Luk. 12 - BUKO SIPUNENAN

Nganturat Tuhan Jesus ka sipasiuluinia

¹ Kele aramaruru sirimanua simigi sipuriribu, pat papeperaan le sia; taddaakenangan Jesus masikua, boiki ka matada sipasiuluinia, “Pagaba kam tubumui ka siomanda tai Parise, tibonannia patajuatda.

² Ta anai beri sara sinambo taimatotoila geti samba ta anai simalipput taimaagai geti.

³ Siniboimui ka gepgep, maarep le nia ka pato, samba sikasatnakenenmui ka piura sirimanua ka bagat lalep, tusosogaake le nia ka teitei lalep.”

Taikamanua le kalotoakenen

⁴ “Kukua nia ka matamui sasuruakku! Ba kakalotoake kam sia simateiake tubu, lepa nenda taan momoi ragalai apa pa.

⁵ Ai leu kusausau ka kam kasei kalotoakenenmui. Taikamanua le kalotoake kam! Aipoi lepa ipasimatei, magege leu nia masiribbaiake sirimanua ka narako. Kukua nia ka matamui, nia le kalotoake kam.

⁶ Ta rua sen rasakiake lima ngamuneng nganya? Kenanen kisedda beri sangamuneng ta ikakalipogi Taikamanua.

⁷ Beri alaimui aiaddengan sangamberinia. Oto ba maloloto kam, kam pei le poi abeu ka nganya simigi.

⁸ Kukua nia ka matamui: Kasei simunengake aku ka matat sirimanua, imumunengake leu nia Togatsirimanua ka matada samalaikat Taikamanua.

⁹ Tapoi kasei sipakele aku ka matat sirimanua, ipakekele leu nia Togatsirimanua ka matada samalaikat Taikamanua.

¹⁰ Kasei sipakatai nganga ka tubut Togatsirimanua, tuaappeake pei le nia; tapoi sipaloloi Ketsat Sipunenan geti ta tuaappeake nia.

¹¹ Bara bara raambit kam rapakaroake kam ka uma parurukat ele ka matada sapamarenta ele ka sipasiukum, bui imakarat bagamui pagalaiat kipa alegietmui ele tiboiet tiboakenenmui.

¹² Aipoi Ketsat Sipunenan le ipangangantoman kam ka teterenia nenda apa tiboakenenmui.”

Pasikat sirimanua simakayo taiagai paatuat

¹³ Ai sara ka talagada sirimanua simigi masikua ka matat Jesus, “Guru, kua ka sarainangku irubeiake kaku bibilet sigalak sakalimeumai.”

¹⁴ Kuanangan ka matania Jesus, “Ale, kasei amasikau aku bailiu sipasiukum ele siparubei bibiletmui?”

¹⁵ Kuanangan minca ka matada, “Pagaba samba jago kam tubumui ka alau baga, aipoi purimanuaiat sirimanua ta kalulut igit bibilet, kenanen kipa kayonia.”

¹⁶ Lepa tiboinangan Jesus ka matada sara pasikat kuanangan, “Ai sara sirimanua simakayo sibakkat mone simabuaiet.

¹⁷ Paatunangan ka bagania, ‘Kipangan le pa kugagalai, ta anai poi kudduat pangoirikat bua sibara ka monengku.’

¹⁸ Kuanangan, ‘Kisean le kugagalai; kuraragatnan le sapouku, kugalai simakabeunan, sedda te kukakau sangamberi buat monengku samba sangamberi bibiletku.

¹⁹ Lepa kuakungan ka ketsatku, oi kina ketsat, amusukkarangan bibiletnu, metnangan piga ngarura pa. Puaringan le, mukom mulo samba muangka baga!’

²⁰ Tapoi kuanangan Taikamanua ka matania, ‘Ekeu taiagai paatuat! Soibo nene leu et tuala ketsatnu ka tubum. Kaseian le masibabakkati sangamberi sinareknu?’

²¹ Kisedda leu te galainia sirimanua siruruake kayo ka tubunia, ke ta makayo nia ka matat Taikamanua.”

Karat baga ka purimanuaiat

²² Lepa kuanangan Jesus ka matada sipasiuluinia, “Ia te kukukua ka matamui, bui imakarat bagamui ka pagalaiat engamui, ia te pagalaiat komenmui, ele ka tubumui, ia te pagalaiat leppeiakenenmui.

²³ Enga le poi abeu ka kan, samba tubu le abeu ka leppei.

²⁴ Itco le kam kailea, taipangangaram, taipasimomonei, ta anai kudduat pangoirikat ele sapounia. Tapoi ai le ipakokom sia Taikamanua. Kam pei le tebai abeu ka uma!

²⁵ Kasei ka kam, kalulut karat bagania momoi ituppai nantat purimanuaiatnia sangaeto?

²⁶ Oto ke beringan sigoiso ta momoi nubaraake kam, angoi makarat bagamui pagalaiat bagei?

²⁷ Itco le kam kainau, ta mugagalai nia, ta mamumutere nia. Tapoi kukua nia ka matamui: Beringan si Salomo ka bagat sangamberi pulatsanannia, ta aiaili latsat leppeinia kele latsat ogo.

²⁸ Oto ke kise palalaingena sese ka mone Taikamanua sipuririo kineneiget, ribbaiakenen mancep ka api, sara pei te kam, kam simagulai tonem baga!

²⁹ Oto buian imakarat samba imakeppu ka bagamui pagalaiat komenmui ele loketmui.

