Jos. 13 - BUKO SIPUNENAN

Kupkumen laggai oppuet peile

¹ Kineneiget amakopeat bajania si Josua. Kuanangan si Tuhan kai Josua, “Amabaja'an ekeu, Josua! Tapoi maigi peile kupkumen laggai bulat oppuet:

² sangalio laggai kupkumen Filistin samba Gesur,

³ samba kupkumen Awi ipot ka kaiaman. Kupkumen laggai ka bagat oinan Sikhor ka pasongan Misir sege ka pasongan Ekron isit ka bare, sangalionia nenda kupkumen laggai bangsa Kanaan; samba tai rimatada tai Filistin sikuddu ka Gaza, Asdod, Askelon, Gat samba Ekron.

⁴ Ia leu et ai peile bulat oppuet: sangaliot kupkumen laggai Kanaan samba Meara (bakkat bangsa Sidon), sege ka Afek ka pasongan kupkumen laggai bangsa Amori;

⁵ ia leu et minca kupkumen laggai bangsa Gebal, samba sangamberi kupkumen laggai Libanon ka ipot kabelaiat sulu, sibara ka Baal-Gad ka isit ka kaiaman leleu Hermon teret sege ka enungan sieei ka Hamat.

⁶ Ia leu et sangaliot kupkumen laggaira tai Sidon, sikuddu ka kupkumen laggai simaleleu oggak sangamberi leleu Libanon samba Misrefot-Maim.” “Sangamberi bangsa nenda te Kututuituiake, ka teteret rasaggangi sia paamian Israel.” Kuanangan minca kai Josua si Tuhan. Polak nenda bui ta nuparubei ka tubudda paamian Israel bule ibailiunia polak bakkatdra, kele siparentaakenenKu ka tubum.

⁷ Oto, kineneiget rubeiake polak nenda ka tubut siba suku ka bangsa Israel, samba katubutda iletalaga sibara ka suku Manasye, bule polak nenda ibailiunia bakkatdra.”

Parubeiat polak ka kupkumen laggai isit kabelaiat sulu bagat oinan Jordan

⁸ Suku Ruben samba Gad samba leu iletalaga suku Manasye arasiloan rubeiat polak sibara kai Mose, pagugulet Tuhan nenda; iate polak ka isit kabelaiat sulu bagat oinan Jordan.

⁹ Laggai kupkumendra iaili Aroër (ka be'bet su'sut bagat oinan Arnon), samba laggai ka tengan su'su nenda. Ia leu et sangaliot kupkumen laggai su'su leleu barania Madeba sege ka Dibon

¹⁰ samba aili ka pasongan kupkumen laggai Amon, samba leu et sagamberi laggai sikupkupdra siboiki tai Sihon, rimata Amori sikuddu ka Hesybon.

¹¹ Ia leu et kupkumen laggai Gilead, kupkumen laggai pabe'beakenen Gesur samba Maakha, samba leu et sangaliot leleu Hermon, samba sangaliot kupkumen laggai Basan aili ka Salkha.

¹² Kupkumen laggaira leu et iaili kupkumen laggai pasikeliet rimata Og, tai Refaim sipupaparenta sikateitei ka Asytarot samba Edrei. Aikalaakean sia si Mose sangamberi bangsa nenda samba aituituiakean sia rabela ka kupkumen laggaira.

¹³ Tapoi sipulalaggai ka Gesur samba Maakha ta'aratuituiake sia tai Israel; ai peile sia mukukuddu ka Israel.

¹⁴ Suku Lewi ta'ara silo rubeiat polak sibara kai Mose, kalulut aikuangan si Tuhan ka tubut Mose rubeiat suku Lewi iate sibara ka sangamberi buluakenen sirarak ka kudduat pasibuluat kai Tuhan Taikamanuan Israel.

Kupkumen laggai sisau'sau' addeat Ruben

¹⁵ Sangarubeiat ka polak sipalelek Tuhan ka tubudda paamian Israel nenda ai kauan si Mose ka tubudda sipulalalep ka suku Ruben, addeat ibailiunia polak bakkadda.

