Jos. 22 - BUKO SIPUNENAN

Sangamberi suku ka kupkumen kabelaiat sulu tukoiake sia ratoili ka laggaira

¹ Lepa geti sogainangan sia suku Ruben si Josua, Gad samba sangarubeiat suku Manasye ka isit kabelaiat sulu bagat oinan Jordan,

² iageti panibonangan katubutda, “Sangamberinia siparentaakenen Mose, pagugulet Tuhan nenda ka tubumui, sangamberimui anugalaiakean kam. Samba sangamberimui leu et anureddetnan kam sangamberi parentakku.

³ Ka ujunia nene tat anuobaake kam sasarainamui tai Israel sabagei, pasaggak saradra. Sangamberimui bulat anureddetnan kam sangamberi parentat Tuhan Taikamanuamui.

⁴ Oto siripot palelenganNia, si Tuhan Taikamanuamui aiakean puaragat katubutda sasarainamui, tai Israel sabagei. Oto, toiliake le kam kineneiget ka kupkumen ka isit kabelaiat sulu bagat oinan Jordan nenda siaket Mose ka tubumui siburu.

⁵ Samba jago kam bule sangamberimui masireddet surukat siparentaakenen Mose ka tubumui, iate: Pununtuki baga kam si Tuhan Taikamanuamui, tut kam siobaNia, reddet kam sangamberi parentaNia, kau matopit kam katubuNia, samba paguguletnake kam tubumui katubuNia ka muinet patuatmui samba ka sangaliot ketsatmui.”

⁶ Lepa sukatnakenangan sia si Josua samba obaakenangan sia ratuitui. Iageti toili sia ka pusapougatda.

⁷ Ka suku Manasye siiretalaga nenda aikau si Mose rubeiatda ka Basan; samba leu kasara suku iretalaga minca aikauan si Josua rubeiatda katalagat sasarainanda ka isit ka belekat sulu oinan Jordan. Samba lauet kateteret aiobaake sia si Josua raei ka sapoura kalepat aisukatnake sia,

⁸ kuanangan katubutda kise: “Toiliake kam ka sapoumui kabagat pukayoatmui simigi samba kabagat igit tarimeu, perak, mas, laba' samba bibilet simigi. Rubeiake kam ka sasarainamui sirauraumui kasaggakmui nenda.”

Suku-suku ka silat bagat oinan Jordan masirioake kudduat pasibuluat

⁹ Iageti toili muntogat Ruben, muntogat Gad samba suku Manasye siiretalaga nenda samba tuitui sia rakaddiuake tai Israel, rabela baratda ka Silo raei ka laggai Kanaan bule raei ka laggai Gilead, polak siikepmakenenda sikuddujietda siripot parentat Tuhan kai Mose.

¹⁰ Ka teteret suku Ruben, Gad, samba suku Manasye kabelaiat sulu Jordan nenda sege ka Geliot – aipeile ka isit kabelekat sulu bagat oinan Jordan – rioakerangan sara kudduat pasibuluat sabeu ka be'bet bagat oinan.

¹¹ Tai Israel sabagei simakere bangsa masiarep samba masikua, “Sia suku Ruben, Gad samba suku Manasye ka isit kabelaiat sulu Jordan ararioakean sara kudduat pasibuluat ka kupkumen laggaita.”

¹² Parururangan sangamberidra ka Silo bule rasanggangi sangamberi suku Israel ka rubeiat kabelaiat sulu bagat oinan Jordan nenda.

¹³ Iageti sia paamian Israel masikoiniake si Pinehas, togat imam Eleazer katubutda suku Ruben, Gad samba suku Manasye ka daerah Gilead kabelaiat sulu Jordan.

¹⁴ Ai sia pulu leu et sikebbukat bangsa Israel sipaalei si Pinehas, – pasasara sibara ka senen suku ka isit kabelekat sulu bagat oinan Jordan, sangamberidra iate ute ka muntogatdra.

¹⁵ Iageti sege sia ka kudduatdra suku Ruben, Gad samba suku Manasye ka daerah Gilead.

¹⁶ Lepa kuarangan katubutda sia sibara ka suku Ruben, Gad samba suku Manasye nenda, ka onin sangamberi paamian Tuhan, “Angoian le anugalaiake kam sikatai nene ka tubut Taikamanuan Israel? Nugalai kam kudduat pasibuluatmui saramui, masisaggangi si Tuhan. Ta' an anureddet kam sangamberi parentaNia!

¹⁷ Ta'an anurepdep kam jotta ka Peor? Ka teteret nenda ukumnangan sita si Tuhan iake besi simasappo, kenanen poi sita nene paamianNia. Pat aili kineneiget ai peile taoorik buat sigalaita. Ta' pei pa iaaili nenda?

¹⁸ Samba kineneiget, nuoba peile kam masikateiteiake si Tuhan minca? Ke nusaggangikam si Tuhan gogoi nene, mancep pugolunangan te katubut sangamberi paamian Israel.

