Jon. 1 - BUKO SIPUNENAN

Taimareddet Jona kaparentat Taikamanua

¹ Ka sara gogoi, panibonangan si Tuhan kai Jona togat Amitai

² Kuanangan si Tuhan, “Kenan ka Niniwe ka laggai sabeu nenda, bule nuase'ake silaggaijinia, kalulut Akuagaian, aipoi silaggaijinia makope' kataira”

³ Tapoi kabagei le aituitui si Jona masiareuke tubunia kai Tuhan. Einia ka Jope, apasese ai kapal sieei ka Spanyol. Lepa ailuilui ongkosnia tujanangnia kabagat kapak, iageti pasambadra tai kapak nenda mulajo raei ka Spanyol masiareuake tubunia kai Tuhan.

⁴ Tapoi akenangan si Tuhan rusa talabari ka koat, lepa bara onu sabeu, bailiu malegre imaragat kapa' nenda.

⁵ Malotorangan sipugagalai ka kapa', Pugereirangan leu senenda ka taikamanuanda, samba ribbaiakerangan ka koat senengamata abangen kapa' bule imatebbuk kapa'. Tapoi si Jona atugorosotannia ka bilit kapa' bulat ka repe samba perepnia sedda, lepa laulaunangania simakope.

⁶ Tugorosotnangan jurumuri ka bagat saisai kapak, sesenangan si Jona ainia memerep sedda. Kuanangan kamatania, “Kipa galainia aioi aimalelek peperepnu kele kisene puabanganta” Suruake ekeu! Panindou ka Taikamanuam, bule manuntu bagania katubutta, bui tamatei.

⁷ Lepa'aratusakai kapata si Jona samba jurumuri, patibirangan taikapak, “Konan kam, tagalai kam pauktuk, bule taagai kasei sele aiorak sita rusa talabari nene.” Galairangan leu pauktuk, oraknangan leu onin Jona.

⁸ Iageti kuarangan kai Jona, “Bulatnia leu kalulut ekeu aibara gejat baga nene” Kaipa kabaraiatnu? Bangsa apa ekeu? Angoi anubara sene?”

⁹ Aleginangan si Jona, “Aku tai Ibrani, panindogietku iate Tuhan, Taikamanua sibaraake koat samba polak.”

¹⁰ Iageti tiboinangan kipa ibesiake ituituiake tubunia imareunan kamatat Tuhan. Raarep nenda taikapak, malotorangan simakope', kuarangan katubunia, “Amoi koi nupuparaboat kele nenda!”

¹¹ Itcoat talabari aile maroron, kuarangan taikapak katubunia, “Apa kugagalai kai katubum bule imalebak rusa talabari nene?”

¹² Aleginangan si Jona, “Ribbaiake kam aku ka koat, bulat malelebak te rusa talabari nene. Akuagaian poi, kalulut aku le aiorak kam rusa talabari nene.”

¹³ Tapoi taikapak aipeile rabebesiake masilugai simaron kapak rabesiake raturangai ka kapi. Tapoi rusa aile maroron, bailiu siboboi le besit tubudda nenda.

¹⁴ Lulut nenda pusogarangan kai Tuhan, “Oi Tuhan, kutiddou kai, bui kumatei kai kalulut engan sara sirimanua sitaigalai sele katubumai. Oi Tuhan, anugalaiakean kele siripot obaket bagam.”

¹⁵ Iageti ribbaiakerangan si Jona ka koat. Malebaknangan leu rusa talabari.

¹⁶ Malotorangan leu taikapak kai Tuhan, samba kele aratukapi, buluakerangan buluakenen samba maigi peile rapalelek kai Tuhan.

¹⁷ Itcoat tamauju gugluakenangan sara iba sabeu si Tuhan masiguk si Jona. Oto kuddu si Jona kabagat iba sabeu nenda, telu ngagogoi telu ngasoibo burunia.