Jos. 15 - BUKO SIPUNENAN

Kupkumen laggai sinausau bakkatdra suku Jehuda

¹ Sangamberi sipulalalep sibara ka suku Jehuda masisilo' rubeiat polak pasongannia iate kele nene: Ka isit ka kaiaman, kupkumen laggai nenda simalio sege ka pangampulat bulat isit ka kaiaman kupkumen laggai susut ngai Zin ka pasongan Edom;

² barania ka pangampulat isit ka kaiaman Koat Simamatei,

³ teret ka isit ka kaiaman masisabau gilak leleu ka Akrabim sege ka Zin. Riuriu minca masisabau ka kaiaman Kades-Barnea, riuriu masisabau Hezron, sakai ka Ador, lepa geti bilu'ake minca ka ipot Karka.

⁴ Barania sedda riuriuake minca ka Azmon, lepa masitut rubat bagat oinan ka pasongan ka Misir, lepa geti kapplunia ka Koat Tenga. Kisedda te pasongan isit ka kaiaman kupkumen laggai bakkatdra suku Jehuda. Samba pasongan nenda bailiu leu et pasongan isit ka kaiaman tobbou laggai Israel.

⁵ Ka isit kabelaiat sulu, pasogannia iate Koat Simamatei, riuriu ka bare' sege ka mongan bagat oinan Jordan. Ka isit ka bare, pasongannia barania ka mongan bagat oinan Jordan nenda,

⁶ sakai ka Bet-Hogla, lepa riuriu ka pasongan su'sut Jordan. Barania seda pasongan ka bare' nenda sakai riuriu ka bare sege ka Bukku Bohan (Bohan iate togat Ruben),

⁷ lepa geti riuriu ka su'sut Pugejaat baga sege ka Debir, lepa bilu' minca ka bare' ka ipot Gilgal ka kudduat sipamamatai ka gilak leleu ka Adumim ka isit ka kaiaman su'su nenda. Barania sedda riuriuake minca ka bubuakat oinan En-Semes, lepa ka En-Rogel,

⁸ lepa geti sakai masisabau su'sut Hinom ka isit ka kaiaman tinambu, ka kudduat Jerusalem, laggaira tai Jebus. Barania ka pasongan nenda ailia ka uddut tinambu nenda ka isit kabelekat sulu su'sut Hinom, ka pangampulat ka bare' su'sut Rafaim,

⁹ lepa geti riuriu ka bubuakat oinan Me-Neftoah, sege ka laggai-laggai legret leleu Efron. Barania ka pasongan nenda kupkumen laggai nenda bilu'ake ka ipot Baala (iate Kiryat-Jearim),

¹⁰ samba bokkonangan rubeiat kabelekat sulu Baala ka ipot simaleleu ka Edom, lepa riuriu ka rubeiat ka bare' leleu Jearim (iate leleu Kesalon), samba gorosot ka Bet-Semes, lepa geti riuriu ka Timna.

¹¹ Barania ka Timna, ka pasongan nenda riuriuake minca aili ka isit ka bare leleu Ekron, lepa bilu'ake ka ipot Sikron, masisabau leleu Baala, riuriu ka Jabneel, samba kapplu ka Koat Tenga,

¹² sibailiu pasongan isit kabelekat sulu laggai kupkumen suku Jehuda. Ka bagat kupkumen laggai nenda kuddu sia sipulalalep sibara ka suku Jehuda.

Si Kaleb masioppu Hebron samba Debir

¹³ Siripot siparentaakenen Tuhan ka tubut Josua, sangarubeiat kupkumen laggai Jehuda ikau ka tubut Kaleb togat Jefune sibara ka suku Jehuda. Kaunangan ka tubunia Hebron, iate laggai bakkat Arba, ukkui Enak.

¹⁴ Muntogat Enak iate tai Sesai, Ahiman samba Talmai. Tuituiakenangan sia sangamberidra si Kaleb ka Hebron.

¹⁵ Barania sedda einia masisaggangi sipulalaggai ka Debir. (Laggai nenda siboiki amaagaian sibaliu Kiryat-Sefer.)

¹⁶ Kuanangan si Kaleb, “Kaisei sioi masioppu Kiryat-Sefer momoi iputalimou ka togakku sinanalep, si Akhsa.”

¹⁷ Si Otniel, togat sarainan Kaleb sipuoni si Kenas, masioppu laggai nenda; iageti si Kaleb masikau si Akhsa, togania ibailiu sinanalep Otniel.

¹⁸ Ka gogoi putalimougadra, si Otniel masitubbui si Akhsa bule itiddou sangamata polak ka ukkuinia. Iageti gorosot si Akhsa ka kaliddeinia, lepa si Kaleb masirereake ka tubunia, aponia kiddiet bagania.

