Jos. 21 - BUKO SIPUNENAN

Laggai bakkatdra suku Lewi

¹ Ka sara gogoi sia saute ka muntogat suku Lewi ei sia ka Silo ka tobbou laggai Kanaan, masipatiboake imam Eleazar, Josua togat Nun, samba sia saute senen muntogat ka sangamberi suku bangsa Israel.

² Kuarangan, “Aiparentaakean kai Mose si Tuhan bule kakai, tai Lewi tuaake laggai kudduat pulaggaijatmai samba polak simalio su'su ka be'bet laggai nenda putarimeugatmai.”

³ Iageti tai Israel masitut parentat Tuhan. Sibara ka polak bakkatdra, kaurangan katubutda tai Lewi laggai sikokoiakenen pasamba polak su'sunia.

⁴ Siboiki masisilo laggainia iate sangamberi sipulalalep saepput Kehat ka bagat suku Lewi. Sipulalalep sibara ka muntogat Imam Harun rakau pulu telu laggai sibara ka laggai kupkumen suku Jehuda, Simeon samba Benjamin.

⁵ Sipulalalep sabagei sibara ka keturunan Kehat atukau pulu laggai sibara ka laggai kupkumen suku Efraim, suku Dan samba leu suku Manasye ka isit kabelekat sulu bagat oinan Jordan.

⁶ Muntogat Gersom ai rubeiatdra pulu telu laggai sibara ka laggai kupkumen suku Isakhar, Asyer, Naftali, samba suku Manasye ka isit kabelaiat sulu bagat oinan Jordan.

⁷ Sangamberi sipulalalep sibara ka muntogat Merari ai rubeiatdra pulu rua laggai sibara ka laggai kupkumen suku Ruben, Gad samba Zebulon.

⁸ Kasedda te tai Israel masiparubei laggai nenda samba polak su'sunia masigalai pauktungan katubutda tai Lewi, kele siparentaakenen Tuhan kai Mose.

Laggai bakkatdra muntogat Kehat

⁹ Sibara ka muntogat Kehat ka suku Lewi, tai imam sibara ka keturunan Harun le amasisilo laggaira siboiki;

¹⁰ pulu telu laggai pasamba polak su'sunia arakau.

¹¹ Sibara ka suku Jehuda samba simeon, siba laggai arasilo, iate: Libna,

¹² Jatir, Estemoa,

¹³ Holon, Debir,

¹⁴ Ain, Juta,

¹⁵ Bet-Semes samba Arba, sioniakenendra siripot onin ukkui Enak.

¹⁶ Laggai nenda oniakenendra kineneiget Hebron, iate sara laggai pukuneman ka leleu Jehuda.

¹⁷ Sangamberi mone samba desa-desa laggai nene atukauan katubut Kaleb togat Jefune addeat ibailiu polak bakkatdra.

¹⁸ Sibara ka suku Benjamin epat laggai arasilo, iate Gibeon, Geba,

¹⁹ Anatot samba Almon.

²⁰ Sangamberi sipulalalep sabagei sibara ka muntogat Kehat arakau pulu laggai pasamba leu polak su'sunia. Sibara ka suku Efraim arasilo epat laggai, iate:

²¹ Bet-Horon, Kibzaim,

²² sibara ka suku Efraim arasilo epat laggai iate:

²³ Elteke, Gibeton,

²⁴ Ayalon samba Gat-Rimon.

²⁵ Sibara ka suku Manasye ka isit kabelekat sulu arasilo rua laggai,

²⁶ iate Taanakh samba Gat-Rimon.

Laggai addeatda muntogat Gersom samba Merari

²⁷ Sara muntogat bagei ka bagat suku Lewi siate muntogat Gerson. Sangamberi sipulalalep sibara ka muntogat Gerson nene pulu telu laggai pasamba polak su'sunia arakau.

²⁸ Sibara ka suku Isakhar epat laggai arasilo, iate: Kisyon, Dobrat,

²⁹ Jarmut samba En-Ganim.

³⁰ Sibara ka suku Asyer epat laggai arasilo, iate: Misal, Abdon,

³¹ Helkat samba Rehob.

³² Sibara ka suku Naftali telu laggai arasilo iate:

³³ Hamat-Dor, Kartans samba Kedes, sara laggai pukuneman ka Galilea.

³⁴ Muntogat sipulelegei ka bagat suku Lewi iate: muntogat Merari pulu rua laggai arakau pasamba polak su'sunia. Sibara ka suku Zebulon epat laggai arasilo, iate: Jokneam, Karta,

³⁵ Dimna samba Nahalal.

³⁶ Sibara ka suku Ruben epat laggai arasilo, iate Bezer, Jahas,

³⁷ Kedemot samba Mefaat.

³⁸ Sibara ka suku Gad epat laggai arasilo, iate: Mahanaim,

³⁹ Hesybon, Jaezer samba Ramot, sara laggai pukuneman ka Gilead.

⁴⁰ Sangamberi laggai nenda tukau rubeiat paninikat Merari siripokat muntogatdra, iate sia sipulelegei sibara ka muntogat Lewi. Rubeiat pauktungandra ai pulu rua laggai.

⁴¹ Oto sangamberi polak arabakkati sangamberidra bangsa Israel

⁴² ai epat pulu balu laggai samba sangamberi polak su'su ka be'benia sikaura katubudra tai Lewi.

Paabanan ka laggai sipalelekakenen Tuhan

⁴³ Kele kisedda te si Tuhan masikau ka pamian Israel sangamberi polak sipalelekNia ka tubut taikebbukatdra. Kele arakuduuiji tobbou laggai nenda, paamian Israel pulaggairangan sedda.

⁴⁴ Oto siripot kipa sipalelek Tuhan ka tubut taikebbukatdra, tobbou laggai nenda maaman kalulut si Tuhan poi masijago sia. Saggakdra ta'anai sia mande sara momoi masilawan sia, aipoi si Tuhan le amasikau kamanangan ka tai Israel masikalaake sangamberi saggakdra.

⁴⁵ Aigalaiakean senen palelenganNia ka tubutdra paamian Israel si Tuhan; sangamberinia le ai galaiake.