Jos. 23 - BUKO SIPUNENAN

Ngantoman Josua ka saute bangsa Israel

¹ Kele aimaburu aikau puaragat katubutda paamian Israel si Tuhan, ta an anai tai saggak sigeugeu sia. Ka teteret nenda si Josua bulat amabajaannia.

² Iageti sogainangan sangamberi paamian Israel, ialeu et sia sikebbukat, saute, tai sipasiukum samba sia tai utet saladdu, lepa kuanangan katubutda, “Kineneiget amabajaan aku.

³ Anuitcoan kam sangamberinia sigalaiakenen Tuhan Taikamanuamui katubutda sangamberi bangsa sene kalulut kam. Si Tuhan le' apasaggak sibailiu uktukmui.

⁴ Polakdra tai bangsa sipulelegei, kisedda leu et polak sangamberi bangsa sikalaakenenku, iate polak simalio barania ka isit kabelaiat sulu bagat oinan Jordan pat aili kabelekat sulu sege ka Koat Tenga sangamberinia nenda akuparubeian ka tubumui ibailiunia bakkatmui.

⁵ Si Tuhan Taikamanuamui aikalaake tai bangsa, samba putuituirangan ka tubumui ke mei kam masisaggangi sia. Bakkatimuian tobbou laggaira, kele sipalelek Tuhan Taikamanuamui ka tubumui.

⁶ Kalulut nenda, jago kam bule nureddet samba nuenungake kam sangamberi situtusurat ka bagat Buko Surukat Mose. Bui nupasabau kam mande sara sibara ka sangamberi surukat nenda.

⁷ Bailiu kele kisedda te ta nupagalu kam ka tai bangsa sikukuddu ka talagamui. Ta' an nukukua kam onin sabulungandra ele musuppa ka oni nenda. Samba leu ta nupaninindogi ele nusuru kam sabulungan nenda.

⁸ Bui ta mariuriu kam mutopit ka tubut Tuhan, kele sigalaiakenenmui teret kineneiget.

⁹ Sia bangsa sabeu samba simaron aikeklengan sia si Tuhan ka matamui; ta' anai berisara sia simagege masisaggangi kam.

¹⁰ Senen sirimanua ka talagamui momoi masikalaake sipuriribu sirimanua, kalulut Tuhan Taikamanua poi sipasasaggak kakami, kele sipalelekNia.

¹¹ Kalulut nenda, repdep kam bule nupukateki kam baga si Tuhan Taikamanuamui.

¹² Ke ta matopit kam samba pagalu kam katubutda tai bangsa sikuddu ka talagamui, samba nutalimouake kam sia,

¹³ repdep kam, bulat ta an ikekele sia minca ka matamui tai bangsa nenda si Tuhan. Tapoi ibailiu le sia geti pugejaat bagamui simakope. Bailoknia, ibailiu le sia kele sesere ele kele luluplup ka tubumui. Baraakerangan pangoringanmui; bailiunangan sia kele bobo'bo ka teiteimui ele kele rui ka matamui. Pangorikmuian te geti simariuriu pat tata' ka talagamui sikukudu ka laggai simeru akenen Tuhan Taikamanuamui kakam.

¹⁴ Kineneiget aiailingan teterenia kamateiatku. Sangamberimui, anuagaian kam aiake sangamberi simaeru si Tuhan Taikamanuamui kele sipalelekNia. Aigalaiakean senen palelenganNia, ta anai berisara ta aigalaiake.

¹⁵ Tapoi kele leu aigalaiake senen palelenganNia ka tubumui, kisedda leu et igalaiake kasenen palotokatNia ka tubumui.

¹⁶ Ke' nupasabau kam palelengan siparentaakenen Tuhan Taikamnuamui ka tubumui sibailiu reddenenmui, samba mei kam paruru ka taikamanua bagei samba leu masipanindogi taikamanua nenda, oto pugolunangan te geti si Tuhan samba ukumnangan kam. Ka bagat tetere sitete matei kam sangamberimui ka tobbou laggai simaeru nene, siaket Tuhan ka tubumui.”