Jos. 11 - BUKO SIPUNENAN

Si Josua masikalaake Jabin

¹ Kele aiarep rimata Jabin sibara ka Hazor pagalaiat kamanangan Israel, koiniakenangan sia ka tubut rimata Jobab sibara ka laggai Madon, ka tubudda sangamberi rimata laggai Simron samba Akhsaf,

² ka tubudda rimata ka simaleleu isit ka bare', ka guluggu Jordan isit ka kaiaman Galilea, ka kupkumen laggai ka su'sut simaleleu, samba ka kupkumen laggai ka be'bet koat be'bet Dor.

³ Nia leu et masikoiniake sia ka tubudda tai Kanaan ka isit kabelekat sulu samba ka isit kabelaiat sulu Jordan, katubudda tai Amori, Het, Feris samba tai Jebus ka kupkumen laggai simaleleu, samba leu tai Hewi ka gilak leleu Hermon ka kupkumen laggai Mizpa.

⁴ Iageti oirangan leu tai rimata nenda pasamba sangamberi saladruda simakope igi kele igit ngai' ka be'bet koat. Kuro' samba kereta pasaggak leu et makope igi.

⁵ Sangamberi tai rimata nenda parururangan samba pukuddurangan simakere ka legret rubat bagat oinan Meron, bule rasaggangi tai Israel.

⁶ Kuanangan si Tuhan ka tubut Josua, “Bui numaloto katubutda. Ka teteret kele nene mancep, sangamberidra Kumamateiake sia kalulut Israel. Kuro'ra bui ta nukau imaluluk, samba sangamberi kereta pasaggakra bui ta nulabo.”

⁷ Iageti si Josua pasamba sangamberi saladrunia masisaggangi tai saggak nenda sige'ge' legret rubat bagat oinan Merom.

⁸ Samba kaunangan si Tuhan kamanangan ka tai Israel. Saggangirangan sia samba kukrurangan sia pat aili ka Misrefot-Maim samba Sidon ka isit ka bare, samba ka Guluggu Mizpa ka isit kabelaiat sulu. Riuriuakerangan pasaggak, teret sappru sia tai saggak ramateiake sia sangamberidra.

⁹ Galaiakenangan katubutda Si Josua siripot siparentaakenen Tuhan: kaunangan imaluluk kuro'ra, samba labonangan sangamberi kereta pasaggakdra.

¹⁰ Lepa toili si Josua, iageti oppunangan Hazor ka teteret nenda iate simakope ron ka sangamberi purimataat sedda.

¹¹ Labonangan laggai nenda, samba leu rimata samba sangamberi sipulaggai sedda mateiakenangan sia; ta'anai sia sara iobaake murimanua.

¹² Sangamberi laggai nenda ioppu si Josua, samba sangamberi rimata labanangan sia samba mateiakenangan sia kele siripot parenta Mose, pagugulet Tuhan.

¹³ Tapoi sangamberi laggai sirioaknen ka uddut sangamberi tinambu karaganan, ta'anai berisara aralabo tai Israel, sarat Hazor le ailabo si Josua.

¹⁴ Sangamberi sikudduiji laggai nenda mateiakenangan sia; ta'anai sia sara iobaake murimanua. Tapoi sangamberi bibiletdra simakeppu saki samba tarimeura alarangannia tai Israel ibailiu bakkatdra.

¹⁵ Sangamberi siparentaakenen Tuhan kai Mose, paguguletNia aisegeakean si Mose katubut Josua, samba aigalaiakean si Josua; ta'anai sara ta aigalaiake.

Kupkumen laggai siopput Josua

¹⁶ Si Josua masioppu sangaliot kupkumen laggai nenda – tobbou laggai simaleleu, tobbou laggai su'sut leleu, kele isit ka bare ia leu et ka isit ka kaiaman; samba sangaliot kupkumen Gosyen samba kupkumen laggai su'su simagarak ka isit ka kaiaman Gosyen, samba leu guluggu Jordan.

¹⁷ Kupkumen laggai nenda lionia barania ka simaleleu Gundul ka isit ka kaiaman legret Edom, sege ka isit ka bare' sege ka Baal-Gad ka su'su Hermon.

¹⁸ Bulat maburu' aipasaggak si Josua pasamba sia rimata kupkumen laggai nenda, tapoi kalepakatnia labanangan sia samba mateiakenangan sia sangamberidra.

¹⁹ Ka sangamberi laggai ka sangalio kupkumen laggai nenda, ta'anai sara laggai sigalai palelengan paaleijat ka tai Israel, sarat Gibeon le, laggai bangsa Hewi. Sangamberi laggai bagei ikalaake ka bagat pasaggangan.

²⁰ Aikau le ramakela patuat si Tuhan bule pasaggak sia pasamba tai Israel, bule tutata'ake sia samba tumateiake sangamberidra siripot siparentaakenen Tuhan ka tubut Mose.

²¹ Ka teteret nene leu et ei si Josua masipakatai bangsa Enak, iate bangsa raksasa sikuddu ka kupkumen laggai simaleleu ka Hebron, Debir, Anab, samba ka sangaliot kupkumen laggai simaleleu ka Jehuda samba Israel. Sangamberidra pamateinangan sia si Josua, samba sangamberi laggaira pakatainangannia.

²² Ta'anai poi sia sara sibara ka bangsa Enak nenda sipulelegei ka kupkumen laggaira tai Israel, sarat ka Gaza, Gat, samba Asdod ai peile sia.

²³ Oppunangan sangaliot kupkumen laggai nenda si Josua siripot parenta Tuhan ka tubut Mose, iageti kaunangannia ka bangsa Israel ibailiu bakkatdra. Parubeinangan tobbou laggai nenda, samba senen suku ai sangarubeijat. Bangsa Israel leu et puarirangan pasaggak samba tobbou laggaira maaman le.