Jos. 7 - BUKO SIPUNENAN

Si Akhan masigalai jo

¹ Aiparentaakean ka tubut paamian Israel si Tuhan ka sangamberi sibabara ka laggai Jerikho bulat pakataiket, berisara ta momoi tuala. Tapoi parenta nenda ta'ara reddet. Sara sirimanua simanteu sipuoni Akhan masipasabau parenta nenda, bailiu pugolunangan simakope katubut paamian Israel si Tuhan. (Ukkui Akhan oninia Karmi samba sibuania simanteu sipuoni Zabdi sibara ka muntogat Zerah ka suku Jehuda.)

² Ka teteret nenda si Josua masikoiniake piga pa sia sibara ka Jerikho ka Ai, iate sara laggai isit kabelaiat sulu Betel, legret Bet-Awen. Galaiakenenda iate masilelekngake laggai nenda. Kele ailepa ragalaiake galajedra nenda,

³ toili sia samba segeakerangannia ka tubut Josua. Kuarangan, “Ta' leu sangamberitta memei masisaggangi laggai Ai. Kauan le ele rua ele telu ngaribu sirimanua. Buian leu tukau sangamberi saladru sedda saggak, kalulut magoiso le laggai nenda.”

⁴ Oto sieei masisaggangi laggai nenda telu ngaribu sia le, tapoi arakalaake le sia.

⁵ Kukrurangan sia tai Ai barania ka gugurukat laggai Ai pat aili ka Syebarim, lepa mateiakerangan telu pulu enem sirimanua sibara ka talagdra ka gilak tinambu. Iageti bara karat baga samba loto'ra tai Israel.

⁶ Mareureunangan bagat Josua samba saute ka paamian Israel bailiu pabiritrangan leppeira, samba sanganantat gogoi pat soibo murekkuk sia manindou ka matat Peti Pakerekat baga Tuhan kaurangan abu ka ute'ra sibailiu toggaiat pureureugat bagadra.

⁷ Kuanangan si Josua kai Tuhan, “Oi Taikamanua Tuhan ku! Apa le lulunia nuambit kai ka silat Jordan nene? Taleu pa masisegeake kai le katubutda tai Amori? Bule kumatei kai? Maeru peile kukuddu kai sedda, ka silat Jordan!

⁸ Oi Tuhan! Arasoksokngan tai Israel kalulut arakalaake sia tai saggak. Kineneiget apangan le bulat kuanenku?

⁹ Tai Kanaan samba sangamberi sirimanua sabagei ka laggai nene masiarep pagalaiat sipuaaili nenda. Goilikrangan kai samba mateiakerangan kai sangamberimai! Iageti apangan le Nugagalaiake masiparon pubebeunanNu?”

¹⁰ Aleginangan si Tuhan, “Suruake ekeu! Ta' anai lulunia nupurekkuk ka polak manindou kele kisedda!

¹¹ Aragalaian jo tai Israel. Aku kauan parenta bule rareddet palelenganmai, tapoi arapasabau le! Bibilet siriponia tupakakatai tapoi araala le. Aranangkou samba aralipputnake rapagalunia ka bibiletdra bule ta imaagai.

¹² Iate lulunia ta'amoi ragalai tubudra rasaggangi tai saggak. Kalaakerangan sia tai saggak kalulut atuteuakean ukuman bule tusubuake sia. Ta'an Kupaalei kam minca, ke ta'pei nupakatai kam sangamberi bibilet keraet nenda.

¹³ Kineneiget suruake ekeu, Josua! Palina paamian Israel samba koiniake sia ramatarek raoi manindou ka tubukKu. Parentaakenungan sia bule ramatarek mansep, kalulut Aku Tuhan Taikamanua Israel ai kuanenKu: “Ale kam tai Israel! Sangamberi bibilet siparentaakenenKu pakataiketmui, sangarubeiat ai ka tubumui. Ke ta'pei nuribbaiake kam bibilet nenda, ta'momoi nugalai kam tubumui nusaggangi kam tai saggak!”

¹⁴ Kalulut nenda, Josua, paagai katubutda aipoi mansep simanseman turere' te sia senen suku. Ke' Kusau'sau sara suku, sangamberi muntogat ka bagat suku nenda bui ta mei ka mata senen muntogat. Samba i ke' Kusau'sau sangamuntogat, senen sirimanua ka bagat muntogat nenda bui ta moi ka mata pasasara.

¹⁵ Iageti kasei tusese sipasikokoiriake bibilet keraet nenda bui' ta tulaboakenia pasamba muntogatnia samba sangamberi sibabara ka tubunia; kalulut nia le amasipasabau palelengan samba sigalaiake pukakatai sabeu ka talagat paamian Israel.”

¹⁶ Mancepnia le, bulat simancep, koiniakenangan paamian Israel si Josua raei ka mata, senen suku, iageti aiorak iate suku Jehuda.

¹⁷ Iageti koiniakenangan suku Jehuda si Josua raei ka mata, pasangamuntogat, samba oraknangan muntogat Zerah. Iageti koiniakenangan raei ka mata muntogat Zerah, pasasangalalep, samba sangalalep Zabdi aiorak.

¹⁸ Lepa nenda koiniakenangan sangalalepnia si Zabdi si Josua raei ka mata, pasasara; iageti si Akhan, togat Karmi, punuteteu Zabdi aiorak.

¹⁹ Kuanangan si Josua ka tubut Akhan, “Bogai, seseakean le samba kuangan le bulat sibulatnia sene ka matat Tuhan, Taikamanuan Israel, aponia anugalai. Kuangan le katubukku, bui' nupakelenia.”

²⁰ Kuanangan si Akhan, “Bulatnia,” Aku galaian jo ka tubut Tuhan, Taikamanuan Israel. Nene te sigalaiakenenku:

²¹ Ka talagat sangamberi bibilet siopputta, akuitco sara leppei juba simakope lainge, sigalai ka Babilonia, ia leu et perak rua ngakilo, samba sangate'te mas sitenga kilo legei. Bulat koba' le bibilet nenda, oto alakungannia samba lipputnakekungannia ka bagat polak ka sapouku; peraknia ai bulat ka tei.”

²² Iageti koiniakenangan sia si Josua raei simaruei ka sapou Akhan. Bulatnia bibilet keraet nenda sangamberinia ai sedda, ailipputnake ka bagat polak, samba peraknia ai bulat ka tei.

²³ Alarangan bibilet nenda samba ambitrangannia kai Josua samba ka sangamberi tai Israel. Lepa geti galakngakerangan bibilet nenda ka matat Tuhan.

²⁴ Iageti si Josua pasamba sangamberi paamian Israel masilaba si Akhan, samba ambitrangannia ka Guluggu Pangoringan pasamba sangamberi tatogania, tarimeu jaui, kalidei, biribiri, sapou samba sangamberi sibabara pukaioatnia samba leu perak, juba samba mas sinangkounia.

²⁵ Iageti kuanangan si Josua kai Akhan, “Angoian le anubaraake pangoringanta? Kineneiget iake pangoringan ka tubum si Tuhan!” Iageti si Akhan pasamba sangalalepnia baijukrangan sia bukku sangamberi tai Israel pat matei. Sangamberi pukaioatnia, samba leu et bibilet sinangkounia laborangannia pat sappru.

²⁶ Kele ailepa nenda labburangan kudduat nenda rakau bukku simakope igi teret gogoi nene ai peile bukku sedda. Iate te lulunia kudduat nenda ai peile tuoniake Guluggu Pangoringan. Iageti malebaknangan golunia si Tuhan.