Joh. 5 - BUKO SIPUNENAN

Pasialeat simabesi ka Betesda

¹ Pasat nenda ai punenda tai Jahudi; oto ei Jesus ka Jerusalem.

² Ai sedda ka Jerusalem ka bebet Matatbaliu Biribiri sara puraukat sipuoni Betesda ka nganganda tai Ibrani; ai lima sapounia.

³ Maigi simabesi sapareppa ka bagania: simapeset, simatekkei, simasakit. Sangamberida airangengenaake ipugotso oinannia.

⁴ Aipoi ai teterenia itugorosot malaikat Tuhan ka oinan masigotso oinan. Kasei tugorosot boiki ka oinan aimugogotso oinan, male, kenanen apa pa besinia.

⁵ Ai sedda sara sirimanua simabesi telu pulu balu ngarurangan ujunia.

⁶ Kele aiitco nia Jesus ipureppa sedda, aiagaian bagei ujunia aipuoringen, kuanangan ka matania, “Noba leu imale tubum?”

⁷ Aleginangan nia simabesi, “Tuhan, ta anai kaku sirimanua sigorosotnake aku ka oinan ka teteret ipugotso oinannia; kei memeian le aku aian sabagei siboikiake tubunia kaku.”

⁸ Kuanangan ka matania Jesus, “Suruake ekeu, akkatnake peremannu nupuenung.”

⁹ Malenangan leu et sirimanua nenda, akkatnakenangan peremannia, puenungnangan. Tapoi gogoi Sabat le gogoi nenda.

¹⁰ Kuarangan ka matat sirimanua simamale tai Jahudi, “Gogoi Sabat le kineneiget, takeikei nubairat peremannu.”

¹¹ Aleginangan kuanangan ka matada, “Sipasiaaleake aku, nia le amasikua ka mataku, ‘Akkatnake peremannu nupuenung.’ ”

¹² Nounourangan nia, “Kasei sirimanua nenda sipasikukua ka matam nuakkatnake peremannu, nupuenung?”

¹³ Tapoi ta iagai simamale nenda kasei pa nia, amutuituian poi Jesus, maigi poi bagei sirimanua sedda.

¹⁴ Lepa paseseakenangan nia Jesus ka Uman Taikamanua, kuanangan ka matania, “Kineneiget amalengan ekeu, bui nugalai minca jo, bui ibara kekeu simakope besi pei le.”

¹⁵ Einangan leu sirimanua nenda ka tai Jahudi masipoiliat, Jesus le sialeake nia.

¹⁶ Kalulut nenda taddaakerangan tai Jahudi masikukuru Jesus kalulut gagalaina nene ka gogoi Sabat.

¹⁷ Tapoi aleginangan Jesus kuanangan ka matada, “Mugalai le Ukkuiku teret kise, aku leu buita mugalai.”

¹⁸ Kalulut nene makopenangan rabesiake tai Jahudi masimateiake nia. Ta sarat kalulut aapaakena gogoi Sabat, tapoi kukuana bagei Taikamanua Ukkuinia, aipakereake tubunia ka Taikamanua.

Geget Togat Taikamanua

¹⁹ Ia geti aleginangan nia Jesus, kuanangan ka matada, “Kukua nia ka matamui, beri sara momoi igalai Toga sibara ka teu bagania, sarat siitconia sigalai Ukkui le igagalai; aipoi apa sigalai Ukkui, ia leu te igagalai Toga.

²⁰ Manuntu poi bagat Ukkui ka Toga samba ipatoila ka matania sangamberi sigalainia. Bulatnia sisaliu pei le galajet nene ipatotoila ka matania, bule imakisei ka bagamui.

²¹ Kele Ukkui isuruake simamatei masirimanuaake sia, kisedda leu Toga irimanuaake siobania irimanuaake.

²² Taan iuukumake kasei pa Ukkui, aipoi sangamberi gege masiukum aisegeakean ka Toga,

²³ bule sangamberi masiumunake Toga, keleu raumunake Ukkui. Kasei ta masiumun Toga, ta leu et iuumun Ukkui sipasikokoiniake nia.

