Joh. 6 - BUKO SIPUNENAN

Ipakom lima ribu sirimanua Jesus

¹ Pasat nene ei Jesus ka silat koat Galilea, sipuoni leu koat Tiberias.

² Maigi sirimanua masitut nia, araitco poi kerek sigalainia aialeake simabesi.

³ Panataranangan Jesus ka leleu, puuddetnangan sedda sambada sipasiuluinia.

⁴ Ka teteret nenda amalegerengan Paska, punenda tai Jahudi.

⁵ Kele ailoggouake matania Jesus itconangan simakope igi sirimanua moi ka matania, kuanangan ka matat Pilipus, “Kaipa tasasaki roti bule rapukom tainene?”

⁶ Kei ikukua nene masisibo si Pilipus le, aipoi aiagaian galaiakenennia.

⁷ Aleginangan nia si Pilipus, “Kenanen rua ngotu ropia iginia roti tusaki, ia leu et ta iaaili sia kenanen pagogoiso.”

⁸ Kuanangan ka matania sara sipasiuluinia sipuoni si Andreas, sarainan Petrus,

⁹ “Ai se sara toga sibara lima roti samba rua iba; tapoi apa kauta nia ka simigi?”

¹⁰ Kuanangan Jesus, “Kau rapuuddet sirimanua.” Maigi poi sese sedda; puuddetrangan sangamberida, ai pa lima ribu igida sarat taimanteu.

¹¹ Ia geti alanangan roti Jesus, kuanangan sura, lepa parubeinangan nia ka sipukukuddu sedda, kisedda leu et iba, siobara le iginia.

¹² Kele aramaektek kuanangan Jesus ka matada sipasiuluinia, “Ruruake kam legeira, bui malimai.”

¹³ Ia geti ruruakerangan nia ai pulu rua ngagaraga sarat sisusun, legei sikopda ka silima roti.

¹⁴ Kele araitco sirimanua simigi kerek sigalai Jesus nene, kuarangan, “Sinene le bulat nabi siooi ka polak!”

¹⁵ Kalulut iagai le poi Jesus, momoi le sia rapurut nia rakau nia rimata, siksiknangan tubunia mei ka leleu sarania.

Jesus muenung ka uddut koat

¹⁶ Kele aimasoibo gorosot sia sipasiului Jesus ka bebet koat,

¹⁷ lepa janang sia ka abak mei mutalipo ka Kapernaum. Amagepgepman tapei amoi Jesus ka tubuda,

¹⁸ koat pei ka teteret nenda maonu kalulut rusa simapiret.

¹⁹ Ai pa lima ele enem kilometer reunannia arapuabak, itcorangan Jesus ai nia mueenung ka uddut koat itagetnake abak. Malotorangan sangamberida.

²⁰ Tapoi kuanangan ka matada, “Aku le, ba maloloto kam!”

²¹ Kei raalaan le nia ka abak, ka teteret nenda leu asegean sia ka kapi ka kudduat ailiakenenda.

Ragaba Jesus sirimanua simigi

²² Pato aimapato, itcorangan sirimanua simigi sipuririo ka sila, ta anai abak bagei sarania le sedda, ia leu et ta atujanang Jesus sambada sipasiuluinia ka abak, sarat sipasiuluinia le amutuitui.

²³ Lepa oi abak bagei sibara ka Tiberias, ka legeret kudduat pukomanda roti lepa aikua pusurakat si Tuhan.

²⁴ Kele araitco sirimanua simigi ta anai Jesus sedda, sipasiuluinia leu ta anai, tujanangrangan ka abak raei ka Kapernaum masigaba Jesus.

Jesus roti purimanuaiat

²⁵ Kele arasese Jesus sirimanua simigi ka sila, kuarangan ka matania, “Rabbi, pigamoi anuoi sene?”

²⁶ Aleginangan nia Jesus, “Kukua nia kamatamui, ta kalulut iitcomui kerek nugagaba kam aku, kalulut ektekmui mukom roti le.

²⁷ Ba momomoake kam tubumui mugalai kalulut kan simaruei tata, tapoi kan simatom siaili ka purimanuaiat sitaitatata le, akenen Togatsirimanua ka kam; nia le poi aipatone Ukkui, Taikamanua.”

²⁸ Lepa kuarangan ka matania, “Aponia galaiakenenmai, bule kugalai kai galajet obaket Taikamanua?”

²⁹ Aleginangan nia Jesus, “Nene le galajet obaket Taikamanua galaietmui, ia te: masikatonemi nia sikoiniakenen Taikamanua.”

³⁰ Kuarangan ka matania, “Oto aponia katuaggaiat baraakenennu itcoketmai, bule imatonem bagamai ka tubum? Pakoinong pei aponia nugagalai?

³¹ Taikebbukatmai arakoman manna ka simatangeu, kele sitususurat ka Surat Sipunenan, ‘Kaunangan katda roti sibara ka sorga.’ ”

³² Kuanangan ka matada Jesus, “Kukua nia ka matamui, ta si Mose amasiake ka kam roti sibara ka sorga; tapoi Ukkuiku le amasiake ka kam bulat roti sibara ka sorga.

³³ Aipoi roti sibara ka Taikamanua ia te nia situgogorosot sibara ka sorga samba siake purimanuaiat ka taikapolak.”

³⁴ Kuarangan ka matania, “Tuhan, ake ka kai roti nenda simariuriu.”

³⁵ Kuanangan ka matada Jesus, “Aku te roti purimanuaiat; kasei siooi kaku, taan malalaje nia; samba kasei simatonem baga kaku, taan maooggou nia buru.

