Luk. 11 - BUKO SIPUNENAN

Pagalaiat manindou

¹ Ka sara gogoi amanindou Jesus ka sara kudduat. Lepa aipanindou kuanangan ka matania sara ka talagat sipasiuluinia, “Tuhan, gelai kai manindou, keleu igelaiake sipasiuluinia si Johannes.”

² Kuanangan ka matada Jesus, “Ke manindou kam, kise le nukukua kam, ‘Ukkui, bule itupuneni onim; ioi Purimataatnu.

³ Ake kanmai senen gogoi simemetnia.

⁴ Appeake jomai, aipoi kai leu akuappeakean kai senen sipusesele ka tubumai. Samba bui nukau kai ka pasisiboat.’ ”

⁵ Lepa kuanangan ka matada sipasiuluinia, “Ai bai ka kam sieei ka lalep suruaknia tengamoi masikua ka matania, ‘Suruak, kubale boiki kekeu telu roti,

⁶ amoian poi suruakku barania ka pueijanan, ta anai tattatnakenenku ka sia!’

⁷ Kuanangan te sikuddu ka baga kise, ‘Ba gegejaake bagaku. Atulekkerengan matatbaliu, amerepman kai tatogaku; ta momoi kutusuru masiake apa pa kekeu.’

⁸ Kukua nia ka matamui: Kenanen ta tusuru nia masikau ka tubunia kalulut pasusuruakda, tapoi kalulut taimamailania manindou, ta isosoppi itusuru samba ikau ka sia apa besiakenennia.

⁹ Ia te lulunia kukua ka matamui: Tiddou kam, tuaake ka kam; gaba kam, nusesese kam; luuluu kam tububukaake ka kam matatbaliu.

¹⁰ Aipoi senen sipaninindou, masisisilo samba sipasigagaba, masisesese samba sipasiluluuluu, tububukaake ka sia matatbaliu.

¹¹ Ai pa sara ukkui ka talagamui, ke itiddou iba togania, ulou le ikakau silit iba?

¹² Ele ke itiddou adjolou, telenganga le ikakau?

¹³ Sirimanua sikatai tebai kam, nuagai kam masikau simaeru ka tatogamui, sara pei Ukkuimui ka sorga! Ikakau Ketsat Sipunenan ka sia sipaninindou ka tubunia.”

Jesus samba Beelsebul

¹⁴ Ka sara gogoi aiusiake Jesus sanitu taiagai manibo ka tubut sara sirimanua. Kele aibela sanitu, againangan manibo taiagai manibo nenda. Makiseinangan ka bagada sirimanua simigi.

¹⁵ Tapoi ai piga pa sipasikukua, “Ka geget Beelsebul utera sanitu le aioi iusiake sanitu.”

¹⁶ Sabagei raoba masisibo Jesus, tiddourangan ipakoinong kiseiet sibara ka sorga.

¹⁷ Tapoi iagai le Jesus pinatuptupda, kuanangan ka matada, “Senen purimataat sipaaggara pasasambada, matatangeu le purimataat nenda; samba senen lalep sipaaggara pasasambada, makakatai le.

¹⁸ Oto ke paaggara bai sanitu pasasambada, matotom pa purimataatnia? Anukua poi kam ka geget Beelsebul le kuusiake sanitu.

¹⁹ Ke ka geget Beelsebul bai kuusiake sanitu, ka geget kaseian le rapasiusi sanitu sipasiuluimui? Siangan le geti masiuukumake kam.

²⁰ Tapoi ke ka geget Taikamanua le kuusiake sanitu, amoian te Purimataat Taikamanua ka kam.

²¹ Ke sara simagege, sibara pamatei ijago lalepnia, ta malilimai bibiletnia.

²² Tapoi ke moi sisaliu gegenia masilaba samba masikalaake nia, alanangan pamateinia katoneman bagania, rauraunangan sangamberi bibiletnia, parubeinangan nia.

²³ Kasei sitaipaalei aku, sisaggangi aku te nia, samba sitaipaalei aku masiruru, sipasisasaragai te nia.”

Katotoilit sanitu

²⁴ “Kele aibela sanitu ka tubut sirimanua, putebanangan ka kudduat simagarak masigaba kudduat puariat, tapoi kalulut ta aisese kuanangan, ‘Kusosoksokngan le ka lalep sikaddiuakenenku.’

²⁵ Ei nia, itconangan lalep nenda amalinaan samba amalaingengan bagei.

²⁶ Lepa ei nia masisogai pitu sanitu bagei sisaliu pei le katainia. Oi sia pukuddurangan ka tubut sirimanua nenda. Makopenangan katai sirimanua nenda bele pei le ka panandaatnia.”

Puuktungan sibulatnia

²⁷ Ai pei le maninibo Jesus, panibonangan sara sinanalep ka talagada simigi kuanangan ka matat Jesus, “Bulat mauktuk ina situtuake matam samba sitottoni ekeu!”

²⁸ Kuanangan Jesus, “Bulat simauktuk, ia te sipasiaarep samba sisiddoni tiboiet Taikamanua.”

