Jos. 9 - BUKO SIPUNENAN

Tai Gibeon masipataju si Josua

¹ Katuareman pagalaiat kamamanangdra tai Israel amaliongan katuaremannia pat sege ka sangamberi rimata ka isit kabelekat sulu bagat oinan Jordan – ka simaleleu, ka simatinambu samba ka gattuk sanganantat be'bet Koat Tenga kele reunan leleu Libanon ka isit ka bare'; iate sangamberi rimata Het, Amori, Kanaan, Feris, Hewi samba Jebus.

² Sangamberi rimata nenda ragalai palelengan samba patadde sia bule rasaggangi si Josua samba paamian Israel.

³ Tapoi tai Gibeon sibara ka bangsa Hewi araarepman pagalaiat sigalaiakenen Josua ka tai Jerikho samba ka tai Ai.

⁴ Lepa teuakerangan ragalai masipataju si Josua rakau ka uddut kaliddeira: goni simaburu, samba kudduat anggur simakatai sigalai ka kulit. Samba sibailiu balut, patarekrangan sarat roti simagarak samba aitabbuilukingan.

⁵ Pakeirangan leppei simabibirit samba leu sepatu siburu sibara tappolat.

⁶ Galai putubuatdra kele nenda ei sia masiailiake si Josua ka pusapougat ka Gilgal lepa kuarangan ka tubut Josua samba katubutda tai Israel, “Amoi kai baramai ka laggai simareunan bule tugalai palelengan pasamba kam tai tuan.”

⁷ Tapoi kuarangan tai Israel, “Aponia lulunia kugalai kai palelengan pasamba kam? Kupaatu kudduatmui malegre le sene!”

⁸ Kuarangan, “Koba kai masigalaiake apa siparentaakenen Tuan.” Rere'nangan sia si Josua, “Kasei kam nene? Samba kaipa laggai kabaraiatmui?”

⁹ Alegirangannia, “Amoi kai baramai ka laggai simakope reunan, Tuan, kalulut akuarep kai pagalaiat Tuhan Taikamanua panindogietmui. Akuarep kai pagalaiat sangamberi sigalaiakenenNia ka Misir,

¹⁰ samba pagalaiat apa sigalaiakenenNia ka tubut rua rimata Amori ka isit kabelaiat sulu Jordan, iate Sihon rimata Hesybon samba leu Og rimata Basan sikuddu ka Asytarot.

¹¹ Arakoiniake kai sangamberidra saute' samba sangamberi sikuddu ka laggaimai masipatarek balut bule kuoi kai sene masiailiake kam, masipatoila reddetmai ka kam, kalulut nenda kutiddou kai aggai bagamui bule tubaraake palelenganta.

¹² Itco pei kam, balutmai roti nene. Ka teteret akutuitui kai, roti nene maoloi peile. Tapoi kineneiget, itco pei kam! Amagarakngan samba aitabbuilukingan.

¹³ Samba sangamberi kudduat anggur nene mabau peile ka teteret akukau kai ka bagania; tapoi kineneiget, itco pei kam! Amabiritnan. Bibiletmai samba kasumai leu et amakataian kalulut reunannia puenungananmai.”

¹⁴ Iageti alarangan goiso tai Israel komenda tai Gibeon nenda, samba ta ararere'ake kai Tuhan pagalaiat komenda.

¹⁵ Galainangan palelengan pasuruangan si Josua ka tai Gibeon, samba ikau palelengan bule ta imateiake sia. Saute paamian Israel leu et musuppa bule ragalaiake palelengan nenda.

¹⁶ Tapoi kele aitusabau telu ngagogoi lepat aragalai palelengan nenda, tai Israel amoian raailiake laggai Gibeon, Kefira, Beerot samba Kiryat-Jearim ka kupkumen laggaira tai Gibeon nenda.

¹⁷ Oto iapeite ai maagai kudduadra ta mareunannia ka Gilgal.

¹⁸ Tapoi tai Israel ta'momoi ramateiake sia, kalulut amusuppangan saute'ra tai Israel katubutda ka onin Tuhan Taikamanuan Israel. Sangamberi paamian Israel masingunyuki pagalaiat nenda katubutda sia saute'ra.

¹⁹ Tapoi alegirangannia saute'ra, “Kipa poi tagagalai! Apalelekngan kai katubutda pasamba musuppa ka onin Tuhan Taikamnuan Israel. Kineneiget ta momoi tagalai katai ka tubura.

²⁰ Ta' momoi tamateiake sia kalulut atagalaian palelengan; samba ke' tapasabau palelengan nenda ukumnangan sita Taikamanua.

²¹ Oto, obaakean le kam rapurimanua, tapoi sangamberita tabailiuake kam sia sipokpok loina samba sipasibabairat oinanta sangamberitta.” Kisedda te sikuatda sia saute nenda.

²² Iageti sogairangan tai Gibeon nenda raei kai Josua. Kuanangan si Josua, “Angoi anupataju kam kai samba nukua kam bulat mareunan laggaimui, oto malegre le sene!

²³ Kalulut anugalaiake poi kam kisene, Taikamanua masiukum kam. Bangsamui ibailiu le pagugulet, sipasipopokpok loina samba sipasibabairat oinan ka Uman Taikamanuangku.”

²⁴ Alegirangania, “Akugalaiake kai kele nene kalulut akuarep poi kai Tuhan Taikamanua panindogietmui nenda aikoiniakean si Mose paguguletNia nenda, iake ka tubutmui sangaliot tobbo laggai nene samba masipamatei sangamberi sipulalaggai ka teteret nuala kam polak nene. Bulat makope lotomai ke numateiake kam kai, nenda te lulunia akugalaiake kai kele kisene.

²⁵ Kineneiget ai kai ka bagat kupkumen Tuan. Galaiake ka tubumai siripokat simaeru addeakenen Tuan.”

²⁶ Oto nene te aigalaiake si Josua: ipasikeli le sia samba ta'iobaake ramateiake sia tai Israel.

²⁷ Tapoi ibailiuake le sia pagugulet – iate sipasipopokpok loina samba sipasibabairat oinandra tai Israel samba kaunen ka kudduat pasibuluat Tuhan. Teret kineneiget aipeile sia masigalaiake galajetda nenda ka kudduat sipilit Tuhan ibailiu kudduat parurukatdra.