Joh. 16 - BUKO SIPUNENAN

¹ Kutitiboi nia nene ka matamui, bui imabele bagamui.

² Rakekekele te kam ka uma parurukat. Babara te teterenia ka bagada te simateiake kam siobat bagat Taikamanua le aragalai.

³ Ragagalaiake kisedda ka tubumui, kalulut taiagaira Ukkui samba aku.

^4a Tapoi kutitiboi le nene ka matamui, kei ialili teterenia repdepmuian, amuboikian akutiboi nia ka matamui.”

Galajet Ketsat Sipunenan

^4b Ka panandaatnia ta akutiboi nene ka matamui, ai pei le poi aku ka bebemui.

⁵ Kineneiget memeian le aku ka sipasikokoiniake aku; kenanen kisedda beri kam sara sinounou aku, ‘Kaipa nueei?’

⁶ Tenan le te reureu bagamui kalulut akutiboi nene ka matamui.

⁷ Bulat sibulatnia kukua ka matamui: Uktukmui te ke mei aku, ta bai mei aku ta te momoi Sipasirorom ka kam, tapoi ke mei aku, koiniakekungan nia ka kam.

⁸ Amoian geti nia, susuinangan matada taikapolak ka pagalaiat jo, pagalaiat puroipoat samba pagalaiat ukum.

⁹ Pagalaiat jo, kalulut taimatonem bagada kaku;

¹⁰ pagalaiat puroipoat, memeian le poi aku ka Ukkui, taiitcomuian aku;

¹¹ pagalaiat ukum atuukumakean poi rimatada sipaneinei polak nene.

¹² Maigi pei le kuanenku ka matamui, tapoi tapei momoi nubairat kam nia kineneiget.

¹³ Tapoi ke amoian geti nia, ia te Ketsat Pubulanan, palulunangan kam ka sangamberi pubulanan, aipoi ta sibara ka tubunia ititiboi kipa siarepnia le ititiboi; samba leu ipoiliat ka matamui sibabara geti.

¹⁴ Aku le ilalatsatnake, sibara kaku poi iaala ipoiliat nia ka matamui.

¹⁵ Sangamberi sibabara ka Ukkui, aku le saibakkatnia; ia te kukukua nia: sibara kaku le iaala ipoiliat nia ka matamui.”

Reureu baga bailiu angkat baga

¹⁶ “Ai le goiso taiitcomuian aku, ai le goiso minca itomucian aku.”

¹⁷ Kuarangan piga pa sipasiului pasasambada, “Aponia katukolobat sikuania nene ka matata, ‘Ai le goiso taitcomuian aku, ai le goiso minca itcomuian aku’? Samba leu, ‘Memeian le poi aku ka Ukkui’?”

¹⁸ Kuarangan, “Aponia katukolobat sikuania, ‘ai le goiso’? Ta taagai kuanennia!”

¹⁹ Iagai poi Jesus momoian le sia masiise nia, kuanangan ka matada, “Pagalaiat sikuaku ka matamui, ‘Ai le goiso taiitcomuian aku, ai le goiso minca itcomuian aku’, ia ne nupaiise kam pasasambamui?

²⁰ Kukua nia ka matamui: Musosou te kam geti samba mugeri, taikapolak geti muangka baga le; murereureu te kam baga, tapoi reureu bagamui ibabailiu le angkat baga.

²¹ Makarat le bagat sinanalep masitutuake matat togania, aiailingan poi teterenia ipasiorik. Tapoi amututuan geti matat togania, taan irerepdep simabesi kalulut angkat bagania, amututuan poi matat sara sirimanua ka polak.

²² Kisedda leu kam, kineneiget mareureu bagamui; tapoi momoi le aku minca kubalou kam, mangkanangan bagamui, beri sara siooi masiala angkat bagamui ka tubumui.

²³ Ke aiailingan gogoi nenda, taan nurerere kam apa pa ka tubuku. Kukua nia ka matamui: apa nutiddou kam ka Ukkui ka oningku, iaake ka kam.

²⁴ Teret kise tapei anutiddou kam apa pa ka oningku. Tiddou kam, nusilo kam nia, bule isun angkat bagamui.”

Ailabaan Jesus taikapolak

²⁵ “Sangamberinia nene, ka pasikat le akutiboi nia ka matamui. Babara te teterenia taan mupasikat kupanibo ka matamui, simakololuan le kutiboi ka matamui pagalaiat Ukkui.

²⁶ Ka gogoi nenda te nupanindou kam ka oningku; samba ta kukua ka matamui, aku manindou ka Ukkui punu tubumui;

²⁷ manuntu poi bagat Ukkui ka tubumui, kalulut manuntu bagamui ka tubuku samba matonem bagamui aku sibara ka Taikamanua.

²⁸ Baraku le ka Ukkui akuoi ka polak; kukakaddiuake le minca polak nene kuei ka Ukkui.”

²⁹ Kuarangan ka matania sipasiuluinia, “Ia pei kineneiget nupanibo simakolou, taan mupasikat.

³⁰ Kineneiget akuagaian kai sangamberinia le nuagai; taan besiakenen ranounou ekeu kasei pa. Ia te lulunia imatotonem bagamai sibara ka Taikamanua le ekeu.”

³¹ Kuanangan ka matada Jesus, “Matonem bagamui kineneiget?

³² Repdep kam: babarangan le te teterenia, samba kineneigetnan te nupusabu kam senemui siei ka kudduatna, kaddiuakemuian aku saraku. Tapoi ta musasara aku, ai le poi Ukkui ka bebeku.

³³ Sangamberinia nene kutiboi ka matamui, bule ibara ka kam abam kalulut puoottotmui ka tubuku. Ka polak nene paoreat le nuoorik kam, tapoi bui imakarat bagamui, akulaban taikapolak.”