Jos. 24 - BUKO SIPUNENAN

Manibo si Josua ka tubut paamian Israel ka Sikhem

¹ Iageti ruruakenangan sangamberi suku bangsa Israel ka Sikhem si Josua, lepa koiniakenangan sia sikebbukat, saute, sipasiukum samba sia tai utet saladdu moi paaili. Iageti oirangan leu paaili ka Taikamanua.

² Lepa geti kuanangan si Josua katubutda sangamberidra, “Arep kam apa sikuat Tuhan, Taikamanuan Israel ka tubumui, siburu taikebbukatmui rakuddu ka silat bagat oinan Efrat, samba masipanindogi sabulungan. Sara ka talagadra iate si Terah, ukkui Abraham samba si Nahor.

³ Lepa alakungan si Abraham, taikebbukatmui nenda, sibara ka tobbou laggai ka silat Efrat samba koiniakekungannia masigejengi sangaliot tobbou laggai Kanaan. Kaukungan sapunuteteunia simigi. Siboiki kaukungan ka tubunia si Ishak,

⁴ lepa kaukungan ka tubut Ishak rua tatoga, iate si Jakob samba si Esau. Kaukungan ka tubut Esau leleu Edom ibailiu polak bakkatnia, tapoi si Jakob, ukkuira taikebbukatmui nenda, pujaujaunangan ka Misir sambadra tatogania.

⁵ Lepa geti koiniakekungan si Mose samba si Aron samba kaukungan paoreat sabeu ka Misir, lepa belaakekungan kam sedda.

⁶ Abbitkungan taikebbukatmui nenda bela ka Misir, lepa geti tai Misir kukrurangan sia pasamba kereta pasaggak samba tai saladru sipukukuro'. Samba ka teteret arasege taikebbukatmui ka Koat Tiberau,

⁷ pusogarangan katubukku masitiddou paroman. Iageti oggak kudduatdra pasamba tai Misir nenda Kugalai le' imagepgep, samba labbukungan tai Misir nenda koat maloulourangan sangamberidra. Anuagaian kam apa sigalaiaakenenKu katubutda tai Misir. Bulat maburu anukuddu kam ka su'su simangai.

⁸ Lepa abbitkungan kam ka tobbou laggaira tai Amori sikuddu ka isit kabelaiat sulu bagat oinan Jordan. Saggangirangan kam tapoi Aku masigalai numamanang kam katubutda. Oppumuian tobbou laggaira, samba subuakekungan sia.

⁹ Iageti rimatadra tai Moab, iate si Balak togat Zipor, masiukkat ekeu. Koiniakenangan sirimanua ka tubut Bileam togat Beor tiddounangan bule ipateleiji kam si Bileam.

¹⁰ Tapoi ta akutunake kiddiet bagat Bileam, oto aipanukani le kam. Kisedda te Akupaarau kam kai Balak.

¹¹ Lepa geti talipokimuian bagat oinan Jordan, samba sege ka Jerikho. Saggangirangan kam tai Jerikho, kisedda leu et sia tai Amori, Feris, Kanaan, Het, Girgasi, Hewi samba tai Jebus. Tapoi Aku masiake ka tubumui kamanangan ka sangamberidra.

¹² Ka teteret anuei kam masisaggangi sia, galaikungan ramaloto samba ipaingo sia, bailiunangan ruadra rimatadra tai Amori nenda putuituirangan ka matamui. Ta' kalulut lanjau samba siloguimui anumamanang kam.

¹³ Polak siakeKu ka tubumui, ta amabesi' tubumui anusilo kamnia. Samba sangamberi laggai siakeKu ka tubumui ta kam amasigalai. Tapoi kineneiget kam le amukuddu sedda, samba kam an leu et amasipuuktungi buat anggur samba leu buat zaitunnia, ta tebai kam amasiurep.”

¹⁴ “Oto kineneiget,” “Suru' kam si Tuhan. Paguguletnake kam tubumui katubuNia ka linat paatuat samba sialei topit. Katsliake kam taikamanua bagei buluijietdra taikebbukatmui sibara ka Mesopotamia samba ka Misir. Sarat kai Tuhan le paguguletnake kam tubumui.

¹⁵ Ke ta noba kam masipaguguletnake tubu ka tubut Tuhan, teuake kam gogoi nene kasei ka tubu nupagugletnake kam tubumui: katubut taikamanua bagei buluijietdra taikebbukatmui ka Mesopotamia siburu ele katubut taikamanuandra tai Amori tobbou laggaira kudduijietmui kineneiget. Tapoi kai – sangalalepku – sarat kai Tuhan le kupaguguletnake kai tubumai.”

