Jos. 2 - BUKO SIPUNENAN

Josua masikoiniake sipasitataiko ka Jerikho

¹ Iageti sibara ka pusapougat ka Sitim, koiniakenangan rua sia si Josua masitaiko laggai Kanaan. Ruadda nenda iparentaake bule ralelekngake laggai Kanaan samba laggai Jerikho. Iageti eirangan leu et ka laggai nenda, samba pugogoirangan ka sara sinanalep simaolop tubu, sipuoni Rahab.

² Rimata laggai Jerikho masiarep ka soibo nenda ai tai Israel siooi masitaiko laggai Jerikho.

³ Iageti koiniakenangan sia si Rimata ka tubut Rahab bule rasegeake parenta nene, “Belaake sirimanua sipugogogoi ka lalepnu nenda. Sia iate sipasitataiko siooi masilelekngake sangalio laggai Jerikho!”

⁴ Tapoi senanalepnenda aiambitnan samba ailipputnakean karua sirimanua nenda. Kuanangan: Kirenangan, sangamberi sirimanua nenda amoian sia ka tubukku, tapoi ta' kuagai kaipa arabara,

⁵ samba kateteret kasoibokat kepei tupatpatake matat baliu, bela sia sirimanua nenda; ta' kuagai, kaipa raei sirimanua nenda. Olaake nukukuru kam sia, momoi le nuailiake kam sia.”

⁶ Tapoi sinanalep nenda aikoiniakean karuania tusakai ka lapprat lalepnia samba lipputnakenangan sia ka tei sitabbui sigetaiat, sisaragaiakenen ka lapra nenda.

⁷ Iageti tuitui sia sikoiniakenen rimata nenda rakaddiuake laggai. Aian le sia ka gerat patpatnake matatbaliu gugurukat laggai. Gabarangan sia sipasitataiko nenda pat sege ka kudduat putalipokat ka bagat oinan Jordan.

⁸ Soibo nenda kepei merep sia sipananaiko nenda, ei si Rahab ka lappra,

⁹ samba kuanangan kamatadda, “Akuagaian aiakean si Tuhan laggai nene kakam. Sangamberi sirimanua sene maloto ka tubumui.

¹⁰ Amaarepman katuareman pagalaiat aigarakngake si Tuhan koat Tiberau ka matamui sangamberimui, ka teteret anubela kam ka Misir. Amaarepman leu et kakai kipa anumateiake kam si Sihon samba si Og rua rimatadda bangsa Amori nenda ka isit kabelaiat sulu bagat oinan Jordan.

¹¹ Kele akuarep kai pumumuan nenda, malotomaian simakope. Sangamberi sirimanua tata' gegedra kalulut kam. Tuhan Taikamanuamui bulat Taikamanua Sipulubeunan ka manua samba ka polak.

¹² Oto kineneiget, pusuppa kam kai Tuhan, kalulut akugalai poi simaeru ka tubumui, oto bui ta nugalaiake leu kam simaeru ka muntogat saeppukku; samba ake' le ka tubukku sara toggaiat sioi tukatonemi,

¹³ nuobaake le geti ipurimanua ukkui samba inangku, sasarainangku taimantaeu samba tainanalep samba sangamberi sirimanuanda samba nupaareu geti engamai ka kamateiat.”

¹⁴ Iageti ruadda nenda masialegi, “Palelenganmai iate, ke' iake si Tuhan laggai nene ka tubumai, galaiakemaian simaeru ka tubumui sibailiu, bui le nutiboi ka tubut kasei pa pagalaiat kai. Eddangan itelei kai si Tuhan ke ta kugalaiake kai palelenganmai nene.”

¹⁵ Kalulut lalep Rahab ai le ka Irip laggai, oto pakeinangan tali si Rahab igorosotnake ruadra nenda ka jandela.

¹⁶ Kuanangan si Rahab, “Kenan kam ka laggai simaleleu, bule ta ralaba kam sia sikoiniakenen rimata. Pulipputmuian sedda telu ngagogoi burunia teret ratoili, iapeite momoi nuriuriuake kam puenungananmui.”

¹⁷ Kuarangan ka matat Rahab, “Kauan, aile kugalaiake kai palelenganmai sitiddounu kakai.

¹⁸ Sarat nene le bulat galaiakenennu. Ke' kusaggangi kai laggaimui, appraake tali simabonan nene ka jandela enungan anugorosotnake kai. Ukkui samba inam, sangamberi sasarainam samba sangamberi saepput ukkuinu kau le nururu'ake sia ka lalepnu.

¹⁹ Ke' ai bai sara sia sibebela ka lalep nene samba ke' mateinia bai nia, kamamateinia iate selenia le sarania, ta te masele kai. Tapoi ke' ai kam siorak apapa ka bagat lalep nene, kai te masibabairat kalulut sipuaaili nene.

²⁰ Tapoi ke' geti nupaagai pagalaiat kai ka tubut sara sirimanua, oto ta'an te iappra kai palelengan sinindounu kakai.”

²¹ Ioba le si Rahab sikuadra nenda, lepa obaakenangan ratuitui. Lepa geti appraakenangan tali simabonan nenda ka jandelat lalepnia.

²² Iageti tuitui sia sipasitataiko nenda ka laggai simaleleu samba pulipputrangan sedda. Telu ngagogoi ujunia rapasigaba sia sikoiniakenen rimata nenda ka senen kudduat ka laggai nenda, tapoi ta arasese sia. Kalepakatnia sikoiniakenen nenda toili sia ka Jerikho.

²³ Si rua tai Israel sipasitataiko nenda gorosot sia baradra ka simaleleu samba talipokirangan bagat oinan lepa geti toili sia kai Josua. Sangamberi siitcora, segeakerangannnia ka tubunia.

²⁴ Lepa geti kuarangan, “Bulatnia iaake sangaliot tobbou laggai nenda ka tubutta si Tuhan; sangamberi sirimanua sikuddu sedda maloto sia ka tubutta.”