Jos. 4 - BUKO SIPUNENAN

Pasiriokat pulu rua bukku pasirepdeman

¹ Kele sangamberi bangsa Israel nenda aian sia ka sila', kuanangan kamatat Josua si Tuhan,

² “Pili le pulu rua sirimanua, sara sia senen suku.

³ Parentaakenangan sia bule raala bukku pulu rua ka talagat bagat oinan Jordan ipot ka puriokatdra sia tai imam. Sangamberidra masibairat bukku nenda pat aili ka kudduat pusapougatmui ka teteret imasoibo geti.”

⁴ Iageti sogainangan sipulu rua sirimanua sipili nenda si Josua,

⁵ lepa kuanangan, “Kenan kam ka tengan bagat oinan Jordan, ka matat Peti Pakerekat bagat Tuhan Taikamanuamui. Sene-senemui masiakkatnake pasasara bukku sibara sedda taddenia pulu rua bukku siripot taddet suku ka bangsa Israel.

⁶ Sangamberi bukku nene iate sibailiu repdemendra bangsa nene ka sigalaiakenen Tuhan. Ka gogoi sibabara ke' rarere' tatogamui apa katukolobatnia sangamberi bukku nene kakam,

⁷ kau nukolouake kamnia katubutda oinan bagat oinan Jordan aipetpet ka teteret aituabbit Peti Pakerekat bagat Tuhan masitalipoki bagat oinan nenda. Sangamberi bukku nenda ibailiunia le nia repdemendra bangsa Israel aponia sipuaaili sene.”

⁸ Si pulu rua sirimanua nenda leu et galaiakerangan parentat Josua. Siripot sikuat Tuhan ka tubut Josua, ala'rangan pulu rua bukku sibara ka bagat oinan Jordan taddeania siripot taddet suku ka bangsa Israel lepa ambitrangannia ka kudduat pusapougatdra.

⁹ Ka tengan bagat oinan Jordan nenda leu et, pagalaknangan pulu rua bukku si Josua ipot sipurio'ra tai imam sipasibabairat Peti Pakerekat baga nenda. “Bukku nenda ai peile teret kineneiget.

¹⁰ Sia tai imam riuriu murio' ka tengan bagat oinan Jordan teret lepa ragalaiake sangamberi siparentaakenen Tuhan katubutda sisegeakenennia ka tubut Josua. Nenda siripot enungan sikuat Mose ka tubut Josua. Oto talipokirangan bagat oinan Jordan nenda simaola.

¹¹ Kele arasege sangamberidra ka sila' sia tai imam sipasibabairat Peti Pakerekat nenda muenung ka matadda.

¹² Siripot siparentaakenen Mose, sangamberi saladdu sibara ka suku Ruben, Gad samba iletalaga sibara ka suku Manasye, amuboikian sia masitalipoki bagat oinan.

¹³ Sangamberidra epat pulu ribu sia sarat taimanteu sibara pamatei samba simatarek pasaggak ka matat Tuhan, putaliporangan masiailiake su'su ka legret Jerikho.

¹⁴ Ka gogoi nenda te aiabeuake onin Josua si Tuhan ka matadra sangamberi paamian Israel. Ka burut purimanuaiatnia rasuru' le nia kele rasuru' si Mose.

¹⁵ Lepa geti koiniakenangan si Josua si Tuhan

¹⁶ masiparentaake sia tai imam sipasibabairat Peti Pakerekat baga nenda bule rabela ka bagat oinan Jordan.

¹⁷ Si Josua masigalaiake apa siparentaakenen Tuhan ka tubunia.

¹⁸ Kele arasege tai imam ka be'bet bagat oinan, puguruknangan minca oinan nenda kele siboiki.

¹⁹ Arasege paamian Israel ka silat bagat oinan Jordan ka tanggal pulu laggo siboiki, samba pusapourangan ka Gilgal isit kabelaiat sulu Jerikho.

²⁰ Sedda te aipagalak si Josua pulu rua bukku siala' ka bagat oinan Jordan.

²¹ Lepa kuanangan si Josua katubutda pamian Israel, “Ka gogoi sibabara ke' rarere' kam tatogamui apa katukolobat ka sangamberi bukku nene,

²² kolouake le kam katubutda, kise: paamian Israe masitalipoki bagat oinan Jordan nene ka uddut polak simagarak.

²³ Tiboi kam katubutda aigarakngake si Tuhan Taikamanuamui bagat oinan Jordan nenda bule ioi nuputalipo kam, kele aigarakngake Koat Tiberau ka matatta,

²⁴ bule sangamberi sirimanua ka polak masiagai bulat makope gege si Tuhan. Samba kele kisedda surumuian Tuhan Taikamanuamui teret buru-buru.”