Jos. 10 - BUKO SIPUNENAN

Rakalaake tai Amori

¹ Adoni-Zedek, rimata ka Jerusalem, masiarep aioppu samba aipakatai sangamberinia laggai Ai si Josua, samba leu masimateiake rimatania kele sigalaiakenennia ka Jerikho samba rimatania. Aiarepman leu et aragalai palelengan pasuruangandra tai Israel ka tai Gibeon samba kukudduda ka talagadra.

² Bulat maloto sia sipulaggai ka Jerusalem, kalulut Gibeon iate laggai sabeu; makere le beunannia laggai-laggai sibara rimata, bele pei beunan laggai Ai. Sirimanua leu et simaagai enungan pasaggak.

³ Kalulut nenda Adoni-Zedek masikoiniake sia ka tubut rimata Hoham ka Hebron, rimata Piream ka Jarmut, Rimata Jafia ka Lakhis, samba Rimata Debir ka Eglon, masiambit patonekat nene,

⁴ “Konan kam masiropmake aku masisaggangi Gibeon, kalulut sia tai Gibeon aragalaian palelengan pasuruangandra kai Josua samba ka tai Israel.”

⁵ Iageti limandra rimata Amori nenda, iate rimata Jerusalem, Hebron, Jarmut, Lakhis samba Eglon patadderangan, lepa pasamba sangamberi saladruda, goilikrangan sia samba saggangirangan tai Gibeon.

⁶ Tai Gibeon masikau katuareman nene ka tubut Josua ka pusapougat ka Gilgal, “Bui nuobaake kai saramai, Tuan! Konan kam simaola masiropmake kai, kalulut saladru sibara ka sangamberi rimata Amori ka kupkumen laggai simaigi leleu aparuruan sia masisaggangi kai!”

⁷ Lepa si Josua samba sangamberi saladrunia, samba leu sia saladrunia simakope eru, tuitui sia baradda ka Gilgal raei pasaggak.

⁸ Kuanangan si Tuhan ka tubut Josua, “Bui numaloto kam ka tubudda. Akuakean ka tubum kamanangan, oto kalulut nenda ta'anai beri sia sara momoi masisaggangi kam.”

⁹ Sangasoibo arapuenung saladdu samba si Josua baradda ka Gilgal masialiake Gibeon, iageti saggangirangan tai Amori sige'ge'.

¹⁰ Galainangan si Tuhan ibailiu maingo tai Amori ka teteret araitco saladru Israel. Maigi sia tai Amori aramateiake ka Gibeon, samba kukrurangan sabagei ka gilak leleu ka Bet-Horon sege ka Azeka samba Makeda ka isit ka kaiaman.

¹¹ Ka teteret airagogorosoni gilak leleu tai Amori raputuitui ka tai saladru Israel, beleakenangan urat es bulat sabeu si Tuhan katubutda sibara ka manua ka sanganantat enungan sisege ka Azeka. Simamatei sisaksak urat es peile maigi ka simateiakenenda sia tai Israel.

¹² Ka gogoi nenda ka teteret aikau si Tuhan kamanangan ka tubudda tai Israel arasaggangi tai Amori, panibonangan si Josua katubut Tuhan, samba kamatadda sangamberi tai Israel, kuanangannia si Josua, “Ale sulu! Ariake ekeu ka ipot Gibeon. Samba ekeu laggo! Bui nuturitci ka ipot Guluggu Ayalon.”

¹³ Iageti puarinangan sulu samba laggo ta'an aturitci teret kapplu rakalaake sangamberi saggakdra tai Israel. Sipuaaili nene atusuratnakean ka Buko Jasar. Sangagogoi ai puari sulu ka tengan manua, samba bulat maburu aitusone.

¹⁴ Ta'pei amuaili kele nene samba leu et ta'an muaaili ka sara gogoi kele gogoi nenda, itutnake si Tuhan siobat sirimanua. Si Tuhan le apasaggak isaggangi saggakdra tai Israel!

¹⁵ Kele ailepa pasaggangan nenda, toili si Josua samba saladdunia ka pusapougat ka Gilgal.

Si Josua masilaba lima rimatadda tai Amori

¹⁶ Tapoi lima rimatadda tai Amori putuituirangan samba pulipputdrangan ka bagat sara ngaliu ka Makeda.

¹⁷ Itcorangan sia sirimanua, samba paagairangan kudduat pulippunanda ka tubut Josua.

¹⁸ Kuanangan si Josua, “Guiluake sangamberi bukku sabeu ka ngaliu nenda, samba kudduakemuian sipasijajago sedda,

¹⁹ tapoi bui nupuari kam sedda. Kukru kam sia, saggangi kam baramui ka teiteira; bui nuobaake kam ratuguru ka laggaira! Aiakean kamanangam ka tubumui Tuhan Taikamanuamui.”

²⁰ Si Josua samba tai Israel masimateiake tai Amori nenda, tapoi ai leu et ka talagdra amutuitui ka laggaira masigaba pulippunan, bailiunangan ta atumateiake.

²¹ Lepa geti toili sia saladrut Josua ka pusapougat ka Makeda. Ta'anai sia sara ka laggai nenda magege masikua apapa' masilauan tai Israel.

²² Kele ailepa nenda kuanangan si Josua, “Kineneiget buka kam matat lobok ngaliu nenda samba ambit kam sia sene si lima rimata nenda.”

