Jos. 6 - BUKO SIPUNENAN

Kabebelenia laggai Jerikho

¹ Ka laggai Jerikho sangamberi matat baliu gugurukat arajagongan samba arapatpatnakean simaron bule ta'ioi ratuguru' tai Israel. Ta'anai sia sara sirimanua momoi tuguru' ele bela ka laggai nenda.

² Kuanagan si Tuhan ka tubut Josua, “Kineneiget Akuakean ka tubum laggai Jerikho pasamba rimatania samba sangamberi saladrunia simagege nenda.

³ Ekeu samba saladrum bui ta mubaris masibokko laggai nenda sangaminca sangagogoi ujunia enem ngagogoi.

⁴ Pitu tai imam, senendra masiambit trompet, buita muenung ka matat Peti Pakerekat baga. Ka gogoi sikapitu, ekeu samba saladrum bui ta masibokko laggai nenda pitu ngaminca ai leu sia tai imam masipiau trompetnia.

⁵ Lepa geti tai imam nenda buita masipiau trompetnia ipunau simaata. Ke' anuarepman kam ipunau simaata, sangamberi tai saladru buita mugerei sabeu nganga, iageti bukku irip laggai nenda magatcanangan. Lepa gurukimuian laggai nenda.”

⁶ Iageti sogainangan tai imam si Josua, samba kuanangan, “Bairat kam Peti Pakerekat baga nenda; pitu sia sibara ka talagamui bui ta muenung ka mata aileu raambit trompet.”

⁷ Lepa koiniakenangan si Josua tai saladru mubaris masibokko laggai nenda, amuboikian sia barisan sipasijago ka mata sipuenung masisaliu Peti Pakerekat Bagat Tuhan.

⁸ Siripokat parentat Josua, tuitui sia barisan sipasijago ka mata masisabau tai imam sipasipipiau trompet, tutrangan sia tai imam sipasibabairat Peti Pakerekat baga,

⁹ lepa geti ka pangampulat sia barisan sipasijago ka teitei. Ai sia mueenung bui ta mariuriu ranauake trompet.

¹⁰ Sangamberidra bangsa nenda atuparentaakean bule ta rapugerei samba ta masikua beri sanga tako nganga ke' ta'pei iteuake si Josua.

¹¹ Kise te aikoiniake sia si Josua tai saladrunia masiambit Peti Pakerekat baga masibokko laggai nenda sangaminca, lepa geti toili ka pusapougat, mugogoi sedda.

¹² Kele aimapato, masggeipeile suru si Josua, lepa akkatakerangan tai imam peti pakerekat bagat Tuhan.

¹³ Iageti puenungrangan sipitu tai imam, sipasiaambit siputu pipiau ban biribiri nenda ka matat peti pakerekat bagat Tuhan, ai sia muenung uluprangan pipiau nenda, sia sibara pamatei muenung kamatatda samba mungkuat sikateitei masitut peti pakerekat bagat Tuhan, samba pipiau meriuriu le ranauakenia.

¹⁴ Ka gogoi sikaruania nenda rabokko laggai sangaminca lepa geti toili sia ka pusapougat. Kasedda te galajetdra senen gogoi burunia enem ngagogoi.

¹⁵ Ka gogoi sikapitunia mamancep peile iapei itatadda ibela sulu tusururangan, samba masibokko laggai Jerikho pitu ngaminca.

¹⁶ Sikapitu ngamincania, kele arapiau trompet tai imam, kaunangan patuaggaijat ka sangamberi tai saladru si Josua, bule rapugerei. Kuanangan si Josua, “Aiakean laggai nene si Tuhan ka tubumui!

¹⁷ Sangaliot laggai pasamba sangamberi ka bagania bui ta tupakei sangamberinia sibailiu panguruat kai Tuhan. Sarat si Rahab, sinanalep simaolop tubu nenda pasamba sangamberi saeppunia le momoi tuobaake murimanua, kalulut airomake sipasitataiko.

¹⁸ Ta'momoi tuala berisara apapa sibara ka sangamberi pakataiket. Ke' ai nuala kam, pusapougat Israel te iorak pugejaat baga samba kamateiat.

¹⁹ Sangamberi bibilet perak, mas, tembaga samba laba' bui ta tukokoiake kai Tuhan samba tukokoiake ka baga ka kudduat pasikoirikat bibilet bakkat Tuhan.”

²⁰ Lepa piaurangan trompet tai imam. Samba kele araarepnia tai Israel nau trompet nenda, pugereirangan simaron, iageti bukku irip laggai Jerikho maragatanangan sangamberi saladru Israel tusakairangan, samba gurukirangan laggai nenda oppurangannia.

²¹ Sangamberi ka bagat laggai nenda, simabaja' sibau tubu, taimanteu tainanalep, pamateirangan sia lanjau. Sangamberi tarimeu jaui, biribiri samba kalidei ia leu et mateiake.

²² Kuanangan si Josua ka si rua sipasitataiko, “Kenan kam ka lalep sinanalep simolop tubu nenda, samba ambitmuiannia ka gerat pasamba sangamberi saeppunia kele sipalelekmui ka tubunia.”

²³ Iageti ei sia ruadda sipasitataiko nenda, samba ambinrangan si Rahab ka gerat pasamba ukkui inania, sangamberi sasarainania, samba saeppunia sabagei. Sangamberi saepput Rahab nenda pasamba paguguletnia ambit ka gerat ka kudduat simaaman legret pusapougatdra tai Israel.

²⁴ Lepa geti saladru Israel laborangan itata sangaliot laggai nenda pasamba sangamberi sibabara ka bagania, sarat bibilet mas, perak, tembaga samba laba' ta'ara labo. Bibilet nenda araala' le samba raambit ka kudduat pasikoirikat pukaioat bakkat Tuhan.

²⁵ Tapoi si Rahab sinanalep simaolop tubu nenda pasamba sangamberi saeppunia aiobaake rapurimanua si Josua, kalulut airomakean rua sia sipasitataiko sikoiniakenen Josua ka Jerikho. (Teret gogoi nene muntogat Rahab ai pei le sia ka Israel.)

²⁶ Ka teteret nenda pusuppanangan si Josua, “Kasei masibesiake masigalai minca laggai Jerikho nene, ioorak te geti pateleiat Tuhan. Kasei masigalakngake bongen laggai nene tata' le togania sikebbukat, samba kasei supasikakau matat baliu gugurukat tata' te geti togania sisuleket.”

²⁷ Si Tuhan masipaalei si Josua, samba onin Josua ibailiu maagai ka sangaliot tobbou laggai nenda.