Joh. 12 - BUKO SIPUNENAN

Tutulaji Jesus ka Betania

¹ Ai le enem ngagogoi ibara Paska, ei Jesus ka Betania, laggai Latsarus sisuruakenen Jesus ka simamatei.

² Galairangan pasiraumaat ka tubunia sedda, si marta masipuuku, si Latsarus te sara sipakudduake Jesus mukom.

³ Lepa alanangan sitenga kilo tula simasingin bulat narwastu simakeppu saki si Maria, tulajinangan reret Jesus, kaunangan alainia masiposa; salu le lalep singinnia tula nenda.

⁴ Kuanangan si Judas Iskariot, sara ka talagat sipasiului Jesus – sipasisesegeake nia geti –,

⁵ “Angoi ta tusakiake tula simasingin nene telu ngotu ropia, samba bulagatnia tukau ka simageba?”

⁶ Tapoi kei ikukua nene ta ukut bagania ka simageba, sipananangkou le nia, mareirei iala bulagat ka suppit siukkaakenennia.

⁷ Kuanangan Jesus, “Obaake kam nia! Masirepdep gogoi katurateiatku le igagali nene.

⁸ Ai le mariuriu simageba ka bebemui, aku geti ta mariuriu ka bebemui.”

Pukerekat bagada masimateiake si Latsarus

⁹ Maigi sia tai Jahudi amasiagai kababarat Jesus sedda. Oirangan leu, ta sarat kalulut Jesus, tapoi obara leu masiitco si Latsarus, sisuruakenen Jesus simamatei.

¹⁰ Teuakerangan tai imam sabeu bule si Latsarus leu tumateiake;

¹¹ kalulut nia le poi maigi tau Jahudi masikaddiuake sia samba masikatonemi Jesus.

Katugurukat samba katuroroiat Jesus ka Jerusalem

¹² Pato, kele araarep nia sirimanua simigi siooi mupunen aimomoi Jesus ka Jerusalem,

¹³ alarangan rorot poula, ei sia masiroroi nia, pusogaarangan, “Hosanna! kau imatulu tubunia siooi ka onin Tuhan, Rimatada tai Israel!”

¹⁴ Kele aisese sara kalidei siooko Jesus, Jananginangan nia, bulat ipo kele sitususurat ka Surat sipunena,

¹⁵ “Ba maloloto okko Sion! Amoian te Rimatam, mukuddu ka teitei togat kalidei!”

¹⁶ Ka panandaatnia ta raagai nene sipasiului Jesus, teret aitulatsatnakean le Jesus, ia pei repdeprangan, pagalaiat tubunia le atusuratnake ka Surat Sipunenan, samba kisedda leu aragalai ka tubunia.

¹⁷ Sangamberi sirimanua sipaalei Jesus ka teteret aisogai si Latsarus ka ratei aisuruake nia simamatei masimunengake sangamberi sibabara.

¹⁸ Ia te lulunia araei sirimanua simigi ka tubut Jesus, kalulut aarepda aigalai kerek nene.

¹⁹ Kuarangan tai Parise pasasambada, “Anuitcoan kam, bulat siboboi le kam. Itco pei kam, sangalio polak masitut nia.”

Tai Grika sipasigagaba Jesus

²⁰ Ka talagada sirimanua sieei manindou ka punen, ai piga pa tai Grika.

²¹ Sia nene, mei kai Pilipus sibara ka Betsaida ka Galilea, kuarangan ka matania, “Tuan, koba kuitco kai Jesus.”

²² Ei si Pilipus masisegeake kai Andreas; lepa ei sia ruada masisegeake nia ka Jesus.

²³ Kuanangan ka matada Jesus, “Aiailingan te teterenia itulatsatnake Togatsirimanua.

²⁴ Kukua nia ka matamui: Ke ta bele ka polak ngambet bera ianau, sangambenia leu ne. Tapoi ke ianau geti buaakenangan bua simaigi.

²⁵ Simanuntu baga ka engania, ia te sipalimai nia, tapoi sitaipuletsei engania ka polak nene, ia te sipasikeli nia teret ka purimanuaiat sitaitatata.

²⁶ Kasei sioba mupagugulet ka tubuku, kau itut aku; kaipa aku sedda leu paguguletku. Kasei sioba mupagugulet ka tubuku umunakenen Ukkuiku te nia.”