³⁰ Sipuarat sabulungan le sigaba sangamberinia nene. Iagai le poi Ukkuimui sangamberi besiakenenmui.

³¹ Besiake le kam boiki Purimataat Taikamanua, bagei geti itutuppaiake Taikamanua ka kam.

³² Ba maloloto mungkuat sigoiso! Obaket Ukkuimui poi masiake ka kam Purimataat.

³³ Sakiake kam sangamberi bibiletmui, pauruakemuian nia ka simageba. Galai kam ka kam suppit sitaimakakatai, ia te bibilet ka sorga taimakukurut, taioi ilegeri sipananangkou samba ipakatai nia tabbubulut.

³⁴ Kaipa poi pukayoatmui, sedda leu te paatuatmui!”

Pagugulet simatarek tubu

³⁵ “Kau imariuriu ituappara tengamui samba iputoro alitomui.

³⁶ Kau kele sapagugulet singenaake tuanda itoili ka punen putalimogat, bule kei toili nia samba iluuluu matatbaliu, maruei rabuka nia.

³⁷ Mauktuk te sapagugulet nenda itoili tuanda iaili sia ai sia mumamata. Kukua nia ka matamui: Apparaakenangan akkik tengania, kuanangan rapukuddu mukom, puukunangan sia.

³⁸ Bulat mauktuk sia sapagugulet nenda ke iaili sia tuanda ai sia masingengena, kenanen tengamoi ioi, ele ka patokat.

³⁹ Tapoi nene repdep kam: Ke iagai sibakkat lalep pigamoi ioi sipananangkou, ta ioobaake ragaugau lalepnia sipananangkou.

⁴⁰ Oto kau imariuriu numatarek kam, aipoi ka tetere taibabagaiet bagamui le iooi Togatsirimanua.”

⁴¹ Kuanangan si Petrus, “Tuhan, ka kai le nukukua nia pasikat nene, ele ka sangamberi sirimanua?”

⁴² Aleginangan nia si Tuhan, “Kasei le pagugulet simatopit samba simasiku paatuat rioakenen tuannia masipaneinei sapaguguletnia samba masikau katda ka teterenia?

⁴³ Mauktuk te pagugulet nenda, ke toili tuannia iaili nia aigagalai galajetnia.

⁴⁴ Kukua nia ka matamui: Kaunangan leu nia masipuuku sangamberi bibiletnia.

⁴⁵ Tapoi ke ikua le ka paatuatnia pagugulet nenda, ‘tapei maruruei itoili tuanku,’ ia geti taddaakenangan masipaboboki sapagugulet simanteu samba sinanalep, samba mukom samba mulo, teret puineng.

⁴⁶ Toilina le tuannia ka gogoi taisusuksungennia samba ka tetere taiaagaietnia, mateiakenangan nia, kaunangan rubeiatnia kele rubeiatda sitaimatonem baga.

⁴⁷ Pagugulet siagai siobat bagat tuannia, tapoi ta anai ipatarek samba ta igalai siobat bagat tuannia, oriknangan maigi bobobo.

⁴⁸ Pagugulet sitaiagai siobat bagat tuannia geti, galai igalai sitaipasese simateu tubobo nia, goiso le bobobo ka tubunia. Aipoi ka sirimanua simaigi tukau, maigi leu tuloulogi ka tubunia. Samba ka sirimanua simaigi tusegeake, maigi leu tutiddou ka tubunia.”

Jesus masibaraake pasaraat

⁴⁹ “Masiribbaiake api ka polak le akuoi; kepei mujuluuan nia!

⁵⁰ Aian kaku pasiraukat rauakenen ka tubuku; bulat makeppu ka bagaku ke tapei tukappuluake.

⁵¹ Ka bagamui masiake aban ka polak akuoi? Ta aban. Kukua nia ka matamui: pasaraat le.

⁵² Barania kineneiget, silima sipueeppu ka bagat lalep pajoggolo pasasambada, sitelu masisaggangi sirua, sirua masisaggangi sitelu.

⁵³ Ukkui masisaggangi togania simanteu samba toga simanteu masisaggangi ukkui. Ina masisaggangi togania sinanalep samba toga sinanalep masisaggangi inania. Ina siputataliku masisaggangi talikunia sinanalep samba sinanalep masisaggangi talikunia.”

Masipatuptup tetere

⁵⁴ Kuanangan leu Jesus ka matada sirimanua simigi, “Ke nuitco kam ipangarai tanairusa ka kabelekat sulu, kuamuian leu, ‘Bebele te urat.’ Ia leu et muaaili.

⁵⁵ Ke muboroi rusa kaiaman, kuamuian, ‘Malelegeu te manua.’ Ia leu et muaaili.

⁵⁶ Kam sipatataju! Matat manua samba sibabara ka polak nuagai kam masipatuptup. Angoi ta nuagai kam masipatuptup tetere kineneiget?”

Paaban kam saggakmui

⁵⁷ “Angoi ta nupaatu kam ka tubumui simaroipo?

⁵⁸ Ai pei le kam memei ruamui pajoggoloakenennu ka sipasiukum, besiake nupaaban kam ai pei le kam ka enungan, bui ipagirit ekeu ka matat sipasiukum; ia geti sipasiukum masisegeake ekeu ka polisi, polisi masiribbaiake ekeu ka bagat penjara.

⁵⁹ Kukua nia ka matam: Taan te bebela ekeu sedda, teret nulettuake utaknu.”