Luk. 1 - BUKO SIPUNENAN

Pasibuka

¹ Teopilus tuan sabeu, Maigingan sia sitaddaake masisuratnake sipulelelek pagalaiat sibabara ka talagata.

² Rasuratnake siripot sinegeakenenda ka matata sipasiitco ka panandaatnia samba sipaarep katuaremannia.

³ Kalulut nene, kaku leu lepa akulelekngake sangamberinia sipulelelek barania ka panandaatnia, teuakekungan kusuratnake nia simaruak kekeu,

⁴ bule nuagai sangamberi sigelaiakenen kekeu bulat sibulatnia.

Pangasegekat putututut matat Johannes Sipasirarau

⁵ Ka teteret Herodes murimata ka Judea, ai sara imam sipuoni Sakaria, sibara ka rubeiat Abia. Sinanalepnia sipuoni si Elisabet, punuteteu imam leu et.

⁶ Simaroipo baga le sia ruada ka matat Taikamanua samba masiparaboatnake surukat samba patonekat Tuhan sipulelelek.

⁷ Tapoi ta anai togada, taipususule le si Elisabet samba amabajaan sia ruada.

⁸ Ka sara gogoi, aigalai si Sakaria galajet imam ka matat Taikamanua, aipoi ka teteret nenda rubeiat Abia aiorak mugalai galajet.

⁹ Kele simareirei ragalaiake tai imam, ragalai le surat pauktuk; oto si Sakaria aiorak mei ka Uman Taikamanua masilabo kumanyang.

¹⁰ Ka teteret pasilabokat kumanyang, sirimanua simigi ai sia manindou ka gerat.

¹¹ Ia geti oi sara malaikat Tuhan kai Sakaria murio isit kai kattoet meja pasilabokat kumanyang.

¹² Tugegenangan si Sakaria aiitco malaika, malotonangan.

¹³ Kuanangan ka matania malaika, “Ba maloloto Sakaria! Aiarepingan panindogatnu Taikamanua. Ai leu itutuake matat togam simanteu sinanalepnu si Elisabet, kaunennu oninia Johannes.

¹⁴ Bulat maangka samba magora te bagam, samba maigi leu sabagei sipuaangka baga ka pututukat matania.

¹⁵ Abeu poi nia ka matat Tuhan, samba ta ilolo anggur ele lo simapuinengen, sun le ka tubunia Ketsat Sipunenan barania ka gigi pei le.

¹⁶ Toiliakenangan maigi bangsa Israel kai Tuhan Taikamanuanda.

¹⁷ Musumbulat le nia ka matat Tuhan ka ketsat samba ka geget Elia, masitoiliake paatuatda saukkui ka tatogada, samba sitaimareddet ipalulu sia toili ka enungan simaroipo; masitarekngake kai Tuhan sara bangsa simatarek tubu.”

¹⁸ Kuanangan ka matat malaika si Sakaria, “Apa patuaggaiatnia kuagai ibara nene? Aipoi amabajaan aku, sinanalepku leu amabajaan nia.”

¹⁹ Aleginangan nia malaika, “Aku te si Gabriel, pagugulet Taikamanua. Aikoiniake le aku Taikamanua masipatiboake ekeu samba masisegeake katuareman simaeru nene kekeu.

²⁰ Taiagainungan te manibo, taan momoi nupanibo teret ipuaili sangamberinia nene, kalulut taimatonem bagam ka tiboietku sipuaaili ka teterenia.”

²¹ Tapoi sirimanua simigi geti ai le rangengenaake si Sakaria. Amakiseian ka bagada kopet ujunia ka Uman Taikamanua.

²² Kele aibela, taan momoi ipanibo ka matada. Agairangan leu ai siitcot matania ka Uman Taikamanua. Taan poi iagai manibo, pakirekatnan le aikau ipatiboake sia.

²³ Kele aitukappulu gogoi pugalajatnia si Sakaria toili nia ka lalep.

