Joh. 8 - BUKO SIPUNENAN

¹ Tapoi Jesus geti amei le nia ka leleu Tula.

² Pato mamancep pei le, ei nia minca ka Uman Taikamanua, samba maigi sirimanua amoi ka tubunia. Puuddetnangan masipangantoman sia.

³ Ia geti oi siagaisurat samba tai Parise raambit ka matania sara sinanalep sineseda ai nia paeelet. Rioakerangan sinanalep nene ka talaga.

⁴ Kuarangan ka matat Jesus, “Guru, sinanalep nene atulaba ai nia paeelet.

⁵ Aikua si Mose ka Surukat, sinanalep kele nene, buita tubaijungi le nia bukku teret matei. Kipa paatuatnu kekeu?”

⁶ Tapoi kei rakukua nene siboda le nia, ibara enunganda ranganduake nia. Tapoi ilukkkukngake le utenia Jesus, suratnakenangan singongainia ka polak.

⁷ Reireinangan ranounou nia, rioakenangan tubunia, kuanangan ka matada, “Kasei kam si ta anai jo, ia te boiki masibabaijukngake bukku ka tubunia.”

⁸ Lepa lukkukngakenangan minca utenia ipasurani polak.

⁹ Kele araarep aikua kisedda Jesus, tui sia pasasara, barania ka simabaja, legeina le Jesus sarania samba sinanalep sipuririo ka talaga.

¹⁰ Kele airioake minca tubunia Jesus, kuanangan ka matat sinanalep, “Kaipangan sia sangamberida? Beri sia sara siukum ekeu?”

¹¹ “Ta anai sia Tuhan,” ngangan sinanalep. Kuanangan ka matania Jesus, “Aku leu ta kuukum ekeu. Kenanan, baan gagalai minca jo.”]

Jesus ia te patora taikapolak

¹² Ia geti panibonangan minca ka matada Jesus, kuanangan, “Aku te patora taikapolak. Kasei situt aku, aian ka tubunia patot purimanuaiat, samba taan mueenung nia ka gepgep.”

¹³ Kuarangan ka matania tai Parise, “Ekeu le masimumunengake tubum; oto pasimunengannu ta sibulatnia.”

¹⁴ Aleginangan nganganda Jesus, “Kenanen aku masimunengake tubuku, sibulatnia le pasimunenganku; kuagai poi kaipa akubara samba kaipa kueei. Kam geti ta nuagai kam kaipa akubara samba kaipa kueei.

¹⁵ Kam nuukum kam siripot pusisirimanua, aku geti ta kuukum beri sara.

¹⁶ Tapoi ke masiukum aku, maroipo le ukumku, aipoi ta saraku; ai le ipaalei aku Ukkui sipasikokoiniake aku.

¹⁷ Samba atusuratnakean ka bagat Surukatmui kise: Pasimunengan sibulatnia ia te pasimunengan rua sirimanua.

¹⁸ Aku tubuku masimunengake pagalaiat tubuku samba Ukkui leu sipasikokoiniake aku masimunengake pagalaiat tubuku.”

¹⁹ Kuarangan ka matania, “Kaipa nia Ukkuinu?” Aleginangan nia Jesus, “Aku ta nuagai kam, Ukkuiku leu ta nuagai kam. Ke bai nuagai kam aku, agaimuian leu Ukkuiku.”

²⁰ Sangamberinia tiboiet nene aitiboi Jesus ai nia mungangantoman ka Uman Taikamanua ka bebet petit bulagat panguruat. Ta anai beri sara silaba nia, tapei poi aiaili teterenia.

Jesus ta sibara ka polak nene

²¹ Ia geti kuanangan minca ka matada Jesus, “Memeian le aku, gabamuian te aku, tapoi mateimuian te ka jomui. Kaipa kuei ta momoi nuoi kam.”

²² Kuarangan tai Jahudi, “Imamateiake pa tubunia, ikukua, ‘Kaipa kuei, ta momoi nuoi kam?’ ”

²³ Kuanangan ka matada Jesus, “Ka uggu le anubara kam, aku geti ka pata le akubara; ka polak le anubara kam, aku geti ta ka polak akubara.

²⁴ Ia te akukua ka matamui, mateimuian te ka jomui. Kirenangan mamatei kam ka jomui ke ta matonem bagamui ‘Aku te nia!’ ”

²⁵ Kuarangan ka matania, “Kasei poi ekeu?” Kuanangan ka matada Jesus, “Apananku pei le kupatitiboake kam?

²⁶ Maigi kuanenku samba aseakenenku pagalaiat kam. Tapoi sipasikokoiniake aku simaroipo le nia, samba aku leu apa siarepku ka tubunia, ia te kutitiboi ka taikapolak.”

²⁷ Ta raagai, pagalaiat Ukkui le ititiboi ka matada.

²⁸ Kuanangan Jesus, “Teret anubuakngakean geti kam Togatsirimanua, ia pei nuagai kam nia ‘Aku te nia’, ia leu et ta kugalai siobat bagaku, tapoi apa sigelaiakenen Ukkui kaku ia te kutitiboi.

²⁹ Samba sipasikokoiniake aku ai le ipaalei aku. Beri pei kaddiuakena aku, mariuriu le poi kugalai siobat bagania.”

