Jos. 5 - BUKO SIPUNENAN

¹ Sangamberi rimatadra tai Amori ka isit kabelekat sulu bagat oinan Jordan, samba sangamberi rimatadra tai Kanaan ka be'bet Koat Tenga masiarep aigarakngake bagat oinan Jordan si Tuhan ka burut aratalipoki bagat oinan nenda. Oto bailiu malotorangan samba mugeret tubu kalulut tai Israel.

Pasisunatan ka Gilgal

² Ka teteret nenda kuanangan si Tuhan kai Josua, “Galai pisau sibara ka bukku, lepa baraakenungan minca pasisunatan ka tai Israel.”

³ Iageti galaiakenangan si Josua parentat Tuhan, samba sunatnangan tai Israel ka kudduat sioniakenen Leleu Pasisunatan.

⁴ Nene te lulunia aisunat sia si Josua: sangamberi sirimanua sibebela ka Misir, iate taimanteu, sangamberi saladdu, amateian sia ka talagat enunggan ka simatangeu, lepat arabela ka Misir.

⁵ Kalulut, sangamberi sirimanua sibebela ka laggai Misir atusunatan sia, tapoi siputututumata ka mkudduat simatangeu kabagat puenunganan barania arabela ka laggai Misir, tapei atusuat.

⁶ Kalulut epat pulungarura burunia tai Israel arapuenung ka kudduat simatangeu, pat sappru ramatei sangamberi bangsa nenda, iate tentera sibebela ka Misir, sitaipasiaarep tiboiet Tuhan. Amusuppangan si Tuhan katubutda, ta'iobaake sia raitco laggai sipalelekngakenen Tuhan pasamba suppa ka taikebbukatda akenennia katubutta, sara laggai sipususukra susu samba suat mani.

⁷ Iate lulunia sangamberi tatoga tai manteu ta'pei atusunat sia. Sipuurau sibau nene le isusunat si Josua.

⁸ Kele aitukapplu aitusunat sangamberidra, kuddu sia ka pusapougat teret imale mauju'ra.

⁹ Kuanangan si Tuhan ka tubut Josua, “Gogoi nene te Kutata'ake paloloiat ka tubumui sibailiu paoreijat ka sangamberimui ka Misir.” Iate lulunia kudduat nenda tuoniake Gilgal teret kineneiget.

¹⁰ Ta'pei amauju arapusapou ka Gilgal su'sut leleu simalegre ka Jerikho, paamian Israel pupunenrangan Paskah kasoibokat gogoi sikapulu epat laggo nenda.

¹¹ Ka pato'nia, iate bulat siboiki rakom komen sibabara ka laggai Kanaan, iate: roti sita'anai ragi samba gandum sirarak.

¹² Ka gogoi nenda leu et manna ta'an abele minca sibara ka manua, samba tai Israel muari mukom manna. Barania tetere nenda komrangan buat siureman ka laggai Kanaan.

Josua samba sara simanteu sibara pamatei lanjau

¹³ Ka sara tetere ai si Josua kalegret Jerikho. Sinulut itconangan sara simanteu murio ka matania sibara lanjau situgogolok. Legreakenangan tubunia si Josua ka sirimanua nenda, samba rere'nangania, “Ekeu nene alei ele saggak?”

¹⁴ Aleginangan sirimanua nenda, “Ta' alei samba leu et ta saggak.” Aku oi sene sibailiu ute' saladru Tuhan.” Masiarep nenda purekkuknangan si Josua isembah sirimanua nenda. Kuanangan si Josua, “Aku nene pagugulet Tuhan. Apa sioi kugalaiake kekeu Tuan?”

¹⁵ Aleginangan ute' saladru Tuhan nenda, “Buka sepatum; polak puriokatnu nenda iate polak sipunenan.” Iageti bukanangan sepatunia si Josua.