Joh. 9 - BUKO SIPUNENAN

Simapeset barania ka pututukat matania

¹ Aimueenung Jesus, itconangan sara simapeset barania ka pututukat matania pei le.

² Nounourangan nia sipasiuluinia, kuarangan, “Rabbi, kasei le aigalai jo, sinene ele eppunia, aipututu matania simapeset?”

³ Aleginangan nia Jesus, “Ta kalulut jonia ele jot eppunia, tapoi bule imatoila le ka tubunia galajet Taikamanua.

⁴ Ai pei le matatago buita tagalai galajet sipasikokoiniake aku; babara poi soibo, sedda taan anai kasei pa momoi mugalai.

⁵ Ujuku ka polak nene, aku te alitoda taikapolak.”

⁶ Kele aikua nene Jesus lujinangan polak igalai simalotte ka lujinia, lokotnakenangan lotti ka matat simapeset,

⁷ kuanangan ka matania, “Kenan nubui matam ka kolam Siloam.” (Siloam tibonannia ‘Sikoiniakenen’.) Einangan leu et ibui matania. Toilina le amaitcoan matania.

⁸ Ia geti kuarangan pabebeakenennia lalep samba sia sipasiitco nia siburu ipasibiddeu, “Ta nia ne simareirei mutukku masibiddeu?”

⁹ Sabagei masikua, “Oo, nia te.” Tapoi sabagei masikua, “Taa, keret tubuda le.” Tapoi tubunia geti masikua, “Bulatnia aku.”

¹⁰ Kuarangan ka matania, “Kipa pagalaiatnia aimaitco matam?”

¹¹ Aleginangan nia, “Sirimanua sipuoni Jesus, aigalai lotte, lepa lokotnakenangan nia ka mataku, kuanangan, ‘Kenan nubui matam ka kolam Siloam.’ Lepa ei aku; lepana le akubui mataku, maitconangan mataku.”

¹² Kuarangan ka matania, “Kaipa nia sirimanua nenda?” Kuanangan, “Ta kuagai.”

Ralelekngake tai Parise pagalaiat pasialeat simapeset

¹³ Lepa ambitrangan sirimanua simapeset siburu nenda ka matada tai Parise.

¹⁴ Tapoi gogoi Sabat le sigalaina lotte Jesus samba aialeake matat simapeset.

¹⁵ Nounourangan nia minca tai Parise kipa aimaitco matania. Kuanangan ka matada, “Polak simalotte le ailokotnake ka mataku, lepa buikungan mataku, maitconangan mataku.”

¹⁶ Kuarangan tai Parise sabagei, “Ta ka Taikamanua aibara sirimanua nenda, ta koi aisuru gogoi Sabat.” Tapoi sabagei masikua, “Kipa te iooi igalai kerek kele nene sirimanua sijo?” Pajoggolorangan sangamberida.

¹⁷ Lepa kuarangan minca ka matat simapeset nenda, “Kekeu geti kipa nukua pagalaiat sirimanua nenda kalulut aialeake matam?” Aleginangan nia, “Nabi le nia.”

¹⁸ Tapoi tai Jahudi ta matonem bagada pupepesetnia siburu, samba kineneigetnan le aimaitco matania, pat sogairangan eppunia,

¹⁹ nounourangan sia, “Ia leu ne togamui sikuamui mututu mata simapeset? Oto kipa le aimaitco matania kineneiget?”

²⁰ Alegirangan nia saeppunia, “Kuagai kai nia, togamai; samba tutunangan matania mapeset.

²¹ Tapoi kipa aimaitco matania kineneiget, ta kuagai kai. Samba kasei aibukaake matania ta kuagai leu kai. Nounou le kam nia, abeuan nia, aiagaian itiboi pagalaiat tubunia.”

²² Lulunia arakua kise saeppunia, lotora ka tai Jahudi, apakereat poi bagada tai Jahudi, kasei masimunengake nia Kristus, tukekele le nia ka Uman Taikamanua.

²³ Ia te lulunia arakua saeppunia, “Nounou le kam nia, abeuan nia.”

²⁴ Lepa sogairangan minca sirimanua simapeset siburu kuarangan ka matania, “Munengake ka matat Taikamanua, pububulatnia sikuam; kuagai poi kai sijo le sirimanua nene.”

²⁵ Aleginangan nia kuanangan ka matada, “Ele sijo pa nia, ta kuagai. Sarat nene le kuagai, simapeset aku siburu, kineneiget amaitcoan mataku.”

²⁶ Kuarangan ka matania, “Aponia aigalai ka tubum? Kipa aigalai aibukaake matam?”

²⁷ Kuanangan ka matada, “Akukuangan ka matamui, tapoi ta nuaarepi kam. Nunonounou kodda kam minca? Noba ibailiu kam sipasiuluinia?”

²⁸ Asarangan nia kuarangan, “Ekeu le sipasiuluinia, kai geti sipasiului Mose le kai.

²⁹ Pagalaiat si Mose, akuagaian kai aipatiboake nia Taikamanua, sinene geti ta kuagai kai kaipa aibara.”

³⁰ Pele ngangan sirimanua nenda ka matada, “Kipa te galainia ta nuaagai kam kaipa aibara, tapoi aibukaan mataku.

³¹ Ataagaian kam, ta iaarepi sirimanua sijo Taikamanua, sikalotoake nia samba sigalai siobat bagania le ia te iaarepi.

³² Baranangan ka panandaat polak, ta atuarep ai sirimanua sibukaake matat simapeset ka pututukat mata.

³³ Ke ta bai ka Taikamanua aibara sirimanua nene, ta momoi igalai apa pa.”

³⁴ Alegirangan rakua ka matania, “Ka bagat jo le anupututu mata, nupangangantoman pei le kai?” Kekelerangan nia ka uma parurukat.

Simapeset pupaatuanan

³⁵ Kele aiarep Jesus kekekeleda nia, paseseakenangan nia kuanangan ka matania, “Matonem leu bagam ka Togatsirimanua?”

³⁶ Aleginangan nia, “Kasei nia, Tuhan, bule kukatonemi nia?”

³⁷ Kuanangan ka matania Jesus, “Anuitcoan nia, sipatiboake ekeu, ia te nia.”

³⁸ Kuanangan, “Matonem bagaku Tuhan!” Lepa purapponangan ka matat Jesus.

³⁹ Kuanangan Jesus, “Masiukum le akuoi ka polak, bule imaitco matada simapeset, imapeset matada simaitco mata.”

⁴⁰ Piga pa tai Parise sikuddu sedda araarep sikuat Jesus, lepa kuarangan ka matania, “Taleu mapeset le kai ka kai?”

⁴¹ Kuanangan ka matada Jesus, “Simapeset bai kam, ta majo kam. Tapoi anukua poi kam, ‘Maitco matamai,’ oto kuddu le ka tubumui jomui.”