²⁴ Kukua nia ka matamui: Sipasiaarep tiboietku samba sikatonemi sipasikokoiniake aku, aibakkatingan purimanuaiat sitaitatata, taan tuukum nia; aipoi abelangan nia ka kamateiat mei ka purimanuaiat.

²⁵ Kukua nia ka matamui: Babara te geti jamnia – samba kineneigetnan – raarep simamatei ngangan Togat Taikamanua, samba sia sipasiaarep, murimanua sia.

²⁶ Aipoi keleu Ukkui bakkat purimanuaiat, kisedda leu ikau Toga bailiu bakkat purimanuaiat.

²⁷ Samba aikauan gege masiukum ka tubunia, Togatsirimanua poi nia.

²⁸ Bui imakisei ka bagamui nene, babara te jamnia raarep ngangania sangamberi simamatei sikuddu ka ratei,

²⁹ belarangan sangamberi sigalai simaeru tusuru ka purimanuaiat, sia sigalai sikatai geti tusuru tuukum.”

Sipasimumuneng Jesus

³⁰ “Ta momoi kugalai apa pa teu bagaku, kipa siarepku le kupasiukum, samba maroipo le ukumku, aipoi ta teu bagaku kututnake, teu bagat Ukkui sipasikokoiniake aku le.

³¹ Ke aku le masimunengake pagalaiat tubuku, oto pasimunenganku ta lelekngakenen.

³² Ai sabagei sipasimumuneng pagalaiat tubuku, samba kuagai isese le simunengakenennia pagalaiat tubuku.

³³ Anukoiniakean kam pakoinietmui kai Johannes, samba aimunengakean sineseatnia.

³⁴ Tapoi ta kubebesiake pasimunengan sibara ka sirimanua, bule nupurimanua kam le kukukua nia.

³⁵ Alito sipujujuluu samba siputotoro le nia; tapoi kam sarat goiso le noba kam itoroi kam patonia.

³⁶ Tapoi ai kaku pasimuneng tubuku bele pei pasimunengan Johannes. Galajet siaket Ukkui kaku lepaakenenku, ia te galajet galaiakenenku kineneiget, galajet nenda te masimumunengake kokoiniakena aku Ukkui.

³⁷ Ukkui sipasikokoiniake aku, nia leu amasimunengake pagalaiat tubuku. Tapei anuarep kam ngangania, tubunia leu tapei anuitco kam.

³⁸ Tiboietnia ta mukuddu ka paatuatmui; aipoi ta matonem bagamui ka tubut sikoiniakenennia.

³⁹ Nugelai kam Surat Sipunenan, ka bagamui poi ka bagania le ibabara ka kam purimanuaiat sitaitatata; oto Surat Sipunenan leu masimunengake pagalaiat tubuku.

⁴⁰ Tapoi ta noba kam moi ka tubuku, bule nupurimanua kam.

⁴¹ Ta kubebesiake katuumun sibara ka sirimanua.

⁴² Tapoi kam akuagaian, ta anai nuntut baga ka Taikamanua ka paatuatmui.

⁴³ Amoian aku ka onin Ukkuiku, ta anusilo kam aku; tapoi ke sabagei moi siake tubuna, noba nusilo kam nia.

⁴⁴ Kipa te iooi imatonem bagamui, umun sibara ka pasasambamui le nugagaba kam, ta umun sibara ka Taikamanua sisasara nugagaba kam?

⁴⁵ Bui nupaatu kam, aku masinganganduake kam ka Ukkui; si Mose le karoakenenmui, ia te masinganganduake kam.

⁴⁶ Ke matonem bagamui kai Mose, ta isosoppi matonem leu bagamui kaku, aipoi pagalaiat tubuku le aisuratnake.

⁴⁷ Tapoi ke ta matonem bagamui ka sinuratnakenennia, kipa te imatotonem bagamui ka tiboietku?”