Joh. 20 - BUKO SIPUNENAN

Katusuruat Jesus

¹ Ka gogoi Menggui simancep, mainem pei le, ei si Maris Magdalena ka ratei. Itcona le atuakkatnan bukku takket ratei.

² Pabalaunangan leu iei kai Simon Petrus, samba ka sipasiului sara kilibet bagat Jesus, kuanangan ka matada, “Araalaan si Tuhan ka ratei, ta kuagai kaipa aragalakngake nia.”

³ Bela nia si Petrus samba sipasiului sara raei ka ratei.

⁴ Apabalau le sia ruada, tapoi sipasiului sara le manangka kai Petrus, nia le asege boiki ka ratei.

⁵ Loggouakenangan ka baga, itconangan komang sigalakngakenen, tapoi ta atubuk nia ka baga.

⁶ Oi si Simon Petrus sipasitutut ka teitei, buluk nia ka ratei. Itconangan komang situgagalak sedda,

⁷ samba poposat attinang, tabut utenia, tapoi ta anai palelegere ka komang tabut, ka kudduat bagei le, ai kuleleulekat.

⁸ Lepa buluk leu sipasiului sara, sipuboboiki sege ka ratei, itconangan nia, matonemnangan bagania.

⁹ Teret sedda enan tapei raagai kolou Surat Sipinenan sipasikukua tususuru le nia minca ka simamatei.

¹⁰ Lepa toili sia sipasiului ka lalepda.

Ipatoila tubunia Jesus kai Maria Magdalena

¹¹ Si Maria geti ai le nia muririo ka bebet ratei, ai nia musosou. Ai nia musosou, lukkukngakenangan utenia ka ratei,

¹² itconangan rua malaika sipuleleppei simabulau, ai sia mukukuddu sara isit ute, sara isit rere katugalangan tubut Jesus.

¹³ Kuarangan ka matania, “Ina, musosou kodda ekeu?” Kuanangan ka matada, “Araalaan si Tuhanku, ta kuagai kaipa aragalakngake nia.”

¹⁴ Kele aikua nene, pitsanangan ka teitei, itconangan Jesus ai nia muririo sedda, tapoi ta iagai Jesus le nenda.

¹⁵ Kuanangan ka matania Jesus, “Ina, musosou kodda ekeu? Kasei nugagaba?” Ka bagania le te sipuuku mone le nia, kuanangan ka matania, “Tuan, ekeu bai aiala nia, kua ka mataku kaipa anugalakngake nia, kuei kuala nia.”

¹⁶ Kuanangan ka matania Jesus, “Maria!” Beliuakenagan tubunia si Maria kuanangan ka matat Jesus ka ngangan Ibrani, “Rabbuni!” (Tibonannia Guru.)

¹⁷ Kuanangan ka matania Jesus, “Ba rarape aku, tapei poi atusakai aku ka Ukkui. Kenan le ka sasarainangku, nukua ka matada, tusasakai le aku ka Ukkuiku, samba Ukkuimui, ka Taikamanuangku, samba Taikamanuamui.”

¹⁸ Einangan leu si Maria Magdalena masisegeake ka matada sipsiului, iitcona si Tuhan samba kukuana sangamberinia nene ka matania.

Ipatoila tubunia Jesus ka sipasiuluinia

¹⁹ Kele aimasoibo ka gogoi Menggui nenda, ai kalelekerat matatbaliu kudduatda sipasiului Jesus, lotora ka tai Jahudi, oinangan Jesus rio ka talagada, kuanangan ka matada, “Aban ka kam!”

²⁰ Lepa aikua nene, paitconangan ka matada kabeinia samba usunia. Maangkanangan bagada sipasiului araitco si Tuhan.

²¹ Kuanangan minca ka matada Jesus, “Aban ka kam! Kele kokoiniakena aku Ukkui, kiseda leu kukoiniake kam.”

²² Lepa aikua nene, ulupmakenangan engania ka tubuda, kuanangan, “Silo kam Ketsat Sipunenan!

²³ Ke nuappeake kam joda sirimanua, tuappenangan leu; samba ke ta nuappeake kam joda sirimanua, taituappenangan leu.”

Ipatoila tubunia Jesus kai Tomas

²⁴ Si Tomas geti sara ka sipasiului sipulurua, sipuoni leu Tairua, ta anai nia sambada aioi Jesus sedda.

²⁵ Kuarangan sipasiului sabagei ka matania, “Akuitcoan ka si Tuhan” Kuanangan ka matada, “Ke tapei kuitco balak sipattakat, ke tapei kukau singongaiku ka balak sipattakat nenda samba kukau kabeiku ka usunia, ta matotonem bagaku.”

²⁶ Pasat balu ngagogoi parururangan minca sipasiului Jesus ka lalep nenda, samba si Tomas leu ai nia. Ai kalelekkerat matatbaliu, oinangan Jesus rio ka talagada, kuanangan, “Aban ka kam!”

²⁷ Lepa kuanangan ka matat Tomas, “Kau se singongainu, itco kabeiku, totoiake kabeinu nuusuake nia ka usuku. Buian imagoa bagam, kauan imatonem bagam.”

²⁸ Aleginangan nia si Tomas kuanangan, “Tuhanku! Taikamanuangku!”

²⁹ Kuanangan ka matania Jesus, “Anuitcoan poi aku, matonemnangan bagam. Mauktuk te sia simatonem baga, kenanen ta iitco.”

Kiddietnia surat Johannes nene

³⁰ Maigi pei le bagei kerek sigalai Jesus ka matada sipasiuluinia, ta atusuratnake ka buko nene.

³¹ Tapoi sangamberinia nene aitusuratnake, bule imatonem bagamui, Jesus ia te Kristus, Togat Taikamanua, samba bule kalulut tonem baga bara ka kam purimanuiat ka bagat oninia.