Jos. 1 - BUKO SIPUNENAN

Taikamanua masikoiniake si Josua bule ioppu laggai Kanaan

¹ Lepat kamateiat Mose, pagugulet Tuhan nenda, kuanangan si Tuhan kai Josua togat Nun, pagugulet Mose, kise:

² Kuanangan si Tuhan, “PaguguletKu si Mose amateiannia. Oto kineneiget patarek tubum samba leu sangamberi paamian Israel bule nutalipoki kam bagat oinan Jordan, samba nuguruki kam laggai kaunenKu katubutda.

³ Alepa'an Akukuania kai Mose, senen laggai siperakmui Akuakean ka tubum, kai Josua, samba ka sangamberi paamianKu.

⁴ Malionangan te geti kupkumen laggaimui barania ka simatangeu isit ka kaiaman sege ka simaleleu Libanon ka isit ka bare samba barania bagat oinan Efrat sabeu nenda isit kabelaiat sulu kupkupnangan tobbou laggai bangsa Het sege ka Laut Tengah ka isit kabelekat sulu.

⁵ Ta' anai berisara sia momoi masikalaake ekeu, Josua, ka burut purimanuaiatnu. Kalulut Aku masipaalei ekeu kele siboiki Aku paalei si Mose. Ta' Kukakaddiuake ekeu.

⁶ Kau le matonem bagam samba numagege, kalulut ekeu te masiuute'ake bangsa nene teteret rakudduiji tobbou laggai sipinalelekKu ka taikebukatdra.

⁷ Sarat kau le matonem bagam samba numagege. Bui ta nujago bule nureddet sangamberi surukat siaket Mose ka tubum paguguletKu nenda, bui nupasabaunia beri goiso, bule numauktuk.

⁸ Buko surukat nenda bui ta'mariuriu nubasaake ka tubutdra paamianKu. Gelai le buko nenda sinago samba sinoibo, bule mariuriu nugalaiake sangamberi sitususurat ka bagania. Ke nugalaiake sangamberinia nenda, maerunangan purimanuaiatnu samba mauktuknungan.

⁹ Repdem, Akuakean parenta ka tubum bule numatonem baga samba numagege! Bui numaloto ele numasaggo, kalulut Aku Tuhan Taikamanuam masipaalei ekeu ka senen eijanannu.”

Si Josua masikau parenta samba enungan ka paamian Israel

¹⁰ Iageti parentaakenangan sangamberi siuteake paamian Israel si Josua

¹¹ bule rabokko sangamberi pusapougat paamian Israel samba masikau parenta nene, “Patarek kam balut, kalulut aile telu ngagogoi nutalipoki kam bagat oinan Jordan bule nukudduiji kam laggai akenen Tuhan Taikamanuamui ka kam.”

¹² Ka sia suku Ruben, suku Gad, samba iletalaga suku Manasye, kuanangan si Josua,

¹³ “Repdem, aikuangan si Mose pagugulet Tuhan nenda ka tubumui, polak ka isit kabelaiat sulu bagat oinan Jordan nene aiakean Tuhan Taikamanuamui ka tubumui ibailiunia laggaimui.

¹⁴ Sangamberi tatoga samba tainanalepmui samba tarimeumui momoi rakuddu sene, tapoi sia tai saladdu bui ta matarek pasaggak samba muboiki ka tai Israel sabagei masitalipoki bagat oinan Jordan.

¹⁵ Sangamberimui bui' ta nuropmake kam sia teret rakudduiji polak ka isit kabelekat sulu bagat oinan Jordan nene akenen Tuhan Taikamanuamui ka tubutdra. Aiakean geti si Tuhan puaaman ka sangalio bangsa Israel, momoian nutoili kam minca ka laggaimui ka isit kabelaiat sulu bagat oinan Jordan nene, siaket Mose pagugulet Tuhan nenda ka tubumui.”

¹⁶ Iageti suku Ruben, Gad samba iletalaga suku Manasye nenda masialegi, “Apa le siparentaakenennu ka tubumai, kugagalaiake kai, samba kaipa le nukoiniake kai, ei maian leu et.

¹⁷ Mareddet le kai ka tubum, kele riuriu reddetmai ka tubut Mose. Bule si Tuhan Taikamanuam masipaalei ekeu kele ipaalei si Mose!

¹⁸ Senen sirimanua sitaioba masitut parenta samba tiboietnu, tuukumake le nia ukum simateiakenen. Kau le matonem bagam samba numagege!”