¹⁶ Laggai kupkumenda nenda iaili Aroër (ka be'bet su'sut bagat oinan Arnon) samba laggai ka tengan su'sut nenda sege ka sangaliot leleu simasu'su ka legret Madeba;

¹⁷ samba leu et Hesybon samba sangamberi laggai ka leleu simasu'su nenda, iate Dibon, Bamot-Baal, Bet-Baal-Meon,

¹⁸ Jahas, Kedemot, Mefaat,

¹⁹ Kiryataim, Sibma, Zeret-Hasahar sikuddu ka uddut tinambu ka su'su nenda,

²⁰ Bet-Peor, gilak leleu Pisga, samba Bet-Jesimot.

²¹ Lepa geti minca ka sangamberi laggai leleu simasu'su nenda samba sangaliot kupkumen laggai pasikeliet Sihon, rimatadda bangsa Amori, sikuddu siburu ka Hesybon. Nia samba sangamberi rimata ka Midian leu et, iate: Ewi, Rekem, Zur, Hur samba Reba, aikalaakean sia si Mose. Sangamberi rimata nenda amuparenta sia ka tobbou laggai nenda addeat rimata Sihon.

²² Ka talagadda sirimanua simateiakenenda bangsa Israel ai leu et si Bileam togat Beor, sipamomoiliat.

²³ Bagat oinan Jordan aibailiuan pasongan rubeiat isit kabelekat sulu laggai kupkumen suku Ruben. Nene te sangamberi laggai samba sangamberi laggai sigoiso sikaunia ka tubut sipulalalep ka suku Ruben bule ibailiunia polak bakkatdra.

Kupkumen laggai sisau'sau' addeat suku Gad

²⁴ Sangarubeiat ka polak sipalelek Tuhan ka tubudda paamian Israel nenda aikauan leu et si Mose ka tubudda sipulalalep ka suku Gad, bule ibailiunia bakkatdra.

²⁵ Laggai kupkumenda iaili Jaezer samba sangamberi laggai ka Gilead samba leu iletalaga sibara ka kupkumen laggai bangsa Amon sege kele reunan Aro''er ka isit kabelaiat sulu Raba;

²⁶ kupkumen laggai Hesybon sege ka Ramat-Mispa samba Betonim, samba leu kupkumen sibara ka Mahanaim sege ka pasongan Lodebar, sangamberinia nenda leu et addeat laggai kupkumen suku Gad.

²⁷ Ka su'sut Jordan, laggai kupkumen suku Gad nenda iaili Bet-Haram, Sukot samba Zafon, iate be'bet kupkumen laggai pasikeliet rimata Sihon ka Hesybon. Ka pasongan rubeiat ka isit kabelekat sulu laggai kupkumen suku Gad nenda iate bagat oinan Jordan sege kele reunan Danau Galilea ka isit ka bare'.

²⁸ Nenda te sangamberi laggai samba sangamberi laggai sigoiso sikaunia ka tubut sipulalalep ka suku Gad bule ibailiunia polak bakkatdra.

Kupkumen laggai ka isit kabelaiat sulu bagat oinan Jordan sinausau' rubeiat suku Manasye

²⁹ Sangarubeiat ka polak sipalelek Tuhan ka tubudda paamian Israel nenda aikauan leu et si Mose ka sipulalalep iletalaga sibara ka suku Manasye bule ibailiunia bakkatdra.

³⁰ Sangamberi pasongan laggai kupkumendra sege ka Mahanaim, samba leu et sangaliot Basan – iate sangaliot laggai kupkumen pasikeliet Og, rimata Basan, samba leu et enem pulu laggai pagoiso-goiso Jair ka Basan.

³¹ Lepa nenda tuadde leu et iletalaga kupkumen laggai Gilead, samba leu Asytarot samba Edrei, iate rua laggai sabeu laggai kupkumen pasikeliet rimata Og ka Basan. Sangaliot kupkumen laggai nenda kaunangannia katubutda iletalaga sibara ka sipulalalep muntogat Makhir, togat Manasye.

³² Kasedda te si Mose masiparubei polak ka isit kabelaiat sulu Jerikho, ka silat bagat oinan Jordan, ka teteret ai sia ka su'sut Moab.

³³ Tapoi suku Lewi ta'anai rubeiat polak beri goiso sibara kai Mose. Aikua le si Mose ka tubudra aipoi rubeiat sikaunia katubutda iate sibara ka buluakenen sipanguruatnakenen ka tubut Tuhan Taikamanuan Israel.