²⁴ Taan leu amauju pusuruketnangan si Elisabet sinanalepnia; taipabelanangan tubunia lima ngalaggo ujunia, kuanangan,

²⁵ “Ia ne aigalai si Tuhan ka tubuku, masitataake ailaku ka matat sirimanua.”

Pangasegekat putututut matat Jesus

²⁶ Ka laggo sikaenemnia koiniakenangan minca malaika Gabriel Taikamanua ka sara laggai ka Galilea sipuoni Natsaret

²⁷ ka sara siokko nounoget sara simanteu sipuoni si Josep, muntogat David; onin siokko nenda si Maria.

²⁸ Tagetnakenangan nia malaika kuanangan, “Salam kekeu sinukatnakenen, ipaalei ekeu si Tuhan!”

²⁹ Tugegenangan si Maria aiarep tiboiet malaika, paatunangan ka bagania, aponia katukolobat paroroiat nene.

³⁰ Kuanangan ka matania malaika, “Ba maloloto Maria; aipukatekingan ekeu baga Taikamanua.

³¹ Mususuruket te ekeu, tutuakenungan matat togam simanteu, kaunennu oninia Jesus.

³² Abeu te nia geti, samba muoni le nia Togat Taikamanua Sipulubeunan. Ia geti Tuhan Taikamanua masikau ka tubunia uddenan purimataat David, taikebbukatnia,

³³ samba bailiu nia rimata ka uman Jakob teret buruburu, ta tatakki puririmatania buru.”

³⁴ Kuanangan ka matat malaika si Maria, “Kipa iooi ibara nene, enan tapei amusimanteu aku?”

³⁵ Aleginangan nia malaika, “Ai leu isopsop ka tubum Ketsat Sipunenan, samba ikunemi ekeu geget Taikamanua Sipulubeunan. Ia te lulunia, toga tutuakenennu Sipunenan le samba muoni Togat Taikamanua.

³⁶ Itco pei eiram si Elisabet, taipususule le tebai nia, ai te nia mususuruket sara toga simanteu, enem ngalaggoan ujunia, kenanen amabajaan nia.

³⁷ Aipoi ka Taikamanua ta anai sitaioi ibaraake.”

³⁸ Kuanangan si Maria, “Pagugulet Taikamanua le aku; bule ibara ka tubuku kele sikuam.” Lepa kaddiuakenangan nia malaika.

Ibalou si Elisabet si Maria

³⁹ Ka teterenia nenda suru si Maria, olaakenangan mei ka laggai ka leleu ka Judea.

⁴⁰ Guru nia ka lalep Sakaria, roroinangan si Elisabet.

⁴¹ Kele aiarep paroroiat Maria si Elisabet, pageluknangan tubunia sikolik ka suruketnia, sopsopnangan si Elisabet Ketsat Sipunenan,

⁴² pugereinangan kuanangan, “Ekeu le simauktuk ka talagada tainanalep, mauktuk leu toga tutuakenennu!

⁴³ Kasei te aku nene iooi inan Tuhanku masibalou aku?

⁴⁴ Aipoi kele akuarep ngangan paroroiatnu, pageluknangan tubunia sikolik ka suruketku angkat bagania.

⁴⁵ Mauktuk ekeu, matonem poi bagam ipuaili sikuat Tuhan ka tubum.”

Urai pasiumun Maria

⁴⁶ Kuanangan si Maria, “Paatuatku masiumun si Tuhan,

⁴⁷ ketsatku leu maangka baga kalulut Taikamanua Sipaarau aku,

⁴⁸ aiitco poi goisot tiboi tubut paguguletnia. Barania kise, umunakerangan aku simauktuk sangamberi reddenan,

⁴⁹ kalulut beunan aigalai ka tubuku Sipulugege, sipunenan le oninia.

⁵⁰ Katet bagania ta tatakki ka sangamberi sirimanua sirepdep loto ka tubunia.

