Joh. 15 - BUKO SIPUNENAN

Jesus loinat anggur sipulelelek

¹ “Aku te loinat anggur sipulelelek, Ukkuiku sipasikeli mone.

² Senen ratku sitaipububua igegetai le samba senen ran sipububua ilinaake, bule ituppai igit buania.

³ Amalinaan kam kalulut tiboiet siniboiku ka matamu.

⁴ Kau iottot kam ka tubuku, aku leu ka tubumui. Keleu ran ta momoi ipubua sarania ke ta iottot nia ka loinat anggur. Kisedda leu kam ta mububua kam, ke ta iottot kam ka tubuku.

⁵ Aku te lonat anggur, samba kam ran. Kasei siottot ka tubuku, aku leu iottot ka tubunia, maiginangan buania, aipoi ke ta bara aku, ta momoi nugalai kam apa pa.

⁶ Kasei sitaiottot ka tubuku, gikgikngakenen ka gerat le nia, keleu ran, magaraknangan, lepa ruruakerangan nia rakau nia ka api, labo.

⁷ Ke iottot kam ka tubuku samba leu tiboietku iottot ka tubumui, apa le nutiddou kam siobamui, ta isosoppi nusilo kam nia.

⁸ Ka pububuamui simigi, kisedda te itulatsatnake Ukkuiku, samba kisedda te ibailiu kam sipasiuluiku.

⁹ Kele nuntut bagat Ukkui ka tubuku, kisedda te nuntut bagaku ka tubumui; kau iottot kam ka nuntut bagaku.

¹⁰ Ke nureddet kam surukatku, ottotnangan kam ka nuntut bagaku kele kureddet surukat Ukkuiku samba iottot aku ka nuntut bagania.

¹¹ Kutitiboi nia sangamberinia nene ka matamui, bule ikuddu angkat bagaku ka tubumui samba isege angkat bagamui.

¹² Nene le surukatku ka kam: kau nupakate kam baga pasasambamui, kele katet bagaku ka tbumui.

¹³ Ta anai sisaliu beunan katet baga ka sipasikakau enganiapunu tubut sasuruaknia.

¹⁴ Kam te sasuruakku, ke nugalai kam ssangamberi siniboiku ka kam.

¹⁵ Taan kuooniake kam pugugulet, aipoi pagugulet ta iagai apa pa galaiakenen tuannia. Tapoi kam geti kuoniake kam suruak, sangamberinia poi siarepku ka Ukkuiku, akusegeakean ka matamui.

¹⁶ Ta kam aipili aku, aku le aipili kam. Samba kukau kam bule nuei kam masibuaake bua samba ipureddet buamui, bule apa nutiddou kam ka Ukkui ka oningku, iaake ka kam.

¹⁷ Nene te surukatku ka kam; kau nupaketa kam baga pasasambamui.

Lagat bagada taikapolak

¹⁸ “Ke malaga bagada ka kam taikapolak, kau nurepdep kam, aku le boiki arapulagaki baga.

¹⁹ Ke ka polak bai anubara kam, makate bagada ka kam taikapolak, aleira poi kam. Tapoi kalulut taan sibara ka polak kam, akupilingan poi kam ka taikapolak, ia te imalalaga bagada ka tubumui taikapolak.

²⁰ Repdep kam sikuatku ka matamui, ‘Ta abeu pagugulet kai tuannia.’ Ke arakukurungan aku, kam leu rakukukuru; ke rareddet tiboietku, tiboietmui leu rarereddet.

²¹ Tapoi sangamberinia nene ragalai ka tubumui kalulut onongku, lulut ta raagai sipasikokoiniake aku.

²² Ke bai ta moi aku, samba ke ta bai kutiboi ka matada ta anai joda. Tapoi kineneiget ta iagai rapakele joda.

²³ Kasei malaga baga ka tubuku, malaga leu bagania ka Ukkuiku.

²⁴ Ta bai anai akugalai galajet ka matada taigagalaietda sabagei, kirenangan ta anai joda. Kineneiget kenanen araitcoan, tapoi malaga bagada ka tubuku samba ka Ukkuiku.

²⁵ Tapoi bule ipuaili le tiboiet sitususurat ka Surukatda, ‘Si ta lulu le ramalalaga baga ka tubuku.’

²⁶ Amoian geti Sipasirorom, koiniakenenku sibara ka Ukkui, ia te Ketsat Pubulanan siooi sibara ka Ukkui, nia te masimumunengake pagalaiat tubuku.

²⁷ Tapoi kam leu buita numunengake kam, aipoi ka panandaatnia pei le anupaaleian kam aku.