Joh. 4 - BUKO SIPUNENAN

Jesus samba sinanalep tai Samaria

¹ Kele aiagai Tuhan Jesus araarepman tai Parise sipasiului Jesus le maigi samba siraunia le maigi bele pei kai Johannes,

² – kenanen ta tubunia Jesus amasirau, sipasiuluinia le, –

³ kaddiuakenangan Judea, ei nia minca ka Galilea.

⁴ Tapoi ta moi ta isabau laggai Samaria.

⁵ Ia geti sege nia ka sara laggai ka tobbou Samaria sipuoni Sikhar simalegere ka mone sikau Jakob siburu ka togania kai Josep.

⁶ Ai sedda sumur siugguk Jakob. Amasaggongan poi Jesus muenung, uddetnakenangan tubunia ka bebet sumur. Ka teteret nenda aimututugge sulu.

⁷ Lepa oi sara sinanalep tai Samaria masiaisu oinan. Kuanangan ka matania Jesus, “Ake kaku loku.”

⁸ Aipoi sipasiuluinia ameian sia ka laggai masisaki kan.

⁹ Kuana le kamatania sinanalep tai Samaria, “Kipa galai nutitiddou kaku lo, ekeu tai Jahudi, aku sinanalep tai Samaria?” (Taipaooba le poi sia tai Jahudi tai Samaria.)

¹⁰ Aleginangan nia Jesus, “Ke nuagai bai panguruat Taikamanua, samba kasei sikua ka matam, ake kaku loku, ta isosoppi nupanindogi nia, akenangan kekeu oinan sipuririmanua.”

¹¹ Kuanangan ka matania sinanalep, “Tuan, beri seseilu ta anai kekeu, makeru pei bagei sumur nene; kaipa te ibabara kekeu oinan sipuririmanua?

¹² Ekeu pei le pa abeu ka taikebbukatmai si Jakob, sipasiaake ka kai sumur nene? Nene le lonia samba tatogania samba tarimeunia.”

¹³ Aleginangan nia Jesus, “Sangamberi silo oinan nene, maooggou le nia minca,

¹⁴ tapoi silo oinan akenenku, ta maooggou nia buru. Aipoi oinan kaunenku ka sia, bailiu ka bagania bubuakat oinan sipuguguruk sipasikakau ka tubunia purimanuaiat sitaitatata!”

¹⁵ Kuanangan ka matania sinanalep, “Tuan, ake kaku oinan nenda, buian kumaoggou minca, samba buian kuoi minca se masiaisu oinan.”

¹⁶ Kuanangan ka matania Jesus, “Kenan boiki nusogai simanteunu, lepa oi ekeu minca se.”

¹⁷ “Ta anai simanteuku,” ngangan sinanalep. Kuanangan ka matania Jesus, “Aisesengan sikuam, ta anai simanteunu.

¹⁸ Aipoi limangan sia simanteunu, samba sibabara ka tubum kineneiget, ta simanteunu, bulatnia sikuam.”

¹⁹ Kuanangan ka matania sinanalep, “Tuan, kineneiget makolou kaku, nabi le ekeu.

²⁰ Taikebbukatmai ka leleu nene rapanindogi Taikamanua, tapoi kam masikua, sarat ka Jerusalem le kudduat masipanindogi Taikamanua.”

²¹ Kuanangan ka matania Jesus, “Oi sinanalep, kau imatonem bagam kaku, babara te jamnia geti, ta ka leleu nene, ta ka Jerusalem nupanindogi kam Ukkui.

²² Kam nupanindogi kam taiagaietmui, kai geti kuagai kai panindogietmai; aipoi puaragat ka tai Jahudi le ibabara.

²³ Tapoi babara te geti jamnia, samba kineneigetnan, sia sipaninindou sipulelelek ka geget Taikamanua samba pubulanan le rapanindogi Ukkui; sipaninindou kele nenda poi siobat Ukkui.

²⁴ Ketsat le Taikamanua, oto sipanindogi nia, buita ka geget Ketsat samba pubulanan ipanindogi nia.”

²⁵ Kuanangan ka matania sinanalep, “Kuagai leu momoi geti Mesias sipuoni Kristus. Amoian geti nia, poiliatnangan sangamberinia ka matamai.”

²⁶ Kuanangan ka matania Jesus, “Aku te nia sipatiboake ekeu.”

