus, “Kukua nia ka matamui, senen sikaddiuake lalepnia, sinanalepnia ele sarainania, eppunia ele tatogania kalulut Purimataat Taikamanua,

³⁰ isisilo piga ngaoleat pa silinia ka tetere kineneiget pei le samba ka gogoi sialu ikepmakerangan purimanuaiat sitaitatata.”

Pangasegekat Jesus sikatelunia pagalaiat kamateiat samba katusuruatnia

³¹ Ia geti sogainangan sipasiuluinia sipulurua Jesus, kuanangan ka matada, “Aian tebai sita mananatara ka Jerusalem, muaailingan te sangamberi sinuratda tai nabi pagalaiat Togatsirimanua.

³² Rasegeake nia ka sipuarat sabulungan, asarangan nia, paloloirangan nia samba raluji nia,

³³ rabobo nia samba ramateiake nia; tapoi ka gogoi sikatelunia, suru nia minca.”

³⁴ Tapoi beri goiso ta makolou ka bagada sipasiului, malipput le katukolobat tiboiet nene, ta raagai apa sikuania.

Ialeake simapeset ka legeret Jeriko Jesus

³⁵ Malelegerengan le isege Jesus ka Jeriko, ai sara simapeset mukuddu ka bebet enungan manindou panguruat.

³⁶ Kele aiarep maigi sirimanua situsasabau, nounounangan, “Aponia sibabara?”

³⁷ Kuarangan ka matania, “Aitusasabau Jesus tai Natsaret.”

³⁸ Pusoganangan leu et, “Jesus, Togat David, kau imakate bagam kaku!”

³⁹ Aserangan nia sia sipueenung ka mata ipumengmeng; tapoi memei le iaabeuake ngangania musoga, “Togat David, kau imakate bagam kaku!”

⁴⁰ Ia geti tokko Jesus, kuanangan rataroake nia ka matania. Kele aisege, nounounangan nia Jesus,

⁴¹ “Aponia noba kugalai ka tubum?” Aleginangan nia, “Bule imaitco mataku, Tuhan!”

⁴² Kuanangan ka matania Jesus, “Kauan imaitco matam. Aialeakean ekeu tonem bagam.”

⁴³ Maitconangan leu matania, aitutut Jesus, aiuumunake Taikamanua. Itco araitco nene sirimanua simigi, umunakerangan leu Taikamanua.