Luk. 13 - BUKO SIPUNENAN

Masibauake paatuat ele matei

¹ Ka teterenia nenda oi piga pa sipasisesegeake ka matat Jesus pagalaiat tai Galilea, sigaluakenen Pilatus logaura ka logau tarimeu sibuluakenenda.

² Aleginangan nia Jesus kuanangan ka matada, “Ka bagamui le te tai Galilea nene le abeu jo ka tai Galilea sabagei lulunia araorik nene?

³ Taa! Kukua nia ka matamui: Ke ta nubauake kam paatuatmui, kisedda leu te ilango kam sangamberimui.

⁴ Ele ka bagamui sia sipulu balu simamatei sinaksak kudduat ngonongonong ka Siloam abeu sele ka sangamberi sipulaggai ka Jerusalem?

⁵ Taa! Kukua nia ka matamui: Ke ta nubauake kam paatuatmui, kisedda leu te ilango kam sangamberimui.”

Pasikat sileu sitaipububua

⁶ Lepa tiboinangan Jesus ka matada pasikat nene, “Ai sara sibakkat sangaloina sileu ka monen anggurnia. Ei nia masigaba buania, tapoi ta anai aisese.

⁷ Kuanangan ka matat sipuuku monenia, ‘Telu ngarurangan ujunia akuoi masigaba buat sileu nene, tapoi beri sangambua akusese. Taddengan le nia. Apananta isaila polak siboboi.’

⁸ Aleginangan nia sipuuku mone, ‘Eddania ikuddu boiki sangarura nene Tuan. Kupakkuru boiki bokko bakkatnia samba kukau ramokat,

⁹ baleu ioba mubua rura ka mata. Ta geti mubua, taddenungan nia.’ ”

Ialeake sara sinanalep simasakit Jesus ka gogoi Sabat

¹⁰ Ka sara gogoi amungantoman Jesus ka uma parurukat ka gogoi Sabat.

¹¹ Ai sedda sara sinanalep pulu balu ngarurangan ujunia aimabesi, kalulut ai sanitu ka tubunia, pat koukou teiteinia, taan momoi iroipoake tubunia.

¹² Kele aiitco nia Jesus, sogainangan nia, kuanangan ka matania, “Ina, amalengan besinu.”

¹³ Lepa rapeakenangan kabeinia Jesus ka tubut sinanalep, purionangan roipo, umunakenangan Taikamanua.

¹⁴ Pugolunangan utet uma parurukat kalulut aialeake sirimanua Jesus ka gogoi Sabat. Kuanangan ka matada sirimanua simigi, “Ai enem ngagogoi ujunia pugalajat; ka gogoi nenda te nuooi kam itualeake besimui, bui ka gogoi Sabat!”

¹⁵ Kuanangan ka matania si Tuhan, “Kam sipatataju! Kam ka kam, ta pa nubebelaake kam jaui ele kalideimui ka gelinia ka gogoi Sabat masitaroake nia mulo?

¹⁶ Bara nene togat Abraham, sikabet sanitu pulu balu ngarurangan ujunia, ta pa mateu iturugut kakabenia ka gogoi Sabat?”

¹⁷ Kele aikua nene Jesus, mailarangan sapagoluakenennia; tapoi sabagei geti maangka bagada masiitco sangamberi kerek sigalai Jesus.

Pasikat luikut ube samba sioman

¹⁸ Ia geti kuanangan Jesus, “Apa pa pakerekatnia Purimataat Taikamanua? Kaipa pa kupakekereake nia?

¹⁹ Makere le nia ka sara luikut ube sialat sara sirimanua ikaramake nia ka monenia. Pututunangan bailiu loina, purumunnangan uma ka rannia.”

²⁰ Kuanangan minca Jesus, “Kaipa pa kupapasikatnake nia Purimataat Taikamanua?

²¹ Makere le nia ka sioman sialat sara sinanalep igaluake nia ka telu ngatekong tapung teret ipugoo sangamberinia.”

Matatbaliu simaropdop

²² Ka puenunganannia Jesus iei ka Jerusalem, enunginangan laggai sabeu samba sigoiso pagalu mungantoman.

²³ Ai sara sipasinonounou ka matania, “Tuhan, ta maigi sia sisese puaragat?”

²⁴ Kuanangan ka matada Jesus, “Besiake kam tuguru ka gugurukat simaropdop; aipoi kukua nia ka matamui: Maigi sia sibesiake tuguru sedda, tapoi ta momoi.

²⁵ Ke atusurungan sibakkat lalep ilekkereake matatbaliu, puriomuian te ka laibokat, luuluumuian matatbaliu, kuamuian, ‘Tuan, buka kai!’ Alegina le nia ikua ka matamui, ‘Ta kuagai kaipa anubara kam!’

²⁶ Kuamuian te, ‘Tapoi amukoman samba amuloan sita sambata samba amungantomannan ekeu ka laggaimai!’

²⁷ Kuana le minca ka matamui, ‘Ta kuagai kaipa anubara kam. Katuitui kam ka mataku kam sigalai sikatai!’

²⁸ Sedda te nupusosou kam samba iputatangat sotmui, nuitco kam si Abraham, si Isak samba si Jakob samba tai nabi ka Purimataat Taikamanua, kam geti tugikgikngake ka bebe.

²⁹ Momoi te sia sibara ka isit kabelaiat sulu samba kabelekat sulu, ka isit bare samba kaiaman mukuddu muangka baga ka Purimataat Taikamanua.

³⁰ Kisedda te sia sikateitei bailiu siboiki samba siboiki bailiu sikateitei.”

Reureu bagat Jesus masiitco Jerusalem

³¹ Ka jam nenda leu et oi piga pa tai Parise masikua ka matat Jesus, “Katuitui se, aigegelai poi si Herodes masimateiake ekeu.”

³² Kuanangan ka matada Jesus, “Kenan le kam, kua kam ka matat silamusek nene, ‘Gogoi nene samba mancep kuusiake sanitu samba kualeake simabesi, ka gogoi sikatelunia kappuluakekungan galajetku.’

³³ Tapoi buita kuriuriuake puenungananku gogoi nene, mancep samba mancep minca, aipoi ta momoi tumateiake nabi, ke ta ka Jerusalem.

³⁴ Jerusalem, Jerusalem, ekeu simateiake tai nabi samba sipasibabaijuk sikoiniakenen kekeu! Piga ngamincaan akusibo masiruruake tatogam kele iruruake togania gougou ka tei kapponia, tapoi ta anoba kam.

³⁵ Kineneiget matatangeuan le te lalepmui. Kukua nia ka matamui: Taan te nuiitco kam aku, teret nukua kam, ‘Kau imatulu tubunia siooi ka onin Tuhan.’ ”