Joh. 18 - BUKO SIPUNENAN

Katulabakat Jesus

¹ Lepa aikua nene Jesus, bela nia samba sipasiuluinia ei sia ka silat oinan Kidron. Sedda ai sara mone, sedda te aiei Jesus sambada sipasiuluinia.

² Tapoi iagai le si Judas sipajo nia kudduat nene, mareirei poi iei Jesus samba sipasiuluinia paruru sedda.

³ Alanangan tai saladdu si Judas, samba sapaguguletda tai imam sabeu samba tai Parise oi nia sedda sibara oong, alito samba pamatei.

⁴ Iagaian poi Jesus sangamberi sipuaaili ka tubunia, bela nia, kuanangan ka matada, “Kasei nugagaba kam?”

⁵ Alegirangan nia, “Jesus tai Natsaret.” Kuanangan ka matada, “Aku te nia.” Ai leu si Judas sipajo nia muririo sambada.

⁶ Kele aikua ka matada, “Aku te,” siksikrangan tubuda, bele sia ka polak.

⁷ Nounounangan sia minca, “Kasei nugagaba kam?” Kuarangan, “Jesus tai Natsaret.”

⁸ Aleginangan nia Jesus, “Akukuangan ka matamui, aku te. Ke aku nugagaba kam, oto obaake kam ratuitui tainene.”

⁹ Kisedda teipuaili siniboinia, “Ka sangamberida siakenu kaku, beri sara simalilimai.”

¹⁰ Oto si Simon Petrus, ai poi lanjaunia, oppatnangan lanjaunia, teteakenangan nia ka pagugulet imam sabeu seppirinangan talingania sikattoet. Onin pagugulet nenda si Malkus.

¹¹ Kuanangan Jesus kai Petrus, “Kau minca ka sakbuk lanjaunu! Pulokat siaket Ukkui kaku, ta pa kulolo?”

Jesus ka matat Imam Sabeu Hannas

¹² Ia geti dia tai saladdu samba utera samba paguguletda tai Jahudi, labarangan Jesus kaberangan nia.

¹³ Lepa taroakerangan nia boiki kai Hannas, ia te talikut Kayafas, imam sabeu ka rura nenda.

¹⁴ Si Kayafas te sipasikukua ka tai Jahudi, “Maeru pei le matei sara sirimanua punu tubuda sangamberi bangsa.”

Ipakele Jesus si Petrus

¹⁵ Tapoi itut le Jesus si Simon Petrus samba sara sipasiului bagei. Sipasiului nene sipaagai le sia imam sabeu, oto guru nia samba Jesus ka gerat lalep imam sabeu,

¹⁶ si Petrus geti ai le nia muririo ka bebet matatbaliu gugurukat. Lepa bela sipasiului nenda sipaagai kai imam sabeu, patiboakenangan sinanalep sipasijajago matatbaliu, ambitnangan si Petrus ka baga.

¹⁷ Kuanangan sinanalep sipasijajago matatbaliu ka matat Petrus, “Ta ekeu poi sara sipasiului sirimanua nene?” Aleginangan nia si Petrus, “Ta aku.”

¹⁸ Sia sapagugulet samba sipasijajago Uman Taikamanua ararusuian api purakaet, maleppet poi ka teteret nenda, puriorangan muraka ka api. Si Simon Petrus leu ai nia muririo muraka ka bebera.

Panounogat imam sabeu ka Tuhan Jesus

¹⁹ Ia geti taddaakenangan imam sabeu masipaiseki Jesus pagalaiat sipasiuluinia samba ngantomannia.

²⁰ Aleginangan nia Jesus, “Ka simatoila le akupanibo ka matada taikapolak. Mariuriu le aku mungantoman ka uma parurukat samba ka Uman Taikamanua, ka parurukatda tai Jahudi; ta anai akupanibo ka simalipput.

²¹ Nunonounou kodda aku? Nounou le siap siarep tiboietku; raagai le siniboiku ka matada.”

²² Kele aikua nene Jesus, lippatnangan nia sara sipasijajago sipuririo sedda, kuanangan, “Kisedda ne nualegi ngangan imam sabeu?”

²³ Kuanangan ka matania Jesus, “Sikatai bai akutiboi, oto munengake katainia; tapoi simaroipo geti akutiboi, angoi nulippat aku?”

²⁴ Lepa koiniakenangan nia si Hamas situkakabe kai Imam Sabeu Kayafas.

²⁵ Si Simon Petrus geti ai pei le nia muririo muraka. Kuarangan ka matania sirimanua sikuddu sedda, “Ta ekeu leu sara sipasiuluinia?” Aipakele le si Petrus kuanangan, “Ta aku.”

²⁶ Kuanangan sara pagugulet imam sabeu, saepput siseppirit Petrus talingania, “Ta akuitcoan ekeu sambamui ka mone?”

²⁷ Pakelenangan nia minca si Petrus; lepa putokkinangan gougou.

Jesus ka matat Pilatus

²⁸ Mamancep pei le taroakerangan Jesus ka purapanan barania kai Kayafas. Sia geti ta atuguru sia ka purapanan, bui ramalolit, bule ioi rakom Paska.

²⁹ Ia geti bela si Pilatus itagetnake sia kuanangan, “Aponia panganduatmui ka sirimanua nene?”

³⁰ Alegirangan rakua ka matania, “Ta bai sigalai jo sirimanua nene, ta kunganganduake kai nia kekeu.”

³¹ Kuanangan ka matada si Pilatus, “Ambitnan kam nia, ukum kam nia siripot Surukatmui.” Kuarangan ka matania tai Jahudi, “Rakekera le kai masimateiake sirimanua.”

³² Kisedda te ipuaili tiboiet Jesus sikuania masipoiliat pagalaiat kamateiatnia.

³³ Ia geti guru nia minca si Pilatus ka purapanan, sogainangan Jesus, kuanangan ka matania, “Ele, rimatada tai Jahudi leu ekeu?”

³⁴ Aleginangan nia Jesus, “Sibara ka paatuatnu le sikuam nene? Ele sabagei le aikua nia ka matam pagalaiat tubuku?”

³⁵ Aleginangan nia si Pilatus, “Tai Jahudi pa aku? Bangsam le samba tai imam sabeu amasinganduake ekeu kaku; aponia anugalai?”

³⁶ Aleginangan nia Jesus, “Ta sibara ka polak nene puririmataku. Ke sibara ka polak bai puririmataku, ta isosoppi rapasaggak sapaguguletku, bui itusegeake aku ka tai Jahudi; tapoi puririmataku ta sibara se.”

³⁷ Kuanangan ka matania si Pilatus, “Oto rimata leu ekeu?” Aleginangan nia Jesus, “Kele sikuam, rimata te aku. Ia te aiputu mataku samba akuoi ka polak, bule kumunengake pubulanan. Senen sibara ka pubulanan iaarepi le ngangangku.”

^38a Kuanangan ka matania si Pilatus, “Aponia pubulanan?”

Raukum matei Jesus

^38b Kele aikua nene bela nia minca si Pilatus ka tai Jahudi, kuanangan ka matada, ‘Ta anai beri sara akusese jonia.

³⁹ Tapoi amuaratnan ka punen Paska kubelaake ka kam sara sirimanua. Kipa noba kam kubelaake ka kam rimatada tai Jahudi?”

⁴⁰ Pugereirangan minca kuarangan, “Ta sinene, si Barabbas le.” (Si Barabbas geti sipasimamatei sirimanua le nia.)