¹⁶ Iageti alegirangannia paamian Israel, ta kukakaddiuake kai si Tuhan kuei kai masipaguguletnake tubu ka taikamanua bagei!

¹⁷ Tuhan Taikamanuanta le amasibelaake sita samba leu taikebbukatta ka paoreat ka Misir. Ataitcoat sangamberi kiseiet sigalai Tuhan. Sarat si Tuhan le amasipaalei sita ka sanganantat puenungananta, ataenungi sangamberi tobbou laggaira bangsa bagei.

¹⁸ Samba ka teteret ataguruki laggai nene, keklenangan sangamberi tai Amori sipulalaggai sene si Tuhan. Oto, koba kai masipaguguletnake tubu ka tubut Tuhan, aipoi Nia le Taikamanuanta!”

¹⁹ Lepa kuanangan si Josua, “Tapoi kupaatu ta momoi nupaguguletnake kam tubumui katubut Tuhan, kalulut Nia Taikamanua sipunenan, Sisasara. Ta' ioba ibara sitakaiNia. Ke nukaddiuake kam Nia samba nupaguguletnake kam tubumui ka taikamanua bagei, ta iappeake jomui.

²⁰ Tapoi bailoknia, isaggangi samba iukumake le kam. Subuakenangan kam, kenanen siburu matopitNia ka tubumui.”

²¹ Iageti alegirangania tai Israel, “Ta'! Ta' kupaguguletnake kai tubumai ka tubut taikamanua bagei. Sarat ka tubut Tuhan le kupaguguletnake kai tubumai!”

²² Lepa kuanangan si Josua, “Kauan, kam le te simunengake siteuakenenmui bule sarat kai Tuhan nupaguguletnake kam tubumui.” Alegirangannia, “Bulatnia, kai le simunengakenia.”

²³ Kuanangan si Josua, “Ke kiseddangan bai nia, katsliake kam taikamanuandra tai bangsa bagei sibabara ka talagamui, samba galaimuian palelengan numariuriu kam mutopit ka tubut Tuhan, Taikamanuan Israel.”

²⁴ Lepa kuarangan kai Josua, “Sarat ka tubut Tuhan Taikamanuanta le kupaguguletnake kai tubumai.” Aile kureddet kai sangamberi parentaNia.”

²⁵ Oto ka gogoi nenda ka Sikhem galainangan palelengan si Josua pasamba paamian Israel; samba sedda leu kaunangan katubutda surukat samba enungakenen sibailiu reddenendra.

²⁶ Sangamberi surukat samba enungakenen nendai suratnakenangannia ka bagat buko Surukat Taikamanua. Lepa geti alanangan sara bukku sabeu, lepa rioakenangannia ka tei loina sabeu ka sara kudduat sikokoiakenen kai Tuhan.

²⁷ Kele ailepa nenda kuanangan si Josua ka tubutdra sangamberi sirimanua nenda, “Bukku nene ibailiu sipasimuneng ka sita. Sangamberi tiboiet sisegeakenen Tuhan ka tubutta, aitiboian ka bukku nene. Bailiu, bukku nene te sipasimuneng ka tubumui masiparepdem kam bule ta nulawan kam Taikamanuamui.”

²⁸ Kalepakatnia koiniakenangan sia si Josua ratoili; iageti sangamberidra toili sia ka polakdra sene-senendra.

Kamateiat Josua samba Eleazar

²⁹ Lepa geti si Josua togat Nun pagugulet Tuhan nenda, mateinia ka teteret rurania sangotu pulu ngarura.

³⁰ Rateiakerangannia ka polak bulat bakkatnia ka Timnat-Serah ka leleu Efraim isit ka bare' leleu Gaas.

³¹ Ujut purimanuaiat Josua, paamian Israel masipaguguletnake tubu ka tubut Tuhan. Samba kele aimatei leu et mariuriu le sia masipaguguletnake tubu ka tubut Tuhan ujut aipeile katalagadra saute sipasimunengake sangamberi sigalaiakenen Tuhan ka paamian Israel.

³² Abbitrangan tai Israel tolat Josep sibara ka Misir, rateiakerangannia ka Sikhem ka polak sisakit Jakob sakinia sangotu bulagat perak ka tatogat Hemor, ukkui Sikhem. Polak nenda atukaunia ka muntogat Josep.

³³ Lepa geti matei si Eleazar togat Aron, samba rateiakerangannia ka Gibea, iate laggai sikukuddu ka laggai simaleleu ka Efraim. Laggai nene atukauan ka tubut Pinehas, togat Eleazar.