Jos. 3 - BUKO SIPUNENAN

Paamian Israel masitalipoki bagat oinan Jordan

¹ Ka mansepnia, mamansep peile suru si Josua samba sangamberi paamian Israel, lepa kaddiuakerangan pusapougatdra ka Sitim, samba ei sia ka bagat oinan Jordan. Pusapourangan sedda pangenaan teterenia raputalipo.

² Kele aitusabau telu ngagogoi, sia saute' masibokko sangalio pusapougat,

³ samba masikau parenta nene ka paamian Israel, “Ke' nuinco kam tai imam rabairat Peti Pakerekat Baga Tuhan Taikamanuamui, putuituimuian leu et nukaddiuake kam pusapougat nene. Tut kam Peti nenda,

⁴ tapoi bui makope leggremui ka peti nenda; tut kam ka teiteinia reunannia sangakoli meter, bule nuagai kam enungan ailiakenenmui, kalulut ta'pei nuagai enungan ka laggai nene.”

⁵ Kuanangan ka paamian Israel si Josua, “Kau nupalina kam tubumui, kalulut mancep igagalaiake kiseiet si Tuhan ka talagamui.

⁶ Lepa geti masiparentaake tai imam si Josua bule raakkatnake Peti Pakerekat Baga lepa tuitui sia rapuboiki ka paamian Israel. Galaiakerangan leu kele siparentaakenen Josua.

⁷ Kuanangan ka tubut Josua si Tuhan, “Barania gogoi nene Kubailiuake ekeu siabeu tiboi tubu bailiunangan sangamberi paamian Israel masisuru ekeu samba bule raagai Aku masipaalei ekeu kele Kupaalei si Mose.

⁸ Kineneiget parentaake sia tai imam sibairat Peti Pakerekat baga nenda bule sege'ra le ka bagat oinan, ei sia ka bagat oinan nenda samba puriorangan ka oinan nenda.”

⁹ Lepa sogainangan tai Israel si Josua, samba kuanangan, “Konan arep kam apa siparentaakenen Tuhan Taikamanuamui ka tubumui.

¹⁰ Kuangan minca si Josua: Barania kapagalaiat nene te' geti nuagaikamnia, Taikamanua sipuririmanua ai ka talagamui samba bulat sibulatnia Ialou geti tai Kanaan, tai Het, tai Hewi, tai Feris, tai Gergasi, tai Amori samba tai Jebus nenda sibara ka iponu:

¹¹ bulatnia Peti Pakerekat baga Tuhan Sebaot polak muenung mutalipo ka iponu, tuguru ka bagat oinan Jordan.

¹² Oto kineneiget, pili kam pulurua sirimanua sibara ka suku Israel, sara sirimanua ka senen suku.

¹³ Ke reretda tai imam sipasiakkatake peti pakerekat bagat Tuhan, Sebaot, muari kabagat oinan Jordan, oto matakkinangan geti oinan ka bagat oinan Jordan; puarinangan leu ipuguruk oinan sibara ka tirik bailiunangannia pangengkre.”

¹⁴ Kateteret aratuitui bangsa nenda baratda ka pusapougatda raei masitalipoki bagat oinan Jordan, tai imam sipasiakkatake peti pakerekat baga nenda muenung kamatat bangsa nenda.

¹⁵ Kele arasege sipasiakkatake peti nenda kabagat oinan Jordan, samba soneakerangan reretda tai imam sipasiakkatake peti nenda ka oinan ka tikrat oinan nenda – bagat oinan Jordan masutnangan pat pubuggranangan ka sanganantat bebet tikra kaburut gogoi pasimoneiat –

¹⁶ oto puarinangan ipuguruk oinan nenda. Oinan situgogorosot sibara ka tirik tutaddu ibailiu pangengkre, bulat mareunan, kabebet Adam, laggai sikuddu kabebet Sartan, oto oinan situgogorosot ka Koat Araba nenda, iate Koat sikalo, matakkinangan. Lepa putaliporangan bangsa nenda, ka pasongan Jerikho.

¹⁷ Tapoi tai imam sipasiakkatake peti pakerekat bagat Tuhan nenda mariuriu le rapurio ka polak simagarak, katalagat bagat oinan Jordan, oto sangamberi bangsa Israel mutalipo ka polak simagarak, pat lepa ratalipoki bagat oinan Jordan nenda.