Jos. 17 - BUKO SIPUNENAN

Suku Manasye ka isit kabelekat sulu bagat oinan Jordan

¹ Sangarubeiat kupkumen laggai ka isit kabelekat sulu bagat oinan Jordan tukau ka tubut sangamberi sipulalalep muntogat Manasye togat Josep sikebbukat. Makhir, ukkui Gilead, iate togat Manasye sikebbukat. Kalulut nia sipasasaggak, oto kupkumen laggai Gilead samba Basan sikuddu ka isit kabelaiat sulu bagat oinan Jordan tukau ka tubunia.

² Kupkumen laggai isit kabelekat sulu bagat oinan Jordan tukau katubutda sabagei sipulalalep sibara ka muntogat Manasye iate: Abiezer, Helek, Asriel, Sekhem, Hefer samba Semida; sangamberida nenda muntogat simanteu sibara ka keturunan Manasye togat Josep. Sia nenda sangamberida saute ka bagat lalep.

³ Zelafehad, togat Hefer, punuteteu Gilead (Gilead iate togat Makhir, punuteteu Manasye), ta'anai togania simanteu, sarat tainanalep le iate: Makhla, Noa, Hogla, Milka, Tirza.

⁴ Ei sia kai imam Eliezer, Josua togat Nun samba leu sia saute, samba kuarangan: “Aikuangan si Tuhan kai Mose bui ta bara polakmai simakere kele ka sasarainamai taimanteu.” Kalulut nenda siripot parentat Tuhan, tatogat Zelafehad tainanalep nenda tukau polak simakere kele ka sasarainanda taimanteu.

⁵ Kisedda te' aitukau pulungamata polak ka suku Manasye, ai leuet polak Gilead samba Basan ka silat bagat oinan Jordan,

⁶ kalulut tatogat Manasye tainanalep arasiloan ikepmakenenda katalagat togania simanteu, oto polak Gilead tuteuake sibailiu bakkatda tatogat Manasye taimanteu sabagei.

⁷ Sangamberi pasongan laggai kupkumen suku Manasye barania ka Asyer ka Mikhmetat ka isit kabelaiat sulu Sikhem. Barania sedda song nenda luttut ka isit ka kaiaman aili ka kupkumen laggai saeppunia En-Tapuah.

⁸ Kupkumen laggai Tapuah iate sibakkatnia suku Manasye, tapoi laggai Tapuah, ka pasongan, iate muntogat Efraim sibakkatnia.

⁹ Iageti minca pasongan laggai kupkumen Manasye nenda gorosot aili ka rubat bagat oinan Kana. Sangamberi laggai ka isit ka kaiaman rubat bagat oinan nenda iate si Efraim sibakkatnia kenanen ainia ka bagat laggai kupkumen Manasye. Pasongan laggai kupkumen Manasye nenda tuppainia masitut enungan ka isit bare' rubat bagat oinan nenda, lepa kapplu ka Koat Tenga.

¹⁰ Kele kisedda te ai bara si Efraim ka isit ka kaiaman, samba si Manasye ka isit ka bare', samba ka Koat Tenga iate pasongandra ka isit kabelekat sulu. Ka usut buggei, laggai kupkumen suku Manasye nenda pasongandra iate laggai kupkumen Asyer, samba ka isit sikalaut bare', pasongandra laggai kupkumen Isakhar.

¹¹ Ka bagat laggai kupkumen Isakhar samba Asyer nenda ai polak bakkat Manasye, iate: Bet-Sean samba Jibleam samba leu et laggai-laggai sigoiso ka be'benia. Ia leu et: Dor (laggai kudduatnia ka be'bet koat), En-Dor, Taanakh, Megido pasamba desa-desa ka be'benia.

¹² Tapoi suku Manasye, ta amoi aratuituiake sikudduiji laggai nenda; nenda te lulunia tai Kanaan aipei le sia mulalaggai sedda.

¹³ Sarapei ka gogoi sibabara aramaron simakope tai Israel, ta aratuituiake sangamberi tai Kanaan, sarat arakau le sia mugalai ka tubudda.

Suku Efraim samba suku Manasye ka isit kabelekat sulu masitiddou tuppai polak

¹⁴ Muntogat Josep masikua kai Josua, “Angoi sangarubeiat le anuake kakai polak, kai nene bulat maigi, kalulut aipanukani kai si Tuhan?”

¹⁵ Aleginangan si Josua, “Kalulut makope igimui, samba kupkumen laggai simaleleu Efraim makopean le okkip kakam, kenan kam ka kupkumen laggaira tai Feris samba Refaim. Taddangan kam pulaggaijat sibau ka leleura sedda.”

¹⁶ Alegirangan muntogat Josep, “Kupkumen laggai simaleleu nenda lionia ta iaaili kai, beringan bangsa Kanaan sipulalaggai ka su'su ai kereta pasaggakdra laba – sangamberi sikuddu ka Bet-Sean samba ka desa-desa ka be'benia ia leu et sia sikuddu ka su'sut Jizreel.”

¹⁷ Iageti kuanangan si Josua ka tubut suku Efraim samba Manasye isit kabelekat sulu nenda, “Aisesengan, bulat maigi kam samba bulat maron kam, samba mateuan tuake kakam polak sangarubeiat legei.

¹⁸ Ala'an kam kupkumen laggai simaleleu kalulut kenanen poi kupkumen laggai nenda leleu sitaigagalaijet peile momoi nugalai kamnia kupkumen laggai nenda samba masibakkati sangalionia. Samba pagalaiat tai Kanaan nenda, momoi nutuituiake kam sia, kenanen maron sia samba ai kereta laba pasaggakdra.”