Jos. 8 - BUKO SIPUNENAN

Raoppu samba rapakatai laggai Ai

¹ Kuanangan si Tuhan kai Josua “Ruruake sangamberi saladrum, samba kenan kam simakere ka laggai Ai. Bui' numasedde samba numaloto! Kuaake te ka tubum kamanangan nusaggangi rimata laggai Ai. Sakalaggaijatnia, laggainia, samba tobbou laggainia te nuooppu.

² Bui' ta nugalaiake ka laggai Ai samba rimatania kele sigalaiakenennu ka Jerikho samba rimatania siboiki. Tapoi ka bagat nene sangamberi pukaioatnia samba tarimeunia momoi nuala kamnia ibailiu bakkatmui. Kau numatarek kam masisaggangi laggai nenda sige'ge baramui ka teitei.”

³ Iageti patareknangan tubunia si Josua iei ka Ai sambadra sangamberi saladrunia. Pilinangan telu pulu ribu sia saladdu simagege, lepa koiniakenangan sia teteret sinoibo,

⁴ samba kaunangan parenta katubutda, kise: “Pulipput kam ka teitei laggai nenda, tapoi bui makope reunan; samba kau matarek tubumui pasaggak.

⁵ Aku samba sia sangamberidra sikuddu katubukku kulegreake kai tubumai ka laggai nenda. Ke abelangan bai tai Ai masisaggangi kai, Soksokngakemaian tubumai kutuitui kai pabalau kele siboiki.

⁶ Oto kukrurangan kai pat mareunannangan ka laggai nenda, samba rakua te bulat mutuitui le kugagalai kai kele siboiki.

⁷ Ka teteret nenda te bui ta bela kam ka kudduat pulippunanmui, samba oppumuian laggai nenda. Samba akenangannia ka tubumui Tuhan Taikamanuamui.

⁸ Ke' anuoppungan kam laggai nenda, labomuian laggai nenda, siripot siparentaakenen Tuhan. Nenda te galaiakenenmui.”

⁹ Lepa geti koiniakenangan sia si Josua, samba ei sia mulipput ka isit kabelekat sulu Ai oggaknia Ai samba Betel, lepa ngena sedda. Tapoi si Josua mugogoi ka pusapougadra paamian Israel.

¹⁰ Mamancep peile tusurunangan si Josua samba masiparentaake saladrunia bule raparuru'. Iageti si Josua samba sia saute' paamian Israel masiabbit saladru ka Ai.

¹¹ Si Josua samba saladdu nenda ei sia simakere ka ipot matatbaliu gugurukat siboiki laggai Ai, lepa pusapourangan isit ka bare', sibara sara guluggu paoggangandra samba laggai Ai.

¹² Lima ngaribu sia igidra sikoiniakennia mulipput ka isit kabelekat sulu laggai nenda, oggak Ai samba Betel.

¹³ Oto, patunan saladru sipasasaggak nenda kele kisene: kudduatdra saladru isit ka bare' laggai nenda, samba saladru sabagei isit kabelekat sulu, oto ka sia si Josua mei ka guluggu ka soibo nenda.

¹⁴ Kele aiitco rimata Ai saladdut Josua, olaakerangan rabela raei ka guluggut Jordan bule rasaggangi tai Israel ka kudduat siboiki. Ta' iagai kababaradra sisaggangi sia sipulilipput ka teitei laggaira.

¹⁵ Si Josua samba sangamberi tai Israel galairangan kele mutuitui le ragagalai; pabalaurangan masiailiake su'su simagarak.

¹⁶ Sangamberi taimanteu ka laggai Ai tukau sia masikukru si Josua samba saladrunia. Oto kukururangan si Josua bailiu mareunandrangan ka laggaira.

¹⁷ Sangamberi sirimanua ka Ai bela sia masikukru tai Israel, bailiu tubukanangan laggai nenda, ta anai sijagonia.

¹⁸ Lepa kuanangan si Tuhan kai Josua, “Akkatnake simuine bakkatnu samba totoiake ka ipot Ai; laggai nenda kusegeake kineneiget ka tubum.” Galaiakenangan si Josua parentat Tuhan nenda.

