Jos. 18 - BUKO SIPUNENAN

Parubeijat polak sipulelegei sipalelek Tuhan

¹ Kele ai lepa rakalaake tobbou laggai sipalelek Tuhan, paruru'rangan sangamberi paamian Israel ka Silo, lepa rioakerangan Sapou Paailiat kai Tuhan.

² Ai peile pitu suku ka bangsa Israel ta'pei amasisilo rubeiat polak.

³ Oto, kuanangan ka paamian Israel si Josua, “Teret kipangan le nuoba kam burunia nupasingena kam, nuei kam masikuduiji kupkumen laggai siaket Tuhan, Taikamanuanda taikebbukatmui ka tubumui?

⁴ Pili kam telu sia sibara ka senen suku. Bule kukoiniake sia masitaiko sangaliot tobbou laggai nene bule rasuratnake sangamberi pasongan kupkumen laggai sioba'ra rabakkatinia. Lepa nenda, bui ta toili sia minca katubukku.

⁵ Polak nenda bui ta turubei ibailiu pitu ngarubeiat. Tai Jehuda kuddu sia ka laggai kupkumen ka isit ka kaiaman, samba suku Josep ka laggai kupkumen ka isit bare'.

⁶ Tularat sangamberi pasongan pitu ngarubeiat polak nenda bui ta tugalai samba segeakemuian katubukku. Akungan le masigagalai pauktungan bule ituagai kaipa aiteuake Taikamanua kakam.

⁷ Sarat suku Lewi ta masisilo rubeiat polak simakere kele kam, kalulut rubeiatda iate: ibailiu sia tai imam bule rapasikeli pupasikelanan kai Tuhan. Samba pagalaiat suku Gad, Ruben samba iletalaga suku Manasye, ka sia arasiloan rubeiatdra ka isit kabelaiat sulu bagat oinan Jordan. Si Mose pagugulet Tuhan, amasikau polak neda katubutda.”

⁸ Iageti kaunangan enungan si Josua nene katubutda nenda, “Kenan kam masitaiko sangaliot tobbou laggai nene samba galaimuian sangamberi tularat pasongannia; iageti oi kam minca katubukku. Akungan le masigagalai pauktungan sene ka Silo bule ituagai kaipa aiteuake Taikamanua kakam.” Lepa arasilo katukolobat galaiakenenda nenda sibara kai Josua, eirangan leu masitaiko polak nenda.

⁹ Sangaliot tobbou laggai nenda gejengirangannia, lepa galairangan tularat pasongan pitu ngarubeiat polak nenda samba leu masisuratnake sangamberi laggai sibabara ka bagania. Lepa geti toili sia kai Josua ka pusapougat ka silo.

¹⁰ Lepa galainangan pauktungan si Josua bule ituagai kaipa rubeiat polak ka senen suku bangsa Israel sitai babara rubeiat polak peile.

Laggai kupkumen sinausau bakkatdra suku Benjamin

¹¹ Parubeiat siboiki iate polak bakkatdra sangamberi sipulalalep ka suku Benjamin. Kudduat rubeiatdra nenda ka paoggangan polak suku Jehuda samba polak suku muntogat Josep.

¹² Ka isit bare', sangamberi pasongan polakdra barania ka bagat oinan Jordan, lepa tatra ka gilak ka isit ka bare' Jerikho, lepa geti ka isit kabelekat sulu enunginangan kupkumen laggai simaleleu sege kele reunan kupkumen laggai simatangeu Bet-Awen.

¹³ Pasongan nenda ruriu leu ka gilak ka isit ka kaiaman Lus (siagaita iate Betel), lepa gorosot ka Atorat-Adar ka leleu ka isit ka kaiaman Bet-Horon-Hilir.

¹⁴ Barania ka isit kabelekat sulu nenda, pasongan polak nenda biluakenangannia ka isit ka kaiaman masiailiake ka Kiryat-Baal (iate Kiryat-Jearim). Kiryat-Baal iate suku Jehuda sibakkatnia. Nenda te pasongan polak nenda ka isit kabelekat sulu.

¹⁵ Sangamberi pasongan ka isit ka kaiaman barania ka be'bet Kiryat-Jearim teret ka bubuakat oinan Me-Neftoah,

¹⁶ lepa luttut ka su'sut leleu sipamamatai pasamba su'sut-Hinom ka pangampulat ka isit ka kaiaman gilak leleu ka tobbou laggaira tai Jebus, riuriu masiailiake ka En-Rogel,

¹⁷ biluakenangan ka isit ka bare ka En-Semes, lepa ka Gelilot ka silat panatarat Adumim. Lepa pasongan nenda luttut ka Bukku Bohan (Bohan iate togat Ruben),

¹⁸ lepa riuriu ka isit kabare sangamberi gilak leleu sipaiipo susut Jordan, lepa geti luttut ka su'su nenda.

¹⁹ Sabau isit ka bare gilak leleu Bet-Hogla, samba kapplu karubeiat ka isit ka bare ka Koat Tengai ka mongan Bagat Jordan nenda te pasongan rubeiat ka isit ka kaiaman.

²⁰ Bagat oinan Jordan ai bailiuan pasongan ka isit kabelaiat sulu. Kisedda te sangamberi pasongan polak aikaunia katubutda sipulalalep ka suku Benjamin ibailiunia bakkatdra.

²¹ Sangamberi laggai sibakkatidda sia sipulalalep ka suku Benjamin, sangamberinia ai pulurua laggai samba laggai pagoiso-goiso bagei ka bebenia, jate: Jerikho, Bet-Hogla, Emek-Kezis,

²² Bet-Araba, Zemaraim, Betel,

²³ Haaurin, Para, Ofra,

²⁴ Kefar, Haamonai, Ofni, samba Geba.

²⁵ -28 Ja leu et pulu epat laggai nene tutnia pasamba laggai sigoiso ka be'benia: Gibeon, Rama, Beerot,

²⁶ Mizpa, Kefira, Moza,

²⁷ Rekem, Jirpeel, Tarala,

²⁸ Zela, Elef samba Jebus, iate Jerusalem, Gibeat samba Kiryat-Jearim. Nenda te sangamberi polak sikaunia katubutda sipulalalep ka suku Benjamin ibailiu bakkatdra.