²⁷ Ka teteret nenda, bara sia sipasiuluinia. Tenan le kisei ka bagada raitco Jesus ipatiboake sinanalep. Tapoi beri sia sara sipasikukua ka matat sinanalep, “Apa nuaala se?” ele masinounou Jesus, “Nupatitiboake koi sinanalep nene?”

²⁸ Ia geti galaknangan lalaisunia sinanalep, toili nia ka laggai, kuanangan ka matada taikalaggaiat,

²⁹ “Sita nuitco kam sara sirimanua sikua ka mataku sangamberi sigalaiku; baleu niangan pa Kristus?”

³⁰ Ia geti bela sia sangamberida ka laggai, ei sia masiamiake Jesus.

³¹ Ka oggaknia nenda, nanarangan nia sipasiuluinia, kuarangan, “Rabbi, mukom!”

³² Kuana le ka matada, “Ai kaku katku taiagaietmui.”

³³ Kuarangan sipasiuluinia pasasambada, “Ai pa sia sipasikakau kannia?”

³⁴ Kuanangan ka matada Jesus, “Katku ia te mugalai siobat bagat sikoiniake aku samba masilepaake galajetnia.

³⁵ Nukukua tebai kam, ‘Ai le epat ngalaggo ibara pasimoneiat.’ Tapoi kukua nia ka matamui: Loggouake pei kam nuitco kam mone, amaraan buania, moneietnan!

³⁶ Kise pei le aisiloan upania sipugagalai, samba iruruake bua purimanuaiat sitaitatata, bule imakere rapuangka baga sipangangaram samba sipasigegetai.

³⁷ Bulatnia tebai tiboiet nene, ‘Sabagei mangaram, sabagei masigetai.’

³⁸ Kukoiniake kam masimonei taigagalaietmui, sabagei le amasaggo tubu mugalai, kam masipuuktungi sigalaira.”

³⁹ Maigi sia tai Samaria ka laggai nenda amatonem baga ka Jesus, kalulut tiboiet simunengakenen sinanalep, ‘Ipoiliat ka mataku sangamberi sigalaiku.’

⁴⁰ Kele arasege tai Samaria ka tubut Jesus, tiddourangan ikuddu ka sia; pukuddunangan sedda rua ngagogoi.

⁴¹ Sara pei aramaigi simatonem baga ka tubut Jesus kalulut tiboietnia.

⁴² Kuarangan ka matat sinanalep, “Taan kalulut tiboietnu aimatonem bagamai, tubumaian aiarep nia samba akuagaian kai sinene te bulat Sipaarau taikapolak.”

Ialeake togat pagugulet Rimata Jesus

⁴³ Pasat rua ngagogoi tuitui Jesus sedda ei nia ka Galilea.

⁴⁴ Tubunia poi Jesus amasikua, ta abeu nabi ka laggainia.

⁴⁵ Kele aisege ka Galilea, alarangan nia tai Galilea, araitcoan poi sangamberi sigalainia ka Jerusalem ka Punen Paska.

⁴⁶ Lepa ei minca Jesus ka Kana tobbou Galilea, ka sigalainia oinan ibailiu anggur. Ai sara pagugulet rimata ka Kapernaum, aimubebesi togania simanteu.

⁴⁷ Kele aiarep kaooi Jesus ka Galilea barania ka Judea, ei nia ka Jesus manindou bule ioi ka Kapernaum masialeake togania simalegere matei.

⁴⁸ Kuanangan ka matania Jesus, “Ke tapei nuitco kam katuaggaiat samba kiseiet, ta matotonem bagamui.”

⁴⁹ Kuanangan ka matania pagugulet rimata, “Konan le Tuhan, bui imatei togaku.”

⁵⁰ Kuanangan ka matania Jesus, “Kenanan, aimuririmanua togam.” Tonem bagania sirimanua nenda ka tiboiet sikuat Jesus ka matania, tuituinangan leu et.

⁵¹ Ai nia totoili, oi sapaguguletnia masipaseseake nia masisegeake ka matania puririmanuan togania.

⁵² Isenangan sia jam piga aimale togania. Kuarangan, “Sokat bobo sara sinago aitata roketnia.”

⁵³ Repdepnangan ukkuinia, jam nenda te aikua ka matania Jesus, “Aimuririmanua togam.” Matonemnangan bagania samba sangalalepnia.

⁵⁴ Ia te kerek sikaruania sigalai Jesus sioinia ka Galilea barania ka Judea.