⁵¹ Aitotoiakean kabeinia masipakoinong gegenia; simaukkat paatuat aisabuakean.

⁵² Tai rimata simagege itukkuluake ka uddenanda, sirimanua sigoiso tiboi tubu iabeuake.

⁵³ Ipanguruatnake simaeru masipaektek simalaje, simakayo ituituiake si ta ambinen.

⁵⁴ Airomakean Israel, paguguletnia, masirepdep katet bagania,

⁵⁵ siripot palelengannia ka taikebbukatta kai Abraham samba ka sapunuteteunia teret buruburu.”

⁵⁶ Ai telu ngalaggo ujunia aikuddu si Maria kai Elisabet, lepa toili nia ka lalepnia.

Pututukat matat Johannes Sipasirarau

⁵⁷ Kele aiaili laggot suruketnia si Elisabet, tutuakenangan matat togania simanteu.

⁵⁸ Kele araarep nia pabebeakenennia lalep samba saeppuda kopet beunan katet bagat Tuhan kai Elisabet, puangkarangan baga sambada.

⁵⁹ Ka gogoi sikabalunia, oi sia masisunat sikolik, kaurangan oninia Sakaria, siripot onin ukkuinia.

⁶⁰ Tapoi kuanangan inania, “Taa! Si Johannes le oninia.”

⁶¹ Kuarangan ka matania, “Beri sara saeppumui sipuoni kele nene!”

⁶² Maimairangan ukkuinia ranounou nia, kasei kaunennia onin togania.

⁶³ Tiddounangan lei si Sakaria, suratnakenangan, “Si Johannes le oninia.” Tenan le kisei ka bagada sangamberida.

⁶⁴ Ka teteret nenda leu et tubukanangan ngangania, samba lilania guluba, panibonangan masiumun Taikamanua.

⁶⁵ Malotorangan sangamberi pabebeakenennia lalep, paareprangan leu sibabara nene ka sangalio Judea.

⁶⁶ Sangamberi sipasiaarep masipaatu ka bagada, kuarangan, “Apa te ibabailiu geti sikolik nene?” Ai le poi ipaalei nia kabei Tuhan.

Pamoilianan Sakaria

⁶⁷ Ia geti sopsopnangan si Sakaria ukkui Johannes Ketsat Sipunenan, pasipoiliatnangan kuanangan,

⁶⁸ “Tuumunake le si Tuhan, Taikamanuan Israel, aibalouan poi bangsania samba aibelaake sia.

⁶⁹ Aiakean ka sita sipaarau simagege, ka punuteteu David, paguguletnia,

⁷⁰ kele siniboinia siburu ka nganganda tai nabinia sipunenan

⁷¹ masibelaake sita ka saggakta samba ka kabeira simalaga baga ka tubuta,

⁷² masipatoila nuntut bagania ka taikebbukatta, samba masirepdep palelengannia sipunenan,

⁷³ ia te suppa sisuppaakenennia kai Abraham taikebbukatta

⁷⁴ isibalaake masibelaake sita ka kabei saggakta, ioi tasuru nia si ta loto,

⁷⁵ ibailiu sita sipunenan samba simaroipo ka matania sanganantat purimanuaiatta.

⁷⁶ Ia geti ekeu kolik, muoni le ekeu nabit Taikamanua Sipulubeunan; musumbulat poi ekeu ka matat Tuhan masipatarek enungannia,

⁷⁷ masipaagai ka bangsania enungan puaragat sipubobongen ka katuappekat joda.

⁷⁸ Kalulut katet samba erut bagania Taikamanuanta, oi nia masiarauake sita, kele ke sulu siputotoro simancep,

⁷⁹ masitoroiji sangamberi sirimanua sikuddu ka gepgep samba iggobiet kamateiat, masipalulu sita ka enungan paabanan.”

⁸⁰ Puuraunangan sikolik, muurau leu ron ketsatnia. Pukuddunangan ka simatangeu, teret iaili teterenia ibelaake tubunia ka matada tai Israel.