Kol. 4 - BUKO SIPUNENAN

¹ Kam tai tuan, galai kam simaroipo samba sipasesese ka sapaguguletmui; nuagai poi kam, ka kam leu ai tuanmui ka sorga.

Panganturat

² Kau numariuriu kam manindou, pumata kam ka bagat nenda samba leu masikua sura.

³ Tiddouake leu kam kai, bule iake Taikamanua ka kai oggak simaeru masipaarep katuareman pagalaiat pakeleat Kristus, kalulut nenda poi aitupenjaraake aku,

⁴ bule ioi kukolouake nia kipa siripokat kuanenku.

⁵ Kau nupuparaboat kam ka bagat sikut paatuat ka matada sipuarat bagei, pakei kam tetere sipulelelek.

⁶ Kau imananam ituarep paninibomui, bui imaleu, bule ioi kipa nualegi kam senen sirimanua.

Pasilepa samba salam

⁷ Sangamberi sibabara ka tubuku ai leu isegeake nia ka kam si Tikhikus, sarainanta kilibet baga, sipugagalai simatopit samba alei pagalaiakenen ka bagat Tuhan.

⁸ Kukoiniake nia ka kam, bule nuagai kam pagalaiat kai, samba bule ipusuibi kam.

⁹ Kukoiniake nia ruada si Onesimus, sarainanta simatopit samba kilibet baga, ia te sibara ka kam. Ai leu rasegeake nia ka kam sangamberi sibabara sene.

¹⁰ Salam ka kam sibara kai Aristarkhus, aleiku sangapenjara, samba sibara kai Markus, buat Barnabas – pagalaiat nia, anusiloan kam patonekat; ke moi nia, silo kam nia –

¹¹ samba sibara kai Jesus, sipuoni Justus. Sarat sia teluda le sibara ka talagada sipususunat sibailiu aleiku sangagalajet ka Purimataat Taikamanua; sia te sibailiu pusuibiat kaku.

¹² Salam ka kam sibara kai Epapras, ia te sara sibara ka talagamui, pagugulet Kristus Jesus, sitaitektek masitiddouake kam, bule imaron puririomui kele sikebbukat samba simasun putotonem baga ka sangamberi obaket Taikamanua.

¹³ Aipoi momoi kumunengake pagalaiat tubunia, bulat sipusasaggo tubu le nia ka pagalaiat kam samba pagalaiat tai Laodikea samba tai Hierapolis.

¹⁴ Salam ka kam sibara kai dokter Lukas kilibet baga samba sibara kai Demas.

¹⁵ Segeake kam salammai ka sasaraina ka Laodikea; samba leu kai Nimfa samba sapaamian ka lalepnia.

¹⁶ Samba ke alepaan tubasaake surat nene ka kam, besiake kam bule itubasaake leu ka paamian Laodikea samba surat ka tai Laodikea tubasaake leu ka kam.

¹⁷ Samba kua kam kai Arkhipus: Pasikeli, bule pasikelat sinilonu ka bagat Tuhan nugalaiake sipulelelek.

¹⁸ Salam sibara kaku, Paulus. Salam nene bulat sinurat kabeiku. Repdep kam palengguiku. Kiliu baga masipaalei kam.