Joh. 21 - BUKO SIPUNENAN

Ipatoila tubunia Jesus ka pitu sipasiuluinia ka bebet koat Tiberias

¹ Pasat nene patoilanangan minca tubunia Jesus ka sipasiuluinia ka bebet koat Tiberias. Kise le aipatoila tubunia:

² Sedda ai sia parururu si Simon Petrus, si Tomas sipuoni Tairus, si Natanael tai Kana ka tobbou Galilea, tatogat Sebedeus samba rua sipasiuluinia bagei.

³ Kuanangan ka matada si Simon Petrus, “Mei aku masiiba.” Kuarangan ka matania, “Moi kai sambata.” Eirangan leu, janang ka abak; tapoi sangasoibonia nenda beri sangamuneng araala.

⁴ Kele aimapato, oi Jesus murio ka kapi; tapoi sipasiului ta raagai nia.

⁵ Kuanangan ka matada Jesus, “Kam tatoga, ai leu iba anuala kam?” “Ta anai,” nganganda.

⁶ Kuanangan ka matada, “Bele kam jarikmui isit kai kattoet abak, ta isosoppi ibara.” Ia geti belerangan nia, tapoi taan amoi aratiktik nia, igit iba.

⁷ Kuanangan sipasiului kilibet bagat Jesus ka matat Petrus, “Si Tuhan te nene.” Kele aiarep nia si Petrus si Tuhan le nia, puleppeinangan, (Taipuleleppeian le poi nia) puteipunangan ka koat.

⁸ Sipasiului sabagei geti amuabak le sia, ratiktik jarik sibara iba; taan poi areu sia ka kapi, ai le sangotu meter reunannia.

⁹ Kele aratusakai ka kapi, itcorangan bot api, ka uddutnia ai iba samba roti.

¹⁰ Kuanangan ka matada Jesus, “Ake kam se iba bagei sialamui kineneiget.”

¹¹ Tusakainangan si Simon Petrus ka abak, tiktiknangan jarik ka kapi. Sukkara le iba sabeu, sangotu lima pulu telu ngamuneng iginia. Kenanen kise iginia, ta amabirit jarik.

¹² Kuanangan ka matada Jesus, “Konan kam mukom.” Ta anai sia sipasiului simaeme masinounou nia, “Kasei ekeu?” Araagaian poi si Tuhan le nia.

¹³ Oi Jesus alanangan roti, kaunangan nia ka sia, kisedda leu iba.

¹⁴ Ia te katelu ngamincania ipatoila tubunia Jesus ka matada sipasiuluinia lepa aitusuru ka simamatei.

Jesus samba Petrus

¹⁵ Lepat komanda kuanangan ka matat Petrus Jesus, “Simon togat Johannes, manuntu leu bagam kaku bele pei nuntut bagada tainene?” Aleginangan nia si Petrus, “Oo Tuhan, nuagai le nuntut bagaku kekeu.” Kuanangan ka matania Jesus, “Oto jago togat biribiriku.”

¹⁶ Kuanangan minca ka matania Jesus ipurua ngaminca, “Simon togat Johannes, manuntu leu bagam kaku?” Aleginangan ni si Petrus, “Oo Tuhan, nuagai le nuntut bagaku kekeu.” Kuanangan ka matania Jesus, “Oto jago biribiriku.”

¹⁷ Kuanangan ka matania Jesus katelu ngamincania, “Simon togat Johannes, manuntu leu bagam kaku?” Mareureunangan bagania si Petrus, telu ngamincaan poi aikua ka matania Jesus, “Manuntu leu bagam kaku?” Kuanangan ka matania, “Tuhan, nuagai le sangamberinia, nuagai le nuntut bagaku kekeu.” Kuanangan ka matania Jesus, “Oto jago biribiriku.

¹⁸ Kukua nia ka matam: Sibau tubu pei le ekeu, ekeu le aiappara tengam, kaipa noba ei. Tapoi amabajaan geti ekeu, totoiakenungan kabeinu, sabageian le iaappara tengam, taroakerangan ekeu ka taioobaketnu.”

¹⁹ Ikukua nia nene Jesus, masipoiliat pagalaiat kamateiat Petrus masilatsatnake Taikamanua. Lepa aikua nene, kuanangan ka matat Petrus, “Tut aku!”

Sipasiului kilibet bagat Jesus

²⁰ Kele aipitsa teiteinia si Petrus, itconangan sipasiului kilibet bagat Jesus aitutut sia, ia te sipasiului sipukukuddu ka bebet Jesus ai sia mukokom sambada samba sipasikukua, “Tuhan, kasei nia sipajo ekeu?”

²¹ Kele aiitco nia si Petrus, kuanangan ka matat Jesus, “Tuhan, kipa ka sia kai nene?”

²² Kuanangan ka matania Jesus, “Koba bai ipurimanua teret oi aku, apanannu nupuuku nia? Kekeu geti, tut le aku!”

²³ Mararatnangan tebai katuareman nene ka sia sasaraina, sipasiului nene ta mamatei nia. Oto ta aikua Jesus ka matania taimamateinia; kise le aikua, “Koba bai ipurimanua teret oi aku, apanannu nupuuku nia?”

²⁴ Sipasiului nene te sipasimumunengake sangamberinia nene, samba amasisuratnake nia; samba taagai sibulatnia le simunengakenennia.

Pasilepa

²⁵ Maigi pei le bagei sigalai Jesus. Tusuratnake bai nia pasasara, kupaatu sangalio polak nene ta mememet kudduat buko suratnakenen nenda.