Katuaggaiat nabi Jona

²⁹ Kele araparuru sirimanua simigi ka matat Jesus, taddaakenangan masikua ka matada, “Reddenan sirimanua nene, reddenan sijo le. Katuaggaiat le ragagaba. Tapoi ta tukakau katuaggaiat apa pa ka sia, sarat katuaggaiat nabi Jona le.

³⁰ Aipoi kele nabi Jona bailiu katuaggaiat ka tai Ninipe, kisedda leu et Togatsirimanua bailiu katuaggaiat ka sirimanua reddenan nene.

³¹ Ka gogoi pasiukuman tususuru te rimata sinanalep sibara ka kaiaman sambada reddenan nene samba masiseleake sia. Aipoi rimata nene barania ka tutut polak oi nia masiarep sikut paatuat Salomo; tapoi sene ai sisaliu pei le beunan Salomo!

³² Ka gogoi pasiukuman, tususuru te tai Ninipe sambada reddenan nene samba masiseleake sia; arabauake poi paatuatda ka sia aarepda ngantoman Jona. Tapoi se ai sisaliu pei le beunan Jona!”

Alitot tubu

³³ “Ta anai kasei pa situnam alito lepa lipputnakenangan nia, ele ikau nia ka tei bulukbuk. Ka kudduat pualitoat le ikakau nia, bule raitco patonia sia siooi.

³⁴ Mata ia te alitot tubu. Ke malatsat matam, mapato leu sangalio tubum; tapoi ke maramun matam, magepgepnangan sangalio tubum.

³⁵ Oto pagaba, bui ibailiu gepgep pato sikuddu ka tubum.

³⁶ Ke mapato sangalio tubum, beri goiso simagepgep, ta isosoppi imapato sangalionia, kele itoroi ekeu alito.”

Iseleake Jesus tai Parise samba siagaisurat

³⁷ Lepa aipanibo Jesus, sogainangan nia sara tai Parise mukom ka lalepnia; einangan leu et Jesus mukom sedda.

³⁸ Kele aiitco si Parise ta aibui kabeinia Jesus kei mukom nia, makiseinangan ka bagania.

³⁹ Kuanangan ka matania si Tuhan, “Kam tai Parise, sarat teitei pulokat samba mangko le nulilinaake kam, tapoi ka bagania geti asutnan siraurau samba katai.

⁴⁰ Pate taiagaimui paatuat! Ta Taikamanua sibaraake uddutnia, nia leu et masibaraake bagania?

⁴¹ Apa sibabara ka bagat pulokat samba mangkomui, ia te nupauuruake kam ka simageba, ia pei te malinanangan sangamberinia ka kam.

⁴² Paan te ka kam tai Parise! Saparpulu sibara ka raro, sarei samba guleimui nukau kam ka Taikamanua, tapoi puroipoat samba nuntut baga ka Taikamanua geti ta nupuletsei kam. Nene buita tugalaiake, tapoi nenda bagei bui tuoreake!

⁴³ Paan te ka kam tai Parise! Noba kam uddenan siboiki ka uma parurukat, samba noba kam raroroi kam sirimanua ka pasakiat.

⁴⁴ Paan te ka kam! Kele ratei si ta anai toggaiat le kam, rapera uddutnia sirimanua taiagaira nia.”

⁴⁵ Kuanangan sara ka talagada siagaisurat, “Guru, anupaloloian kai ka tiboietnu nene!”

⁴⁶ Kuanangan Jesus, “Paan te ka kam leu, kam siagaisurat! Nukau le kam bairanenda sirimanua simasane, tapoi kam geti beri sara singongaimui ta noba kam nurapeake kam.

⁴⁷ Paan te ka kam! Nugalai kam simalainge rateira tai nabi, tapoi taikebbukatmui le amasimateiake sia.

⁴⁸ Oto anumunengakean kam obana bagamui sigalaira taikebbukatmui; sia masimateiake tai nabi, kam masipalainge rateira.

⁴⁹ Ia te lulunia sikut paatuat Taikamanua masikua, ‘Kukoiniake tai nabi samba tai apostel ka sia, sabagei ramateiake, sabagei rapaoreji.’

⁵⁰ Bule tulumunake logaura tai nabi ka sirimanua reddenan nene, barania ka panandaat polak pei le,

⁵¹ barania ka logau Abel aili ka logau Sakaria, simateiakenenda ka oggak kudduat pasibuluat samba Uman Taikamanua. Kukua nia ka matamui: Sangamberinia nene mululumun le geti ka sangareddenan nene.

⁵² Paan te ka kam siagaisurat! Kukuksik puagaiat nuukkaake kam; tapoi kam ta tuguru ka bagania, samba sirimanua sioba tuguru nukera kam.”

⁵³ Kele aituitui Jesus sedda, taddaakerangan simakope siagaisurat samba tai Parise masigolu Jesus, samba maigi paisekat rakua ka tubunia,

⁵⁴ ibara ukkaakenenda sara tiboiet sibebela ka ngangania, bule ioi ralaba nia.