³⁶ Akukuangan ka matamui, anuitcoan kam aku, tapoi ta matonem bagamui.

³⁷ Sangamberi siaket Ukkui kaku, ia te momoi kaku, samba kasei siooi kaku, ta kukekekele nia.

³⁸ Aipoi akutugorosot baraku ka sorga, ta mugalai siobat bagaku, siobat bagat sikoiniake aku le.

³⁹ Samba ne le siobat bagat sikoiniake aku: bui kupalimai beri sara siakenia kaku; tapoi kusuruake le nia ka gogoi sialu.

⁴⁰ Nene le poi siobat bagat Ukkuiku: bule senen sipasiitco Toga samba simatonem baga ka tubunia, masibakkati purimanuaiat sitaitatata, lepa suruakekungan nia ka gogoi sialu.”

⁴¹ Ia geti pungungukirangan nia tai Jahudi, kalulut kukuana, “Aku te roti sibara ka sorga.”

⁴² Kuarangan, “Ta si Jesus nia, togat Josep, kuagai le kai ukkuinia samba inania? Kipa te momoi ikua, sibara ka sorga le nia?”

⁴³ Kuanangan ka matada Jesus, “Ba pungungungu kam.

⁴⁴ Ta anai beri sara siooi moi kaku ke ta igirit nia Ukkui sikoiniake aku; samba kusuruake nia ka gogoi sialu.

⁴⁵ Atusuratnakean ka bukoda tai nabi, ‘Sangamberi le ipangangantoman Taikamanua.’ Sangamberi sipasiaarep ngangan Ukkui samba sipasigegelai, ia te momoi kaku.

⁴⁶ Nene ta masikua aian sipasiitco Ukkui; sarat nia sibara ka Taikamanua le, amasiitco Ukkui.

⁴⁷ Kukua nia ka matamui: Kasei simatonem baga, ai ka tubunia purimanuaiat sitaitatata.

⁴⁸ Aku te roti purimanuaiat.

⁴⁹ Taikebbukatmui arakoman manna ka simatangeu, tapoi amateian leu sia.

⁵⁰ Roti situgogorosot sibara ka sorga geti, kasei sikom nia ta mamatei nia.

⁵¹ Aku te roti purimanuaiat sibara ka sorga. Kasei sikom roti nene, muririmanua le nia teret buruburu. Roti akenenku nenda, ia te tubuku, purimanuaiatda taikapolak.”

⁵² Ia geti pagolurangan tai Jahudi pasasambada, kuarangan, “Kipa te iooi iake tubunia takom nia?”

⁵³ Kuanangan ka matada Jesus, “Kukua nia ka matamui: Ke ta nukom kam tubut Togatsirimanua samba nulo kam logaunia, ta anai purimanuaiat ka tubumui.

⁵⁴ Kasei sikom tubuku samba silo logauku, aibakkatingan purimanuaiat sitaitatata, ia geti suruakekungan nia ka gogoi sialu.

⁵⁵ Tubuku poi bulat kan, logauku poi bulat lo.

⁵⁶ Sipasikokom tubuku samba sipasilolo logauku, ai le nia ka tubuku, aku leu ka tubunia.

⁵⁷ Kele Ukkui sipuririmanua, sikoiniake aku, aku leu murimanua kalulut Ukkui, kisedda leu sikom aku, muririmanua le nia kalulut aku.

⁵⁸ Nene le roti sibara ka sorga; ta makere nia ka roti sikopda taikebbukatmui, lepa arakom nia matei sia. Tapoi sikom roti nene geti, muririmanua le nia teret buruburu.”

⁵⁹ Ia te aitiboi Jesus ka teteret aipungantoman ka uma parurukat ka Kapernaum.

Tiboiet purimanuaiat sitaitatata

⁶⁰ Oto maigi sipasiului Jesus, kele araarep tiboiet nene kuarangan, “Tiboiet simakela le nene, kasei ioom iarep nia?”

⁶¹ Aiagaian le poi ka paatuatnia Jesus pungungungura sipasiuluinia pagalaiat nene, kuanangan ka matada, “Ibabaraake kodda belet bagamui nene?

⁶² Kipangan le geti ke nuitco kam Togatsirimanua tusakai ka kudduatnia siboiki?

⁶³ Ketsat le sikau murimanua, tubu geti ta anai kauta nia. Oto tiboiet siniboiku ka matamui, ia te Ketsat samba purimanuaiat.

⁶⁴ Tapoi ka talagamui ai sia sitaimatonem baga.” Kirenangan poi aiagaian Jesus kasei sia sitaimatonem baga samba kasei sipajo nia geti.

⁶⁵ Kuanangan minca, “Ia te akukua ka matamui, ta momoi ioi kasei pa ka tubuku, ke ta Ukkui masikau nia ioi.”

⁶⁶ Barania ka teteret nenda maigi sipasiuluinia mutuitui, taan rapaalei nia.

⁶⁷ Lepa kuanangan Jesus ka matada sipasiuluinia sipulurua, “Taleu mututuitui leu kam ka kam?”

⁶⁸ Aleginangan nia si Simon Petrus, “Tuhan, ka tubut kaseian le kueei kai? Tiboietnu ia te tiboiet purimanuaiat sitaitatata.

⁶⁹ Amatoneman bagamai samba akuagaian kai, Sipunenan sibara ka Taikamanua le ekeu.”

⁷⁰ Aleginangan nia Jesus, “Pulurua tebai kam akupili, ele? Tapoi sara ka talagamui sanitu le!”

⁷¹ Si Judas togat Simon tai Iskariot le ikukua nene; nia poi geti masisesegeake Jesus, sara ka talagat sipasiului sipulurua.