Kol. 3 - BUKO SIPUNENAN

¹ Oto ke atusuruakean kam pasamba Kristus, sibabara ka pata le gaba kam, ka pukudduat Kristus, kai kattoet Taikamanua.

² Sibabara ka patangan le paatu kam, buian sibabara ka polak.

³ Aipoi amateian kam samba purimanuaiatmui atulipputnan pasamba Kristus ka bagat Taikamanua.

⁴ Ke aipatoilaan geti tubunia Kristus ia te purimanuaiatta, kam leu nupatotoila leu kam tubumui pasamba nia ka bagat pulatsanan.

Puririmanua siburu samba sibau

⁵ Oto mateiake kam sangamberi siobat polak ka bagat tubumui, ia te puumunan, pulolinan, pubotbonan, botbot ka sikatai samba leu alau baga (aipoi alau baga makere ka pasibubuluji buluat).

⁶ Sangamberinia nene masibaraake pugolukat Taikamanua ka sirimanua sitaimareddet.

⁷ Siburu kam leu anugalaiakean kam kele nenda ka teteret ai pei le kam muririmanua ka bagania.

⁸ Tapoi kineneiget ribbaiake kam sangamberinia nene ia te: golu, ngoingoi baga, katai, asa samba nganga sikatai sibebela ka ngungumui.

⁹ Buian nupaboko kam pasasambamui, anugolokngan poi kam sirimanua siburu pasamba puparaboanannia,

¹⁰ anupakeian kam sirimanua sibau riuriuakenen tubauake masisese puaagai sipulelelek siripot tularat Sipasibabaraake nia.

¹¹ Ka bagat nene taan anai Grika ele Jahudi, sipususunat ele sitaipususunat, sasareu ele bangsa bagei, pagugulet ele sipuuja, tapoi Kristus-an le sangamberinia samba ka bagat sangamberinia.

¹² Kalulut nene, siripot sipilit Taikamanua, sipuneni samba pukatekietnia baga, pakei kam pukatekat baga, puaanggai, epet paatuat, leppet baga samba om baga.

¹³ Paom kam baga pasasambamui, samba paappe kam jo pasasambamui ke ai sitaipasese sigalai sisara ka sabagei, kele aappeakena kam si Tuhan, kisedda leu nugagalai kam.

¹⁴ Samba ka uddut sangamberi nenda pakei kam nuntut baga, pasiappara sikau musara samba masisutnake.

¹⁵ Samba aban Kristus masipaneinei paatuatmui, kalulut nenda poi aitusogai kam ibailiu sara tubu. Samba kau imasura bagamui.

¹⁶ Kau ikuddu tiboiet Kristus simasun ka bagamui, bailiu ka bagat sangamberi sikut paatuat nupanganturu samba nupaase kam pasasambamui samba sialei urai psalmen, urai pasiumun samba urai puketsanan nusuraki kam Taikamanua ka bagat paatuatmui.

¹⁷ Samba apa apa nugalai kam ka bagat titiboat ele galajet, ka onin Tuhan Jesus le galai kam nia, samba suraki kam Taikamanua Ukkui kalulut nia.

Pagalaiat pueppuat ka puririmanua sibau

¹⁸ Kam tainanalep pusum kam ka taimanteumui, kele simateu kai Tuhan.

¹⁹ Kam taimanteu pununtuki kam baga tainanalepmui, bui nupugoluki kam sia.

²⁰ Kam tatoga, reddet kam saeppumui ka bagat sangamberinia, ia poi obaket bagat Tuhan.

²¹ Kam saukkui, bui nupabesi kam paatuatda tatogamui, mabebele bagada.

²² Kam sapagugulet, ka bagat sangamberinia reddet kam sia tai tuanmui ka polak, bui sarat itcoket kele paalakat baga; ka linat paatuat le kalulut pasikakalotoake si Tuhan.

²³ Aipoi apa nugalai kam, bulat sibara ka paatuat nugalai kam nia kele kai Tuhan, bui kele ka sirimanua.

²⁴ Nuagai poi kam sibara kai Tuhan le nusisilo kam upa ikepmakenenmui. Kai Tuhan Kristus le nupupapagugulet kam.

²⁵ Sipasigagalaiake sitaimaroipo isisilo leu geti siripot taimaroipot sigalainia, ta poi iiggat sirimanua si Tuhan.