¹⁹ Ke aibailiuan laggaimui kasitsitnakenen samba ta mateu tubailiuakenia kudduat parurukat kai Tuhan, pujaujauan le kam senen ka kupkumen laggaimai, tapoi bui nusaggangikam si Tuhan ele masisaggangi kai masigalai minca kudduat pasibuluat bagei, aian kudduat pasibuluat si Tuhan Taikamanuanta.

²⁰ Repdep, si Akhan togat Zerah ta ioba masitut parentat Tuhan pagalaiat bibilet siripokatnia bui ta tupakatai le, samba apa kalepakatnia? Sangamberi paamian Israel tuukumake! Amasigalai jo sarania si Akhan tapoi amatei ta sarania!”

²¹ Iageti sia suku Ruben, Gad samba suku Manasye ka isit kabelaiat sulu nenda masialegi,

²² “Sipulugege iate Tuhan! Sipulugege iate Tuhan! Iagai le angoi akugalai kai nene, samba koba leu et kai bule nuagai kamnia. Ke kugalai bai kai kele kisedda, ai patuatmai masisaggangi ele kalulut ta'an matonem bagamai minca katubuNia, eddangan kumatei kai kineneiget!

²³ Si Tuhan le masiukum kai, ke ai patuatmai masisaggangi si Tuhan samba masirioake kudduat pasibuluatmai saramai bule kupanguruatnake kai buluakenen rarangen ele buluakenen gandum ele buluakenen pasuruangan ka uddutnia.

²⁴ Ta' nenda patuatmai kam sasaraina! Akurioake kai kudduat pasibuluat nenda, kalulut karat bagamai ka gogoi sibabara katubutda samuntogatmui rakua katubutda samuntogatmai, “Ta' anai patabbaratmui kai Tuhan, Taikamanuan Israel!

²⁵ Itco kam, aigalakngakean bagat oinan Jordan nene ka talagatta nenda te masipasaraake kai kakam tai Ruben samba Gad. Bulatnia ta'anai le patabbaratmui apapa kai Tuhan. Oto apa muaaili lepa geti? Ragagalaiake te samuntogatmui raariake samuntogatmai paruru kai Tuhan.

²⁶ Oto, akurioake kai kudduat pasibuluat, ta buluakenen rarangen ele panguruatmai,

²⁷ tapoi bule ibailiu toggaijat ka sita ka si rua ngasila, samba ka tuppai tubutta ka gogoi sibabara, aipoi bulatnia kai nene paruru ka tubut Tuhan ka sapou kudduatNia masiambit buluakenen rarangen, sangamberi panguruat samba buluakenen pasuruangan. Kiseddangan bai nia tuppai tubumui geti ta masikukua aipoi tuppai tubumai ta' anai patabbaratdra aponia pa' kai Tuhan.

²⁸ Oto, patuatmai iate: Ke rakua samuntogatmai kisedda, iageti keturunanmai momoi masikua; itco kam kudduat pasibuluat nenda! Taikebbukatmai masirioake sara kudduat pasibuluat simakere ka kudduat pasibuluat Tuhan, ta buluakenen rarangen ele panguruat, tapoi ibailiu toggaijat ka sita ka si rua ngarubeiat.

²⁹ Kau matonem bagamui, ta kuoba kai masisaggangi si Tuhan ele muari masipagugulenake tubu ka tubuNia masituppai kudduat pasibuluat bagei addeat buluakenen rarangen ele buluakenen gandum ele addeat panguruat, mandean kudduat pasibuluat Tuhan Taikamanuanta aian ka matat Sapou Kudduat Tuhan.”

³⁰ Sangamberi sikolouakenenndra sia sibara ka suku Ruben, Gad samba suku Manasye ka isit kabelaiat sulu nenda raarepi sia imam Pinehas pasamba leu sipulu sikebbukatdra paamian Israel sibara ka rubeiat kabelekat sulu bagat oinan Jordan. Oto sia leu et sege bagadra katukolobat nenda.

³¹ Lepa kuanangan si Pinehas, togat imam Eleazar, katubudra sia suku Ruben, Gad samba Manasye kabelaiat sulu, “Kineneiget ataagaian si Tuhan masipaalei sita, kalulut ta aisili putopinanmui ka tubuNia. Amasipaarauan kam paamian Israel ka pasiukuman si Tuhan.”

³² Kele ailepa nenda si Pinehas pasamba sia sikebbukat ka Israel nenda tuitui sia. Kaddiuakerangan sia tai Ruben samba Gad nenda ka Gilead, iageti toili sia ka Kanaan, lepa geti pangasegerangan pagalaiat nenda ka tubut paamian Israel.

³³ Oto pagalaiat nenda maeru le raarepinia sapaamian Israel, bailiunangan umunakerangan Taikamanua. Ta' an arapatiboiji minca pagalaiat pupaatuanandra addeat masisaggangi sia tai Ruben samba Gad, samba addeat masipakatai tobbou laggaira.

³⁴ Katukappulatnia suku Ruben samba Gad nenda masikua, “Kudduat pasibuluat nene ibailiu sipasimuneng ka sangamberitta aipoi Tuhan iate Taikamanua.” Oto oniakerangan kudduat pasibuluat nenda “Sipasimuneng.”