Jos. 14 - BUKO SIPUNENAN

Parubeiat kupkumen laggai isit kabelekat sulu bagat oinan Jordan

¹ Nene iate pagalaiat kipa araparubei tobbou laggai Kanaan katubutda paamian Israel ka isit kabelekat sulu bagat oinan Jordan. Amasiparubei polak nenda katubutda paamian Israel iate imam Eleazar, Josua togat Nun, samba ukkui ka sipulalalep ka bagat sangamberi suku bangsa Israel.

² Kipa siparentaakenen Tuhan ka tubut Mose, sangamberi kupkumen laggai ka isit kabelekat sulu bagat oinan Jordan siteuakenen ka siba sitenga suku bangsa Israel, bui ta'tuparubei masigalai pauktungan.

³ Polak ka isit kabelaiat sulu bagat oinan Jordan aikauan si Mose katubutda rua sitenga suku bangsa bagei nenda. (Mateu le itusuratnake sene aipoi muntogat Josep dua ngarubeiat suku: suku Manasye samba suku Efraim.) Pagalaiat suku Lewi, ta'anai polak aikau si Mose katubutda.

⁴ Sarat kudduat pulaggaiat le aikau, pasamba polak simalio kudduat jaui samba biribiridra.

⁵ Kisedda te araparubei polak paamian Israel siripot siparentaakenen Tuhan ka tubut Mose.

Hebron tukau ka tubut Kaleb

⁶ Ka sara gogoi sia sibara ka suku Jehuda moi masiailiake si Josua ka Gilgal. Ai sara sibara ka talagdra iate si Kaleb togat Jefune tai Kenas, masikua, “Josua! Nuagai apa sikuat Tuhan kai Mose, Pakoinien Taikamanua nenda, ka Kades-Barnea pagalaiat ekeu samba aku.

⁷ Rurakku epat pulu ngarura ka teteret aikoiniake aku si Mose, pagugulet Tuhan nenda kuei ka Kades-Barnea masitaiko laggai nene. Samba toili aku ka tubunia samba segeakekungan sibulatnia sangamberi siitcoku.

⁸ Sia sieei pasamba aku, aragalai le masiloto paamian Israel. Tapoi aku mariuriu topitku masireddet Tuhan Taikamanuangku.

⁹ Samba kalulut nenda paleleknangan si Mose aipoi polak sigejengingku bulatnia iaake katubukku samba ibailiunia bakkatdra tatogakku teret buru-buru.

¹⁰ Kineneiget ai ailingan epat pulu lima ngarura burunia aikua pagalaiat nenda si Tuhan ka tubut Mose. Aipuaili nenda ka teteret bangsa Israel ai sia musisila ka simatangeu. Samba kele sipinaleleknia si Tuhan, ipasikeli aku, bailiunangan teret kineneiget ai pei le aku muririmanua. Kineneiget rurakku aiailingan balu pulu lima ngarurangan,

¹¹ tapoi maron peile tubukku kele ka teteret aikoiniake aku si Mose. Ai peile ron tubukku pasaggak ele masigalai apapa'.

¹² Kalulut nenda, ake'an le kineneiget kupkumen laggai simaleleu kele sipinalelek Tuhan katubukku ka teteret aku toili kai saaleiku akusegeake kai siitcomai. Ka teteret nenda anuarepman, kababaradra sedda bangsa raksasa kuanenda bangsa Enak. Kudduatdra ka bagat laggai sabeu sibara irip bukku. Kupaatu iropmake aku si Tuhan, bailiu oinangan kutuituiake sia, kele sikuat si Tuhan.”

¹³ Oto si Josua panukaninangan si Kaleb togat Jefune, lepa kaunangan katubutda laggai Hebron ibailiu polak bakkatdra.

¹⁴ Teret kineneiget laggai nenda ai peile rababakkati sia muntogat Kaleb togat Jefune, tai Kenas nenda, kalulut topit samba reddetdra kai Tuhan Taikamanuan Israel.

¹⁵ Siburu Hebron oninia laggai Arba. (Arba iate sirimanua simakope beunan sibara ka talagat bangsa Enak.) Iageti tobbou laggai nenda bulat maaman le kalulut ta'an anai pasaggangan.