¹⁹ Aleginangan si Akhsa, “Kuoba' bubuakat oinan, aipoi polak siakenu ukkui katubukku nenda ailenia ka addeat kupkumen laggai simagarak.” Iageti si Kaleb kaunangan ka tubunia bubuakat oinan ka rubeiat ka tiri' samba bubuakat oinan ka rubeiat ka taggurat.

Laggai Jehuda

²⁰ Nene te polak sikaunia katubutda sipulalalep ka suku Jehuda ibailiunia bakkatdra.

²¹ Sangamberi laggai simareunan ka isit ka kaiaman, sibailiu bakkat Jehuda, iate sikukuddu ka pasongan Edom, sangamberinia ai rua pulu siba laggai, samba leu palaggai-laggai bagei ka be'benia. Sangamberi laggai nenda iate: Kabzeel, Eder, Jagur,

²² Kina, Dimona, Adada,

²³ Kadesh, Hazor, Jitnan,

²⁴ Zif, Telem, Bealot,

²⁵ Hazor-Hadata, Keriot-Hezron, iate Hazor;

²⁶ Amam, Sema, Molada,

²⁷ Hazar-Gada, Hesmon, Bet-Pelet,

²⁸ Hazar-Sual, Bersyeba,

²⁹ Baala, Iyim, Ezem,

³⁰ Eltolad, Kesil, Horma,

³¹ Ziklag, Madmana, Sansana,

³² Lebaot, Silhim, Ain samba Rimon.

³³ Sangamberi laggai, samba leu sangamberi laggai sigoiso ka be'benia, sikuddu ka su'sut tinambu, sangamberinia ai pulu epat laggai, iate: Esytoal, Zora, Asna,

³⁴ Zanoah, En-Ganim, Tapuah, Enam,

³⁵ Jarmut, Adulam, Sokho, Azeka,

³⁶ Saaraim, Aditaim, Gedera samba Gederotaim.

³⁷ Ia leu et pulu enem laggai sangamberinia nene samba laggai bagei sigoiso ka be'benia: Zenan, Hadasa, Migdal-Gad,

³⁸ Dilean, Mizpa, Jokteel,

³⁹ Lakhis, Bozkat, Eglon,

⁴⁰ Khabon, Lahmas, Khitlis,

⁴¹ Gederot, Bet-Dagon, Naama samba Makeda.

⁴² Ia leu et siba laggai nene pasamba laggai sigoiso ka be'benia: Libna, Eter, Asan,

⁴³ Jiftah, Asna, Nezib,

⁴⁴ Kehila, Akhzib samba Maresa.

⁴⁵ Ia leu et Ekron pasamba laggai sigoiso bagei,

⁴⁶ samba leu sangamberi laggai sabeu samba laggai sigoiso ka be'bet Asdod, barania ka Ekron teret ka Koat Tenga.

⁴⁷ Kasedda leu et Asdod samba Gaza samba laggai sigoiso bagei sipunganganang pat aili ka be'bet rubat bagat oinan ka pasongan Misir samba be'bet Koat Tenga.

⁴⁸ Kupkumen laggai simaleleu ai pulu sara laggai sabeu samba ka be'benia aileu laggai sigoiso: Samir, Jatir, Sokho,

⁴⁹ Dana, Kiryat-Sana (iate Debir),

⁵⁰ Anab, Estemoa, Amin,

⁵¹ Gosyen, Holon samba Gilo.

⁵² Ia leu et siba laggai sabeu samba leu et laggai sigoiso ka be'benia: Arab, Duma, Esan,

⁵³ Janum, Bet-Tapuah, Afeka,

⁵⁴ Hunta, Kiryat-Arba (iate Hebron) samba Zior.

⁵⁵ Ia leu et pulu laggai sabeu samba leu et laggai sigoiso ka be'benia: Maon, Karmel, Zif, Juta,

⁵⁶ Jizreel, Jokdeam, Zanoah,

⁵⁷ Kain, Gibea samba Timna.

⁵⁸ Samba enem laggai sabeu samba leu et sangamberi laggai sigoiso ka be'benia: Halhul, Bet-Zur, Gedor,

⁵⁹ Maarat, Bet-Anot samba Eltekon.

⁶⁰ Ia leu et ruania laggai sabeu samba sangamberi laggai sigoiso ka be'benia: Laggai Kiryat-Baal (iate Kiryat-Jearim) samba Laggai Raba.

⁶¹ Ka kupkumen laggai ka simatangeu ai enem laggai iate sangamberi laggai sigoiso ka be'benia: Bet-Araba, Midin, Sekhakha,

⁶² Nibsan, Laggai Garam samba En-Gedi.

⁶³ Laggai Jerusalem bakkadda leu et tai Jehuda, tapoi tai Jehuda ta amoi aratuituiake tai Jebus sikuddu sedda. Teret kineneiget tai Jebus ai peile sia mukuddu simakere ka laggai nenda.