Joh. 7 - BUKO SIPUNENAN

Jesus samba sasarainania

¹ Pasat nene gejenginangan Galilea Jesus, ta ioba poi mugejek ka Judea, aipoi sedda ai le raiisiake tai Jahudi masimateiake nia.

² Ka teteret nenda amalegerengan punenda tai Jahudi, ia te Punen Pusasapou.

³ Kuarangan ka matania sasarainania, “Kaddiuakean le se, kenan ka Judea, bule raitco galajet sigalainu sipasiului ekeu.

⁴ Aipoi ta anai kasei pa silipputnake sigalainia ke ioba bai ipatoila tubunia. Ke nugalai nene, oto patoila tubum ka taikapolak.”

⁵ Aipoi beri sasarainania, ta matonem bagada ka tubunia.

⁶ Ia geti kuanangan ka matada Jesus, “Tapei aiaili tetereku, teteremui ka kam geti mariuriu le.

⁷ Ta malaga bagada ka tubumui taikapolak, ka tubuku geti malaga bagada, aipoi kumunengake le galai tubuda, sikatai le poi galajetda.

⁸ Kenanan kam ka punen, ta memei aku kaku, tapei aiaili tetereku.”

⁹ Kisedda te aikua ka matada, pukuddunangan leu ka Galilea.

Jesus ka Punen Pusasapou ka Jerusalem

¹⁰ Tapoi kele araei sasarainania ka punen, lepa ei Jesus ka sia, ta ka simatoila, pinalipput le.

¹¹ Ia geti ka punen, gabarangan nia tai Jahudi, kuarangan, “Kaipa te nia?”

¹² Pakasatrangan nganganda simigi pagalaiat tubunia. Ai sikua, “Simatopit le nia.” Sabagei masikua, “Taa, ipepeake le sirimanua!”

¹³ Tapoi beri sara sia simaeme masitiboi ka toila pagalaiat tubunia, lulut lotora ka tai Jahudi.

¹⁴ Ka talagat punen, tusakainangan Jesus ka Uman Taikamanua mungantoman.

¹⁵ Makiseinangan ka bagada tai Jahudi, kuarangan, “Kaipa te aiagai sangamberinia nene, taipasigegelai!”

¹⁶ Kuanangan ka matada Jesus, “Ngantomanku nene ta sibara ka tubuku, sibara ka sipasikokoiniake aku le.

¹⁷ Kasei sioba masigalaiake siobat bagat Taikamanua, againangan leu ngantoman nene, ele ka Taikamanua aibara, ele sibara ka teu bagaku le kutitiboi.

¹⁸ Sipasititiboi sibara ka tubunia, ia te sibesiake umun ka tubunia; tapoi kasei sibaraake umun ka tubut sipasikokoiniake nia, ia te simaroipo, ta anai patajuat ka tubunia.

¹⁹ Ta aiakean ka kam Surukat si Mose? Tapoi beri kam sara sigalaiake Surukat. Angoi nugele kam masimateiake aku?”

²⁰ Alegirangan nia sirimanua simigi, “Ai le ka tubum sanitu! Kasei te sigele masimateiake ekeu?”

²¹ Aleginangan nia Jesus, “Sara pei le galajet akugalai, amakiseian ka bagamui sangamberimui.

²² Aiakean ka kam aturan si Mose bule nupusunat kam – siripokatnia sunat nenda ta sibara kai Mose, sibara ka taikebbukatta le – samba ka gogoi Sabat leu nusunat kam sirimanua.

²³ Ke nusunat kam sirimanua ka gogoi Sabat bui nupasabau kam aturan Mose, nugogolu koi kam aku kalulut akualeake sangalio tubut sirimanua ka gogoi Sabat?

²⁴ Ba ukum kam sirimanua sarat ka simatotoila, tapoi simaroipo le nupasiukum kam.”

Bulatnia leu pa Jesus Mesias?

²⁵ Lepa kuarangan piga pa tai Jerusalem, “Ta nia nene geleketda ramateiake?

²⁶ Tapoi itco pei kam ipanibo ka simatoila, ta anai apa pa rakua ka matania. Ele araseseakean pa sauteta, bulatnia Kristus le sinene?

²⁷ Sinene taagai kaipa kabaraiatnia; tapoi ke moi geti Kristus, ta anai kasei pa siagai kabaraiatnia.”

