Luk. 15 - BUKO SIPUNENAN

Pasikat pagalaiat biribiri simalilimai

¹ Ka sara gogoi, maigi sipuuku cukai samba sijo masitagetnake Jesus.

² Pungungukirangan nia tai Parise samba siagaisurat, kuarangan, “Iala le sirimanua sijo sinene samba ipakomake sia!”

³ Lepa kuanangan Jesus ka matada pasikat nene,

⁴ “Ai bai sara ka talagamui sibara sangotu biribiri, ke malimai sara, ta pa ikakaddiuake sisiba pulu siba ka simatangeu mei masigaba simalilimai teret isese nia?

⁵ Sese aisese nia akkatnakenangan nia ka bokunia angkat bagania;

⁶ samba kele aisege ka lalep, sogainangan sasuruaknia samba pabebeakenennia lalep, kuanangan ka matada, ‘Kau imaangka bagata sambata akusesengan poi biribiriku simalilimai nenda.’

⁷ Kukua nia ka matamui: Kisedda leu te angkat bagada sikuddu ka sorga kalulut sara sijo sibauake paatuatnia, bele pei ka sisiba pulu siba simaroipo baga, ta besiakenen rabauake paatuatda.”

Bulagat simalilimai

⁸ “Ele ai bai sara sinanalep sibara bulagat pulu ropia, ke malimai sara, ta pa itutunam alito, sabuinangan lalep, gabanangan nia sipulelelek teret isese nia?

⁹ Kele aisese nia, sogainangan sasuruaknia samba pabebeakenennia lalep, kuanangan, ‘Kau imaangka bagata sambata, akusesengan poi bulagatku simalilimai.’

¹⁰ Kukua nia ka matamui: Kisedda leu te angkat bagada samalaikat Taikamanua kalulut sara sijo sibauake paatuatnia.”

Toga simalilimai

¹¹ Kuanangan minca Jesus, “Ai sara sirimanua rua togania simanteu.

¹² Kuanangan sisule ka matat ukkuinia, ‘Ukkui, ake kaku bibilet siripot ikepmakenenku.’ Ia geti parubeinangan sia ukkuinia bibilet ka ruada togania.

¹³ Ta amauju, sakiakenangan sangamberi bibilet rubeiatnia sisule nenda, tui nia ka laggai ka sareunan. Sedda sappuruakenangan pukayoatnia muparaboat sikatai.

¹⁴ Kele aisappuru sangamberi bulagatnia, bara pulajeat sabeu ka laggai nenda, pulajenangan leu ka sia.

¹⁵ Ia geti ei nia mupagugulet ka sara sirimanua ka laggai nenda; koiniakenangan nia masijago sakkoilonia ka mone.

¹⁶ Besiakenangan isutnake balugunia kat sakkoilo, tapoi beri sara amasikau ka tubunia.

¹⁷ Ia pei seseakenangan galai tubunia, kuanangan, ‘Magulai bai sapagugulet ukkuiku, simalilimai le kan ka sia, aku geti mamateian le aku laje!

¹⁸ Tususurungan le aku kutoili ka ukkuiku, kuaku le ka matania: Ukkui, amajongan aku ka Taikamanua samba kekeu.

¹⁹ Taan mateu tuoniake aku togam; kauan le aku paguguletnu.’

²⁰ Ia geti suru nia itoili ka ukkuinia. Ai pei le nia ka sareunan, aiitcoan nia ukkuinia, makatenangan bagania, pabalaunangan masiroroi nia, lakkaiakenangan nia, sigguknangan nia.

²¹ Kuanangan toga ka matat ukkuinia, ‘Ukkui, amajongan aku ka Taikamanua samba kekeu. Taan mateu tuoniake aku togam.’

²² Kuanangan ukkui ka matat sapaguguletnia, ‘Pagaja nuake kam se leppei simakope eru, nuleppeiake kam ka tubunia, kaumuian sipsip ka singongainia samba kasu ka rerenia.

²³ Lepa alamuian togat jaui simamomo, jajamuian nia, bule tapukom ka angkat baga.

²⁴ Ailangoan poi togaku nene, kineneiget amurimanuangan nia minca; amalimaian nia, kineneiget atusesengan nia minca.’ Ia geti taddaakerangan muangka baga.

²⁵ Tapoi togania sikebbukat, ai le nia ka mone. Kele aitoili amalegerengan nia ka lalep, arepnangan urai samba turu.

²⁶ Sogainangan sara pagugulet ka tubunia nounounangan, ‘Aponia sibabara nene?’

²⁷ Aleginangan nia pagugulet, ‘Atoilingan bagim, oto jajanangan togat jaui simamomo ukkuinu, maron poi tubunia aitoili.’

²⁸ Pugolunangan toga sikebbukat, ta ioba mei ka lalep. Lepa gorosot ukkuinia ipusumi nia.

²⁹ Kuana le ka matat ukkuinia ialegi nia, ‘Taan taagai rura akureddet ngangam, beri pei akupasabau tiboietnu. Tapoi beri pei akenu kaku sara togat kambing, bule kupuangkaki bagaku sambamai sasuruakku.

³⁰ Tapoi kele aitoili togam sisappuruake bibiletnu ka puoloman tubunia, jajanungan ka sia togat jaui simamomo.’

³¹ Kuanangan ukkuinia ka matania, ‘Sirou, mariuriu le ekeu ka tubuku, sangamberi sibabara kaku, ekeu le sibakkatnia.

³² Kineneiget mateu le tapuangka baga samba mugora bagei, amateian poi bagim nene, kineneiget amurimanuangan nia minca; amalimaian nia, kineneiget atusesengan nia minca.’ ”