Jos. 20 - BUKO SIPUNENAN

Laggai pukuneman

¹ Lepa geti koiniakenangan si Josua si Tuhan

² masikua kisene ka tai Israel, “Alepaan Akuparentaake si Mose bule ipaagai ka tubumui pagalaiat laggai pulippunan, iate sangamberi laggai bule ioi ratuituiake tubudra bule rasese pukuneman. Kineneiget pili kam laggai nenda.

³ Sirimanua simateiake sirimanua sabagei ta sipali, momoi ituitui masiailiake laggai nenda bule ibela ka sirimanua siala lumun ka tubunia.

⁴ Momoi ituitui masiailiake sara laggai nenda, samba einia ka kudduat pasiukuman ka matat baliu gugurukat laggai nenda, iageti kolouakenangannia katubutda sia saute sedda apa sipuaaili. Sia saute nenda masiobaakenia geti masiguruki laggai nenda, samba kaurangan ka tubunia kudduat bule ikuddu.

⁵ Ke ikukrunia sioba masila lumun nenda pat aili sedda, sikuddu ka laggai nenda ta'momoi rasegeakenia katubut sirimanua nenda. Bui ta rakuneminia, aipoi aimateiake sirimanua ta sipali, samba ta leu kalulut lagat baga.

⁶ Momoi ikuddu ka laggai nenda teret ilepa itupakaroakenia ka matat simigi, samba teret imatei sirimanua siukkaake galajet Imam Sabeu. Ke' alepaan nenda iapeite sirimanua nenda momoi toili ka laggai kabaraiatnia.”

⁷ Iageti ka kupkumen laggai kabelekat sulu bagat oinan Jordan paamian Israel masisausau sangamberi laggai nene rubeiat laggai pukuneman: Kades ka simigi leleu Naftali ka Galilea, Sikhem ka simigi leleu Efraim, samba Hebron ka simigi leleu Jehuda.

⁸ Ka kupkumen laggai kabelaiat sulu bagat oinan Jordan ka leleu simasu'su su'sut ngai isit kabelaiat sulu Jerikho sausaurangan laggai nene sibailiu laggai pukuneman: Laggai Bezer ka laggai kupkumen Ruben, laggai Ramot, ka Gilead ka laggai kupkumen Gad, samba laggai Golan ka Basan laggai kupkumen Manasye.

⁹ Nenda te sangamberinia laggai pukuneman sinausau ka sangamberi paamian Israel samba senen sirimanua siooiake sikuddu ka talagadra. Senen sirimanua simateiake sirimanua sabagei sitaipapaliket, momoi rasese pukuneman ka sangamberi laggai nenda sibara kapasikukrudra sirimanua sioba masiala lumun katubunia; ta momoi ramateiake ke' ta'pei tupakaroakenia kamatat sirimanua simigi.