²⁸ Ka teteret aimungangantoman Jesus ka Uman Taikamanua, abeuakenangan ngangania kuanangan, “Kirenangan nuagai kam aku samba nuagai kam kabaraiatku, tapoi ta teu bagaku akuoi, tapoi nia le simaroipo amasikoiniake aku, ta nuagai kam nia.

²⁹ Aku kuagai nia, ka tubunia le poi akubara, nia le aikoiniake aku.”

³⁰ Ia geti gelerangan ralaba nia, tapoi beri sara sikauake kabei ka tubunia, tapei poi aiaili teterenia.

³¹ Tapoi maigi leu sia ka talagat sirimanua simigi simatonem baga ka tubunia, kuarangan, “Ke moi geti Kristus, isasaliu pei le pa kerek sigalainia sinene igagalai?”

Isiat masilaba Jesus

³² Kele araarep tai Parise rapakasat nganganda sirimanua simigi pagalaiat Jesus, koiniakerangan sipasijajago Uman Taikamanua tai imam sabeu samba tai Parise masilaba nia.

³³ Kuanangan ka matada Jesus, “Taan mauuju kukuddu ka talagamui, lepa ei aku ka sikoiniake aku.

³⁴ Gabamuian te aku, tapoi ta nusesese kam aku, aipoi ta momoi nuoi kam ka kudduatku.”

³⁵ Kuarangan tai Jahudi pasasambada, “Kaipa pa ieei, ta iooi tasese nia? Ioba pa mei ka tai Jahudi sipusasabu ka talagada tai Grika samba masipangantoman tai Grika?

³⁶ Apa pa ne tiboiet sikuania: Gabamuian te aku, tapoi ta nusesese kam aku, samba ta momoi nuoi kam ka kudduatku?”

Oinan purimanuaiat

³⁷ Ka gogoi sikateitei, ia te gogoi simakabeunan ka punen, purionangan Jesus, panibonangan sabeu nganga, “Kasei simaoggou, kau ioi ka tubuku mulo!

³⁸ Kele sitususurat ka Surat Sipunenan, ‘Kasei simatonem baga kaku, ka tubunia te ipuguguruk oinan purimanuaiat.’ ”

³⁹ Tapoi pagalaiat Ketsat le siniboinia nene, siloketda simatonem baga ka tubunia, tapei poi amoi Ketsat, kalulut tapei atulatsatnake Jesus.

⁴⁰ Piga pa sia ka talagada sirimanua simigi, kele araarep tiboiet nene, masikua, “Bulat nabi le nia!”

⁴¹ Sabagei masikua, “Kristus le nia.” Tapoi sabagei masikua, “Taa, ta ka Galilea ibabara Kristus.

⁴² Ta aikuangan Surat Sipunenan, ka punuteteu David, ka laggai Betlehem, laggai David le kabaraiat Kristus?”

⁴³ Ia geti pajoggolorangan sirimanua simigi kalulut Jesus.

⁴⁴ Ai piga pa sioba masilaba nia, tapoi beri sara simaeme masirape nia.

Sautera tai Jahudi ta matonem baga

⁴⁵ Toili sipasijajago Uman Taikamanua, kuarangan tai imam sabeu samba tai Parise ka matada, “Angoi ta anuambit kam nia se?”

⁴⁶ Alegirangan nia sipasijajago, “Tapei anai sirimanua sipaninibo kele sirimanua nene.”

⁴⁷ Alegirangan nia tai Parise, “Kam leu aipepeake?

⁴⁸ Ai pa sara ka talagada saute, ele ka talagada tai Parise simatonem baga ka tubunia?

⁴⁹ Teleiet le sirimanua sitaiagai Surukat!”

⁵⁰ Kuanangan si Nikodemus, sieei siburu ka Jesus, ia te sara ka talagada tai Parise,

⁵¹ “Siripot Surukatta ta momoi tuukum sirimanua ke tapei tuarep tiboietnia, samba tuagai sigalainia.”

⁵² Alegirangan ngangania, “Ekeu leu tai Galilea? Lelekngake pei Surat Sipunenan nuagai nia, ta anai nabi sibara ka Galilea.” [

Sinanalep sipaeelet

⁵³ Lepa sabu sia, sieei ka lalepna.