Luk. 16 - BUKO SIPUNENAN

Pasikat pagalaiat bendahara sitaimaroipo

¹ Kuanangan Jesus ka matada sipasiuluinia, “Ai sara sirimanua simakayo sibara bendahara. Oto aranganduake ka matania aipalimai bibiletnia si bendahara.

² Lepa sogainangan bendahara nenda kuanangan ka matania, ‘Kipa ne siarepku galai tubum? Ake kineneiget pasiaddeatnu ka pubebendaharam, aipoi barania kineneiget taan mubebendahara ekeu.’

³ Paatunangan ka bagania si bendahara, ‘Kipa pa kugagalai, aipoi aiariakean aku tuanku mubendahara. Mamangkuru ta maron aku, masibiddeu maila aku.

⁴ Akuagaian apa galaiakenenku, bule ke atuariakean aku mubendahara, ai sipasiaala aku ka lalepda.’

⁵ Lepa sogainangan pasasara sangamberi sipuutak kai tuannia. Kuanangan ka siboiki, ‘Piga nuntu utaknu kai tuanku?’

⁶ Aleginangan nia, ‘Sangotu ngatappaiat tula.’ Kuanangan ka matania si bendahara, ‘Koi surat utaknu; uddetnake ekeu, olaake nusuratnake: Lima pulu.’

⁷ Lepa kuanangan ka sikaruania, ‘Kekeu piga nuntu utaknu?’ Aleginangan nia, ‘Sangotu ngagoni bera.’ Kuanangan ka matania, ‘Koi surat utaknu; suratnake: Balu pulu.’

⁸ Ia geti umunakenangan bendahara sitaimaroipo si tuan, kalulut sikut paatuatnia igalai nene. Aipoi tatogat taikapolak pei le makasiku paatuat paalei pasasambada, bele pei tatogat pato.

⁹ Kukua nia ka matamui: Pasuruakngake kam pukayoat polak nene, bule ke taan anai, alarangan kam ka kudduat sitaitatata.

¹⁰ Simatopit ka puukuket sigoiso, matopit leu te nia ka puukuket sabeu. Simapajoat ka puukuket sigoiso, mapajoat leu te nia ka puukuket sabeu.

¹¹ Oto ke ta matopit kam ka pukayoat polak nene, kasei te matotonem baga masiake ka kam pukayoat sibara ka sorga?

¹² Samba ke ta matopit kam ka bakkatda sabagei, kasei te masiaake ka kam bakkatmui?

¹³ Ta momoi ipuuku rua tuan sara pagugulet. Ta isosoppi ipulagaki baga sisara, ipununtuki baga si sara; ele marere nia ka sisara, maasa bagania ka sisara. Ta momoi nupuuku kam Taikamanua samba pukayoat.”

Surukat samba Purimataat Taikamanua

¹⁴ Kele araarep sangamberinia nene tai Parise simaereu bulagat, asarangan Jesus.

¹⁵ Kuanangan ka matada Jesus, “Ka matat sirimanua nuparoipo kam tubumui, tapoi iagai le paatuatmui Taikamanua. Aipoi apa abeuakenen sirimanua, kasitsitnakenen Taikamanua le.

¹⁶ Surukat Mose samba suratda tai nabi teret ka teteret Johannes Sipasirarau le. Barania ka teteret nenda Purimataat Taikamanuangan le tupaarep, samba sangamberi sirimanua masibesiake tuguru ka bagania.

¹⁷ Tapoi makalabbei pei le itata manua samba polak, tapoi sara takat surat ka Surukat ta malabbei itupakatai.

¹⁸ Senen sigalak sinanalepnia masipusinanalepmake sinanalep bagei, sipaeelet le nia; samba sipusinanalepmake sinanalep sigalak, sipaeelet leu nia.”

Sirimanua simakayo samba si Latsarus simageba

¹⁹ “Ai sara sirimanua simakayo, sileppeiake komang simabonan simalainge samba juto simaalit baga, ipuangkaki le bagania murimanua senen gogoi simalilimai kan le nia.

²⁰ Tapoi ai leu sara sirimanua simageba sipuoni si Latsarus, sipukukuddu ka bebet matatbaliu simakayo, salu le ka tubunia lubbe.

²¹ Ai le ikikiddi bagania mukom porat kan sibebele ka tei mejat simakayo; oi pei jojo masibolot lubbenia.

²² Ia geti matei imatei simageba, ambitrangan nia samalaika masikau nia ka kupkup Abraham.

²³ Matei leu et ka sia simakayo, rateiakerangan nia. Ai nia ka narako masiorik besi, teilaakenangan matania, itconangan si Abraham ka sareunan, ai si Latsarus ka kupkupnia.

²⁴ Pusoganangan, ‘Ukkui Abraham! Kau imakate bagam kaku. Koiniake pei si Latsarus iteptepmake buttet singongainia ka oinan masileppeni lilaku, bulat amabesian tubuku masiorik ka juluu api nene.’

²⁵ Kuana le si Abraham, ‘Repdep le sirou: ka teteret purimanuaiatnu anusiloan simaeru, kai Latsarus geti sikatai le. Kineneiget tupususuibingan le nia, ekeu geti masiorikngan le.

²⁶ Paobanangan ai ka oggakta guluggu simakeru, bui ioi sibara ka kai raei ka kam, samba sibara ka kam raoi ka kai.’

²⁷ Kuanangan simakayo, ‘Oto kutiddou kekeu ukkui, nukoiniake si Latsarus ka lalep ukkuiku.

²⁸ Ai pei le poi lima sasarainangku, bule ipangantoman sia, bui raoi ka kudduat paoreat nene.’

²⁹ Kuanangan si Abraham, ‘Aian ka tubuda surat Mose samba tai nabi, ia te aremenda.’

³⁰ Tapoi kuanangan simakayo, ‘Taa ukkui Abraham, ke bara sara sitususuru ka simamatei masiailiake sia, ta isosoppi rabauake paatuatda.’

³¹ Kuanangan ka matania si Abraham, ‘Ke ta rareddet tiboiet Mose samba tai nabi, ia leu et taimatonem bagada, kenanen bara sara sitususuru simamatei.’ ”