Joh. 13 - BUKO SIPUNENAN

Ibui rereda sipasiuluinia Jesus

¹ Kei iaili gogoi Punen Paska, aiagaian Jesus aiailingan teterenia ikaddiuake polak nene iei ka Ukkui. Kipa riuriu ipukateki baga sia bakkatnia sikuddu ka polak, kisedda Ieu ipukateki sia baga teret kalepakatnia.

² Kele arapukom sinoibo, alepaan aitubbui sanitu bagat Judas togat Simon iskariot, ipajo Jesus.

³ Aiagaian Jesus, sangamberinia, aisegeakean ka kabeinia Ukkui, samba sibara ka Taikamanua le nia, samba ka Taikaimanua leu ieei.

⁴ Lepa purionangan Jesus, goloknangan leppeinia, alanangan komang poposa, apparaakenangan nia ka tengania.

⁵ Uruakenangan oinan ka sambong, taddaakenangan masibui rereda sipasiuluinia, posanangan nia komang situaappara ka tengania.

⁶ Kele aioi kai Simon Petrus, kuanangan ka matania, “Tuhan, ekeu le sibui rereku?”

⁷ Aleginangan nia Jesus ikua ka matania, “Sigalaiku kineneiget ta nuagai, buruburu geti againungan nia.”

⁸ Kuanangan ka mataniasi Petrus, “Ta kuoobaake nubui rereku buru.” Kuanangan ka matania Jesus, “Ke ta kubui ekeu, ta anai bakkatnu kaku.”

⁹ Kuanangan ka matania Jesus, “Sipurarau, taan leu tububui minca, sarat rerengan le, amalinaan poi tubunia. Amalinaan kam, tapoi ta sangamberimui.”

¹¹ Iagai poi Jesus sipajo nia, ia te aikua, “Ta sangamberimui malina.”

¹² Lepa aibui rereda Jesua, pakeinangan minca leppeinia, uddet nia minca ka kudduatnia. Lepa kuanangan ka matada, “Nuagai leu kam sigalaiku ka tubumui?

¹³ Nuooniake tebai kam aku Guru samba Tuhan; aisesengan sikuamui, aipoi kirenangan aku Guru samba Tuhan.

¹⁴ Oto ke aku, Tuhan samba Gurumui ibui reremui, kam leu mateu nupabui kam rere pasasambamui.

¹⁵ Uluiet te sigalaiku nene ka kam, bule bugalai kam kele sigalaiku ka tubumui.

¹⁶ Kukua nia ka matamui; ta abeu pagugulet kai tuannia, ele pakoiniet ka sipasikokoiniake nia.

¹⁷ Ke anuagaian kam nene, mauktuk te kam ke nugalaiake kam nia.

¹⁸ Ta pagalaiat kam sangamberimui sikuaku nene. Kuagai poi sia sipiliku. Tapoi bule ipuaili siniboi Surat Sipunenan sipasikukua, ‘Alei pakomakenenku aikieakean rerenia ka tubuku.’

¹⁹ Kutiboi le nia ka matamui kineneiget, enan tapei amuaili, bule kei muaili, matonemnangan bagamui, aku te nia.

²⁰ Kukua nia ka matamui: Sipasiaala sikoiniakenenku, aku le aiala; sipasiaala aku, sipasikokoiniake aku le aiala.”

Ipoiliat Tuhan Jesus pagalaiat pajoat ka tubunia

²¹ Lepa aikua nene Jesus, mareureunangan bagania, lepa munengakenangan, “Kukua nia ka matamui: sara ka kam masipajojo aku.”

²² Paitcorangan mata sipasiuluinia, tenan ingo sia kasei nenda ititiboi.

²³ Sara ka sipasiului Jesus ia te kilibet bagania ai nia mukukuddu ka bebet Jesus.

²⁴ Ngeingeinangan nia si Simon Petrus, kuanangan ka matania, “Nounou pei, kasei ititiboi!”

²⁵ Legereakenangan tubunia sipasiului nenda ka tubut Jesus kuanangan ka matania, “Tuhan, kasei nenda?”

²⁶ Aleginangan nia Jesus, “Pasikaunanku roti lepa akusuusuuake nia, ia te nia.” Lepa alanangan roti Jesus, suusuuakenangan nia, kaunangan nia kai Judas togat Simon Iskariot.

²⁷ Kele aiala roti si Judas guru ka paatuatnia sanitu. Kuanangan ka matania Jesus, “Olaakean nugalai apa siobanu!”

²⁸ Tapoi ta anai sia ka talagada sipukokom sedda siagai nia apa lulu ikukua nene kai Judas.

²⁹ Ka bagada le te sabagei aikoiniake le nia Jesus masisaki apa pa besiakenen ka punen, ele masikau panguruat ka simageba, siukkaake bulagat poi si Judas.

³⁰ Lepana le aiala roti si Judas, bela nia ka gerat. Amasoiboan ka teteret nenda.

Surukat sibau

³¹ Kele aibela si Judas, kuanangan Jesus, “Kineneiget tulatsatnake Togatsirimanua taikamanua leu tulatsatnake ka tubunia.

³² Ke tulatsatnake Taikamanua ka tubunia, nia leu ilatsatnake Taikamanua, maruei le ilatsatnake nia.

³³ Kam tatogaku, taan mauuju kukuddu ka bebemui. Nugagaba te kam aku, tapoi kele siniboiku ka tai Jahudi, kisedda leu kukua ka matamui: Ka kudduat eijananku, ta momi nuooi kam.

³⁴ Kineneiget kuake ka kam surukat sibau, ia te bule pakate kam baga pasasambamu; kele katet bagaku ka tubumui, kisedda leu nupakate kam baga pasasambamui.

³⁵ Ka pakakatemui baga pasasambamui, agairangan nia sangamberi sirimanua, sipasiuluiku te kam.”

Ipoiliat Jesus pagalaiat pakekelena nia si Petrus

³⁶ Kuanangan ka matania si Simon petrus, “Kaipa nueei Tuhan?” Aleginangan nia Jesus, “Ka kudduat eijananku, ta momoi nutut aku kineneiget, tapoi lepa geti nututut leu aku.”

³⁷ Kuanangan ka matania si petrus, “Tuhan, ta kodda momoi kutut ekeu kineneiget? Matarek le aku matei punu tubum!”

³⁸ Aleginangan nia Jesus, “Nuoba matei punu tubuku? Kukua nia ka matam: Tapei mutotokki gougou, anupakelengan aku telu ngaminca!”