Jon. 3 - BUKO SIPUNENAN

Si Jona Masireddet Tuhan

¹ Panibonangan sikaruania si Tuhan kai Jona.

² Kuanangan: “Kenan ka Niniwe, laggai sabeu nenda samba segeake tiboietku kele sikuakku katubum.”

³ Iageti reddetnangan si Jona sikuat Tuhan, einangan leu ka Niniwe, sar laggai bulat sabeu; telu ngagogoi tuenunginia.

⁴ Gurukinangan leu laggai sabeu nenda si Jona samba lepat aienunginia sangagogoi, taddaakenangan masikua ka tai Niniwe, kuanangan, “Aile epat puluh ngagogoi, imaanau Niniwe nene!”

⁵ Tai Niniwe matonem bagadda ka sitiboi Taikamanua, lulut nenda sangamberi tai Niniwe masiteuake mupuaso, taigoiso samba sabeu, masipakei komang goni masipatoila olei bagadda ka joddra.

⁶ Kele aisege katuareman nene ka rimatadra tai Niniwe, tugorosotnangan ka kudduat purimataatnia. Bukanangan leppei purimataatnia samba leppeiakenangan goni, iageti kuddunia ka abu.

⁷ Ia leuet kalulut parentania rimata samba sangamberi siabeu tiboi tubu kapurimataatnia, segeakerangan sapakoinietdra, kuarangan: “Sangamberi sirimanua, jaui, biribiri samba tarimeu bagei, tamomoi mukom samba mulo.

⁸ Sirimanua samba tarimeu bui tamasipakei komang goni. Sibailiu toggaiat olei baga sangamberi sirimanua bui' tamanindou bulat sibulatnia ka Taikamanua. Sangamberi bui tarapaeru paraboat sikatai samba galai tubu simasun jo.

⁹ Bule Taikamanua isili pinatuNia samba taan mugogoluNia, bailiu taimasubuttangan!”

¹⁰ Oto Taikamanua itconangan sigalaira; aragalakakean paraboatdra sikatai. Iageti silinangan galaiakenenNia samba tak amuriuriu iukum sia.