¹⁹ Kele aitotoiake kabeinia si Josua, saladru sipulilipput nenda olaakerangan tusuru samba saggangirangan laggai nenda, iageti oppurangannia. Riuriuakerangan masilabo laggai nenda.

²⁰ Sangamberi tai Ai masipitca ka teitei, itcorangan kujuk siali ka manua.

²¹ Si Josua samba saladrunia leu et masiitco kujuk samba agairangannia saladdu sipulilipput nenda araoppungan laggai nenda. Oto, soksoknangannia si Josua samba saladrunia mateiakerangan tai Ai.

²² Tai Israel sikudduiji laggai Ai nenda leu et oi sia samba pasambadrangan le pasaggak, bailiu goilikdrangan tai Ai samba ta'an momoi ratuituiake tubudra. Ta'anai berisara sia sibebela, sangamberidra mateiakerangan sia tai Israel,

²³ sarat rimatadra tai Ai le ta aramateiake. Labarangannia lepa ambitdrangannia kai Josua.

²⁴ Kele arasappru saladdudra tai saggak aratamateiake sia saladdu Israel sikukru sia ka su'su simagarak, toili sia minca ka Ai, samba mateiakerangan sangamberi sirimanua sedda.

²⁵ Igitda sia simamatei ka gogoi nenda, tamanatai samba tainanalep ai sia pulu rua sia, sangamberitda tai Ai.

²⁶ Samba si Josua ta'aitiktik kabeinia siitotoi simuine bakkat nenda, ke' ta' pei imateiake sangamberi sipulalaggai Ai.

²⁷ Tarimeu samba bibilet sialara ka laggai nenda, ambitrangannia tai Israel ibailiu bakkatdra, siripot sikuat Tuhan ka tubut Josua.

²⁸ Labonangan laggai Ai si Josua, samba obaakenangannia ibailiu karaganan teret gogoi nene.

²⁹ Rimatat laggai nenda toakakerangannia ka arigi, samba obaakerangannia sedda teret kasoibokat. Kele aibele sulu, koiniakenangan sia si Josua masiala tubut rimata simamatei nenda samba ribbaiakerangannia ka gugurukat laggai. Lepa geti kudduat nenda labburangannia pasamba bukku simigi. Sangamberi bukku nenda ai peile sedda teret kineneiget.

Surukat Tuhan tubasaake ka leleu Ebal

³⁰ Lepa geti galainangan sara kudduat pasibuluat ka leleu Ebal si Josua addeat Tuhan, Taikamanuan Israel.

³¹ Kudduat pasibuluat nenda aigalainia siripokat sikua ka bukot Mose, pagugulet Tuhan, katubutda tai Israel: “Sara kudduat pasibuluat sibara ka bukku ainangan ta'pei iorak itugalai pasamba pugalai laba.” Ka uddut kudduat pasibuluat nenda tai Israel rapanguruatnake ka tubut Tuhan; buluakenen rarangen samba leu et buluakenen paabanandra.

³² Sedda te, ai raiitco sia tai Israel, suratnakenangan ka bukku kudduat pasibuluat nenda si Josua tiboiet surukat Tuhan sibara ka bukot Mose.

³³ Tai Israel, pasamba saute', tai utet saladdu sangamberi tai sipasiukum samba leu et sirimanua siooiake sikuddu ka talagadra, murio ka rua sila'nia Peti Pakerekat baga Tuhan masimatai sia tai imam Lewi sipasibabairat Peti Pakerekat baga nenda. Iletalaga sibara ka sirimanua nenda masimatai ka leleu Gerizim, samba iletalaga minca masimatai ka leleu Ebal. Pagugulet Tuhan si Mose nenda, ai parentaakean bule ragalaiake kele nenda ke ai ailingan teterenia rasilo panukanan sipalelekngakenen Tuhan.

³⁴ Lepa basaakenangannia sabeu nganga si Josua sangamberi surukat siripot situsurat ka bagat buko surukat, samba leu et panukanan samba pateleiat.

³⁵ Senen parentat Mose basanangannia si Josua katubutda sangamberi paamian Israel siparururu' sedda, samba sia leu tainanalep, tatoga samba sirimanua siooiake sikuddu ka talagadra.