Jon. 2 - BUKO SIPUNENAN

Panindogat Jona

¹ Kateteret ai si Jona kabagat iba sabeu nenda, panindounangan kai Tuhan Taikamanua,

² kuanangan: “Oi Tuhan, kagejat bagakku kupusoga katubum, samba aleginungan aku, kakudduatdra sirimanua simamatei kutiddou paroman, arepinungan samba nulelekngake' tiddogetku.

³ Nuribbaiake aku ka koat simakeru, aili ka saisai polak kabagat koat, sedda te ipapujut aku roirai, onu samba lektuk masibubuu aku.

⁴ Kuakkungan kapatuatku: Aituituiakean aku si Tuhan ka mataNia. Taan kuitco minca lalep kudduatNia sipunenan.

⁵ Koat aiailingan bibokku, sangaliot koat ailabbuat tubukku, lolit bagat koat ailailaiat utekku,

⁶ ka saisai sangamberi leleu. Malelepkungan ka sasai polak; matatbaliunia tulekkre kateiteiku teret buruburu. Kateteret nenda Nuangkkatake engangku sibara ka kamateiat, ale Tuhan, Taikamanungku.

⁷ Kateteret aimasaggo patuatku katubukku, repdepkungan si Tuhan, samba sege panindogatku katubum, kabagat umam sipunenan.

⁸ Sia sipanindogi sabulungan siboboi, rakaddiuake Ekeu samba taan mareddet sia.

⁹ Tapoi aku kuuraiake le urai pasiumun Ekeu samba kubuluake le buluakenen katubum; sangamberi palelenganku kugagalaiake, Ekeu poi sipaarau aku.”

¹⁰ Iageti kalulut pakoiniat Tuhan ka iba sabeu nenda, geleakenangan si Jona ka kapi.