²³ Bukarangan ngaliu nenda, iageti sia rimata Jerusalem, Hebron, Jarmut, Lakhis samba Eglon ambitrangan sia ka uja,

²⁴ samba abbitrangan sia kai Josua. Lepa sogainangan sangamberi tai Israel si Josua raparuru, lepa geti parentaakenangan tai utet saladdu sipasasaggak pasamba nia moi masipera' lolokkadda tai rimata nenda. Sia tai utet saladdu nenda leu et oi sia samba perakrangan lolokkadda tai rimata nenda.

²⁵ Kele ai lepa nenda, kuanangan si Josua katubutda sia tai utet saladdunia, “Bui numasedde samba bui numaloto kam. Kau le matonem bagamui samba numagege kam, kalulut kele kise te igagalaiake si Tuhan ka sangamberi saggakmui.”

²⁶ Lepa mateiakenangan sia tai rimata nenda si Josua samba toakngakenangan sia ka si lima arigi. Tubudda simamatei nenda kuddu sedda pat aili kasoibokat.

²⁷ Ka teteret itusone sulu, parentaakenangan sia si Josua bule itugorosotnake tubudda siamamatei nenda samba turibbaiake ka kudduat pulippunanda. Lepa geti kaurangan bukku sabeu petpet ngaliu nenda. Teret kineneiget sangamberi bukku nenda ai peile sedda.

Si Josua masioppu minca simigi kupkumen laggai Amori

²⁸ Gogoi nenda sagganginangan si Josua laggai Makeda, samba kalaakenangan laggai nenda samba leu rimatania. Sangamberi sikuddu ka laggai nenda mateiakenangannia; ta'anai sia aiobaake murimanua. Galaiakenangan ka tubut rimata Makeda si Josua masigalaiake kele sigalaiakenennia ka rimata Jerikho.

²⁹ Kele ailepa nenda, si Josua pasaba saladrunia riuriuakerangan muenung baradda ka Makeda ka Libna samba saggangirangan Libna.

³⁰ Kaunangan leu et kamanangan ka tai Israel si Tuhan arasaggangi laggai nene samba rimatania. Ta'anai sia sara leu raobaake murimanua, sangamberi sirimanua ka bagat laggai nenda mateiakerangan sia. Galaiakenangan ka tubut rimata laggai nenda si Josua kele sigalaiakenennia ka rimata Jerikho.

³¹ Lepa geti bela si Josua samba saladrunia baradda ka Libna raei ka Lakhis. Goilikrangan laggai nenda iageti saggangirangannnia.

³² Kaunangan kamanangan si Tuhan ka tai Israel arasaggangi Lakhis ka gogoi sikaruania. Apa sigalaiakenenda ka Libna, ia leu et aragalaiake ka Lakhis; ta'anai sia sara leu raobaake murimanua, sangamberidra mateiakerangan sia.

³³ Horam, rimata Gezer oi nia masiropmake tai Lakhis, tapoi si Josua masikalaakenia samba saladrunia; ta'anai sara sipulelegei, sangamberidra matei.

³⁴ Lepa geti, si Josua pasamba saladrunia tuitui sia baradda ka Lakhis raei ka Eglon lepa bokkorangan samba saggangirangan laggai nenda.

³⁵ Ka gogoi nenda leu et saggangirangan Eglon, samba mateiakerangan sangamberi sirimanua sedda kele sigalaiakenendra ka Lakhis.

³⁶ Baradda ka Eglon, si Josua samba saladrunia masitatra simaleleu samba ei sia ka laggai Hebron, iageti saggangirangan,

³⁷ samba oppurangan laggai nenda. Rimatania samba senen sirimanua ka laggai nenda samba ka laggai bagei ka be'benia sedda sangamberidra mateiakerangan sia. Pakatainangan laggai nenda si Josua, kele sigalaiakenennia ka laggai Eglon. Ta'anai sia sara aiobaake murimanua.

³⁸ Kele ailepa nenda, si Josua samba saladrunia toili sia samba saggangirangan Debir.

³⁹ Laggai samba rimatania samba leu sangamberi laggai bagei ka be'benia sedda oppunangannia si Josua. Sangamberi sirimanua sedda mateiakerangan sia. Galaiakenangan si Josua ka tubut Debir samba rimatania kele sigalaiakenennia ka Hebron samba Libna samba leu ka rimatania.

⁴⁰ Sangaliot tobbou laggai nenda ai kalaakean si Josua. Kalaakenangan sangamberi rimata ka kupkumen laggai simaleleu, ka sangamberi gilak tinambu isit kabelaiat sulu, ka su'sut leleu isit kabelekat sulu, samba ka sangamberi su'su isit ka kaiaman. Ta'anai sia sara aiobaake murimanua; sangamberidda mateiakenangan sia. Nenda siripot parenta sibara kai Tuhan, Taikamanuan Israel.

⁴¹ Si Josua masikalaake kupkumen laggai barania ka Kades-Barnea ka isit ka kaiaman aili ka Gaza ka legret kupkumen laggai be'bet koat, samba sangaliot kupkumen laggai Gosyen, teret sege ka Gibeon ka isit ka bare'.

⁴² Ka bagat sangaminca le aipasaggak, si Josua masikalaake sangamberi rimata samba masioppu kupkumen laggai pasikelietda, kalulut Tuhan Taikamanua Israel le, apasaggak aisaggangi saggakdra tai Israel.

⁴³ Kele ailepa nenda, toili si Josua samba saladrunia ka pusapougat ka Gilgal.