³⁰ Kele aikua nene Jesus, maigirangan simatonem baga ka tubunia.

Pubulanan masibelaake kam

³¹ Lepa kuanangan Jesus ka matada tai Jahudi simatonem baga ka tubunia, “Ke mariuriu kam ka tiboietku, bulat sipasiului aku te kam,

³² agaimuian leu pubulanan, ia geti pubulanan nenda masibelaake kam.”

³³ Alegirangan nia, “Punuteteu Abraham le kai, beri pei pupapaguguletmai ka tubut kasei pa. Kipa ne nukukua, ‘Tubebelaake kam?’ ”

³⁴ Kuanangan ka matada Jesus, “Kukua nia ka matamui, senen sigalai jo, pagugulet jo le nia.

³⁵ Samba pagugulet, ta mariuriu ikuddu ka lalep; toga le mariuriu mukuddu ka lalep.

³⁶ Oto ke Toga masibelaake kam, ia pei te bulat anubela kam.

³⁷ Kirenangan kuagai, punuteteu Abraham le kam. Tapoi nubesiake le kam masimateiake aku kalulut ta iottot ka paatuatmui tiboietku.

³⁸ Siitcoku ka Ukkuiku ia te kutitiboi; kisedda leu et kam, siarepmui ka ukkuimui le nugagalai kam.”

³⁹ Alegirangan rakua ka matania, “Si Abraham le ukkuimai.” Kuanangan ka matada Jesus, “Ke togat Abraham bai kam, anugalaian kam kele sigalai Abraham.

⁴⁰ Tapoi nubesiake le kam masimateiake aku, sirimanua sipasititiboi pubulanan ka matamui, siarepku ka Taikamanua. Nene ta aigalaiake si Abraham.

⁴¹ Galajet ukkuimui le nugagalai kam.” Kuarangan ka matania, “Ta togat siuilak kai, sara le ukkuimai, ia te Taikamanua.”

⁴² Kuanangan ka matada Jesus, “Ke Taikamanua bai ukkuimui, manuntu bagamui ka tubuku, aipoi ka Taikamanua le akubara akuoi se. Ta ka teu bagaku akuoi, nia le aikoiniake aku.

⁴³ Angoi ta nuagai kam kolou sikuaku? Kalulut ta nuoom kam nuarep kam nganturatku.

⁴⁴ Sanitu le ukkuimui, samba siobat bagat ukkuimui le nuoba nugalai kam. Ka panandaatnia pei le sipasimamatei sirimanua le nia, beri pei puletseina pubulanan, ta poi anai pubulanan ka tubunia. Ke itiboi boko, sibara ka tubunia le ititiboi; simaboko le nia samba ukkui boko.

⁴⁵ Tapoi kalulut pubulanan le kutitiboi kaku, ta matonem bagamui ka tubuku.

⁴⁶ Kasei kam momoi masisusu jo sigalaiku? Ke pubulanan kutiboi, angoi ta matonem bagamui kaku?

⁴⁷ Kasei sibara ka Taikamanua, iaarepi tiboiet Taikamanua. Ta poi sibara ka Taikamanua kam, ia te ta nuaarepi kam nia.”

Jesus samba Abraham

⁴⁸ Kuarangan ka matania tai Jahudi, “Ta aisesengan sikuamai, tai Samaria le ekeu, pinasaileu sanitu?”

⁴⁹ Aleginangan nia Jesus, “Ta pinasaileu sanitu aku, Ukkuiku le kuumunake, tapoi kam nupaloloi le kam aku.

⁵⁰ Ta kugaba katuumunan tubuku. Ai sara sibaraake katuumunanku samba nia leu masiukumake.

⁵¹ Kukua nia ka matamui, sipasirereddet tiboietku, taan inananam kamateiat teret buruburu.”

⁵² Lepa kuarangan ka matania tai Jahudi, “Kineneiget akuagaian kai kababarat sanitu ka tubum. Si Abraham atataan nia, kisedda leu tai nabi. Tapoi nukukua pei le, ‘sipasirereddet tiboietku, taan inananam kamateiat teret buruburu.’

⁵³ Ekeu pei le pa abeu ka ukkuimai si Abraham, sitatata? Tai nabi leu atataan sia; kaseian le ekeu kekeu nukau tubum?”

⁵⁴ Aleginangan nia Jesus, “Ke aku le bai masiumun tubuku, siboboi le pasiumunku. Ukkuiku le, kuanenmui Taikamanuamui, nia le masiumunake aku.

⁵⁵ Ta nuagai kam nia, aku geti kuagai nia. Ke kukua ta kuagai nia, apabokongan aku, kele kam. Tapoi kuagai nia, samba kureddet tiboietnia.

⁵⁶ Si Abraham ukkuimui maroroi bagania masiitco gogoiku; samba aiitcoan, maangkanangan bagania.”

⁵⁷ Kuarangan ka matania tai Jahudi, “Enan ta iaaili lima pulu ngarura bajanu, anuitcoan si Abraham?”

⁵⁸ Kuanangan ka matada Jesus, “Kukua nia ka matamui: tapei amututu matat Abraham, aian aku.”

⁵⁹ Ia geti alarangan bukku rabaijuk nia; tapoi ilipputnake le tubunia, bela nia ka Uman Taikamanua.