Ipoiliat Jesus pagalaiat kamateiatnia

²⁷ “Mareureu bagat Ketsatku kineneiget, kipa pa kukukua? Kukukua pa, “Ukkui, romake aku ka jam nene’? Taa, lulut nene le poi akuoi ka jam nene.

²⁸ Ukkui, latsatnake onim!” Maarepnangan nganga sibara ka manua masikua, “Akulatsatnakean, ai leu kulatsatnake nia minca.”

²⁹ Kele araarep nene sirimanua simigi sipuririo sedda kuarangan, “Leleggu le nenda!” Sabagei masikua, “Ai le ipatitiboake nia sara malaika!”

³⁰ Kuanangan ka matada Jesus, “Ta kalulut aku aibara nganga nene, kalulut kam le.

³¹ Kineneiget aiailingan teterenia katuukuman ka taikapolak; keneneigetnan te tukekele rimatada taikapolak.

³² Samba ke atubuakngakean aku ka polak, tiktikkungan sangamberi sirimanua ka tubuku.”

³³ Ikukua nia nene, ia te masipoiliat pagalaiat kamateiatnia.

³⁴ Kuarangan ka matania sirimanua simigi, “Siarepmai geti ka surat Surukat, riuriu le ipurimanua Kristus teret buruburu; kipa te nukukua tububuakngake te Togatsirimanua? Kasei nia Togatsirimanua nenda?”

³⁵ Kuanagan ka matada Jesus, “Taan mauuju ikuddu ka kam pato. Oto puenung kam ka teteret ai pei le pato ka kam, bui isaksak kam gepgep; aipoi sipueenung ka gepgep, ta iagai kaipa ieei.

³⁶ Ujut ai pei le pato ka kam, kau imatonem bagamui ka pato, bule ibailiu kam tatogat pato.” Lepa aikua nene Jesus, tui nia iareuake tubunia ka matada.

Tai Jahudi sitaimatonem baga

³⁷ Kenanen kise iginia aigalai kerek Jesus ka matada, tapoi ta matonem bagada ka tubunia.

³⁸ Kisedda te ipuaili siniboi nabi Jesaya sipasikukua, “Tuhan, kasei amatonem baga ka ngantomanmai? Kasei ka tubu atupatoila geget Tuhan?”

³⁹ Ia te ta iooi ramatonem baga, aikua poi minca si Jesaya, “Aikua Taikamanua,

⁴⁰ ‘Akupesetnakean matada, samba akukelaakean paatuatda, bui imaitco matada samba bui raagai masipaatu, bui rabauake paatuatda, bui kualeake sia.’ ”

⁴¹ Ia te aitiboi si Jesaya, aiitcoan poi pulatsanan Jesus samba aitiboian pagalaiat tubunia.

⁴² Kenanen kisedda, maigi leu siabeu ka tai Jahudi masikatonemi Jesus, tapoi ta rapatoila kalulut tai Parise bui rakekele sia ka uma parurukat.

⁴³ Umun sibara ka sirimanua pei le poi raoba bele pei umun sibara ka Taikamanua.

Tiboiet Jesus sibailiu masiukum

⁴⁴ Lepa pusoganangan Jesus, kuanangan, “Sikatonemi aku, ta aku aikatonemi, sipasikokoiniake aku le aikatonemi.

⁴⁵ Samba sipasiitco aku, sipasikokoiniake aku le aiitco.

⁴⁶ Sibailiu patora le aku akuoi ka polak, bule sangamberi sikatonemi aku ta mukukuddu ka gepgep.

⁴⁷ Samba sipasiaarep tiboietku, tapoi ta ireddet, ta aku iuukum nia, ta poi masiukum taikapolak akuoi, masiarauake le.

⁴⁸ Simamin baga ka tiboietku samba sitaisilo tiboietku, aian siukumake nia; tiboiet siniboiku, ia te iuukumake nia ka gogoi sialu.

⁴⁹ Aipoi ta sibara ka teu bagaku kutitiboi, Ukkui sipasikokoiniake aku le amasipatone kaku, apa kuanenku, samba apa segeakenenku.

⁵⁰ Samba kuagai, patonekatnia ia te purimanuaiat sitaitatata. Oto apa siniboiku, siripot sikuat Ukkui ka mataku le kutitiboi.”