Jol. 2 - BUKO SIPUNENAN

Pasirepdeman Gogoi Kaoijanan Tuhan

¹ Nauake kam pipiau, toggaiat ai sibabara ka leleu Sion Sipunenan kudduat Taikamanua, Kau imageret tubumui, ale kam tai Jehuda, gogoi kaoijanan Tuhan malegrengan, samba momoian le.

² Gogoi nenda magepgep samba mainep, sut kujuk simauket. Saladdut sit siooi kele tanai rusa, sipuririkdingan ka uddut leleu. Sipuaaili kele nenda ta'pei tuagai aibara, saamba taan babara geti teret buruburu.

³ Kele obengan sipasilalabo samba sipasikakasak pakatairangan leu sangamberi siureman. Beringan sara sipulelegei, taanai berisara sipuririmanua arasagganginia.

⁴ Putubuatda kele kuro' ipabalau kele' kuro ka kudduat patakaiat.

⁵ Muantat sia ka uddut leleu, ipunau kele' ipujuluk ipuenung kereta ka pasaggangan, samba kele itubetti obengan ilabo merang. Mungkuatda kele saladdu simagege, simatarek masiailiake kudduat patakaiat.

⁶ Kateteret arapurut sia, sangamberidda mugeret tubu, sangamberitda ibailiu mamusi mata samba muloto.

⁷ Kele' pahlawan rapasisaggangi, samba rapasitatra irip kele' pejuang; muenung sia simaroipo ka isit kamata, tak rapakokoilut ele masisili ipoketda.

⁸ Tak paokkip sia, sienungi enungannia. Sangamberi le masitului sangamberi kudduat simaron, tamomoi raariake puenungananda.

⁹ Purutdrangan bagat laggai, samba pabalau ka uddut gelit laggai, Pangarairangan kabagat lalep; kele sipananangkou, ratuguru ka jandela.

¹⁰ Ai sia mueenung, pugeretnangan polak samba manua; iageti magepgepnangan matat sulu' samba laggo samba torot panyanyat mapepenangan.

¹¹ Mugong le ngangan Tuhan, masiake katuaragat, katubudra saladduNia. Saladdunia maigi sia, samba maron sia masigalaiake sikoiniakenenNia! Bulat makope le lotota gogoi Tuhan, berisara sirimanua siooi masiomake.

Pasogaiat Masipakolou Puririmanua

¹² Kuanangan si Tuhan, “Kineneiget toiliake kam katubuku, kabagat muinet patuat, kabagat pupuaso, mugeri samba musou.

¹³ Birit ake patuatnu samba bui bibiletnu, Mattai kai Tuhan Taikamanua, simaom baga samba simanuntu baga, simakate baga samba simasut nuntut baga le Nia. Mangka bagaNia masiappeake, tak ioba masienungake pasiukuman.

¹⁴ Bule Tuhan Taikamanua ipaolei bagaNia, samba katubum iake panukanan simariuriu. Bule ioi nupanguruat ake' buluakenen anggur, samba gandum kai Tuhan Taikamanuam.

¹⁵ Nauke terompet ka Sion, leleu Taiamanua, Segeake' gogoi pupuasoat, baraake' paailiat siberikabaga.

¹⁶ Ruruake sangamberi siberikabaga, paipo' parurukat paamian. Koiniake' raoi sikebbukat, tatoga samba taigoiso'. Samba leu sipulalalep sibau bui tamoi sia. Koiniake' sia rakadiuake bili'ra.

¹⁷ Koiniake tai Imam sapagugulet Tuhan, rapusou kaoggak kudduat pasibuluat, samba kalaibokat kamata, samba masikua, “Pununtuki baga bangsam, oi Tuhan; bui nuobaake bakkatNu ibailiu asaket, bailiu bangsa-bangsa bagei masisailu, samba masikua, “KaipanganNia Taikamanuanda?”

Taikamanua masibaraake' minca' polak Simagabru

¹⁸ Lepa' puletceinangan polakNia si Tuhan, samba ipununtuki baga paamianNia.

¹⁹ Aleginangan sia kise', “Kineiget sangamberimui, kuake': gandum, anggur samba tulat zaitun komenmui, bule numaengtek kam sangamberimui. Tak kuobaake' rapaloloi ele raga'gati kam tai bangsa-bangsa.

²⁰ Kutuituiake le saladdut sit sibara ka bare', bagei leu kualou ka su'su simangai. Ka koat simamatei kukoiniake' raipoake' enungandra isit kamata, ka laut Tengah Kutukluake sipueenung isit kateitei. Mabutenangan leu tolatda. Kusubuake le sia kalulut arapaoreiji kam.

²¹ Bui numaloto, ale mone, kau imangka bagam repdep sabeu sigalauakenen Tuahan katubum.

²² Ale tarimeu bui makarat bagamui, monen parou kineiget amalimuanan. Paloina-loina maigi le ipubua buat anggur, samba msileu sisaliu igi le

²³ Ale taikauman Sion, kau magora bagam. Puangka kam baga samba paasiumun kam, kalulut igit simaeru sibara kai Tuhan Taikamanuam. Ka rura simalegeu iake katubum urat. Ka rura simaleppet iake leu urat, iake leu gogoi pubuaiat kele simatukele.

²⁴ Ipauru gandum kakudduat pamerakat, anggur samba suat zaitun, sun kakudduat pamionan.

²⁵ Kusili sangamberi karugiatnu, karura kateteret aipasikom sit siuremannu lulut Aku le poi masigugluake saladdut sit katubum.

²⁶ Katubum komen simemetnia, samba maektek le ekeu. Suru kam Tuhan Taikamanuamui, kalulut katubumui maiigi igalai kiseiet, bangsaKu taan ibailiunia geigeiet!

²⁷ Agaiamuian, Israel ai Aku katalagamui, Samba Aku Tuhan iate Taikamanuam. Tak anai Taikamanua bagei, Aku le, taan rapakakaila bangsaku.

Gogoi Kaoijanan Tuhan

²⁸ Kalepakat sangamberinia, sut akekungan ketsatKu katubut sangamberi sirimanua, iageti tatoga taimanteu, samba tainanalep masisegeake geti patonekatKu; katalagamui sangamberi sikebbukat, rapangamutake pangamutet, pasiitco tukau katubutda, sia tailainge samba taiokko.

²⁹ Kateteret nenda te, Ketsatku kuuruake ka sapagugulet taimanteu samba tainanalep.

³⁰ Kamanua samba kapolak maigi Kugalai kiseiet. Babara pasaggangan, julut obengan kelean le kujuk sipububugra.

³¹ Magepgepnangan matat sulu samba laggo ibailiu mabonan kele logau. Sangamberinia nenda geti ibara kepei iaili gogoi Tuhan, gogoi bulat kalotoakenen!

³² Tapoi kasei sitiddou paroman Tuhan arauakenangan leu geti sia. Kuanangan Tuhan, “Sirimanua ka Jerusalem sipiliKu geti, Kupaarau le sia.”