Joh. 11 - BUKO SIPUNENAN

Kamateiat Latsarus

¹ Ai sara simabesi sipuoni si Latsarus ka Betania, laggai kudduat Maria samba sarainania si Marta.

² Si Maria, nia te amasitulaji reret Tuhan tula simasingin, alainia aikau masiposa nia. Si Latsarus simabesi nene maniura.

³ Ia geti koiniakerangan samaniunia sieei ka Jesus masikua ka matania, “Tuhan, kilibet bagam, ai nia muooringen.”

⁴ Kele aiarep nia Jesus, kuanangan, “Ta kamateiat oringen nene, tapoi sibailiu katulatsanan Taikamanua le, bule imalatsat Togat Taikamanua kalulut nene.”

⁵ Jesus geti manuntu le bagania kai Marta samba ka sarainania samba kai Latsarus.

⁶ Tapoi kele aiarep puooringen Latsarus, kuddu pei le nia rua ngagogoi ka kudduatnia.

⁷ Pasat nene, kuanangan ka matat sipasiuluinia, “Sita kam taei minca ka Judea.”

⁸ Kuarangan ka matania sipasiuluinia, “Rabbi, simaruei le aragele tai Jahudi masibaijuk ekeu, kineneiget mei ekeu minca ka sia?”

⁹ Aleginangan nia Jesus, “Ta pulu rua ngajam sangagogoi? Sipueenung sinago, ta tusosoksok rerenia, iitco poi pato ka polak nene.

¹⁰ Sipueenung sinoibo geti, tusosoksok le rerenia, ta poi anai pato ka tubunia.”

¹¹ Ia te aikua Jesus, lepa kuanangan minca ka matada, “Si Latsarus suruakta, amaunengan nia, tapoi memei le aku kusuruake nia.”

¹² Kuarangan sipasiuluinia, “Tuhan, ke amaunengan nia, oto mamale nia.”

¹³ Tapoi sikuat Jesus, ia te pagalaiat kauuneng kamamatei; ka bagada ka sia geti kauuneng sipeperem le sikuania nene.

¹⁴ Lepa kuanangan ka matada simakolou Jesus, “Atataan si Latsarus.

¹⁵ Tapoi maangka le bagaku ta anai aku sedda kalulut kam, bule imatonem bagamui. Oto sita kam taei ka sia.”

¹⁶ Lepa kuanangan si Tomas sipuoni Tairua ka matada saaleinia sipasiului, “Sita kam taei ka sia, bule tamatei kam sambata!”

Jesus katusuruat samba purimanuaiat

¹⁷ Kele aisege sedda Jesus aiailingan epat ngagogoi ujunia si Latsarus ka ratei.

¹⁸ Betania geti malegere le nia ka Jerusalem, ai pa telu kilometer reunannia.

¹⁹ Maigi sia tai Jahudi siooi masibalou si Marta samba si Maria masipusuibi bagada kalulut katatatat maniura.

²⁰ Kele aiarep kaooi Jesus si Marta, ei nia masiroroi nia; si Maria geti, ai le nia mukukuddu ka lalep.

²¹ Kuanangan ka matat Jesus si Marta, “Ai bai ekeu se Tuhan, ta ilalango maniuku.

²² Tapoi kuagai leu apa le nutiddou ka Taikamanua iaake kekeu Taikamanua.”

²³ Kuanangan ka matania Jesus, “Tususuru le minca maniunu.”

²⁴ Kuanangan ka matania si Marta, “Kuagai tususuru nia ka gogoi katusuruat ka gogoi sialu.”

²⁵ Kuanangan ka matania Jesus, “Aku te katusuruat samba purimanuaiat; kasei sikatonemi aku, muririmanua le nia kenanen matei;

²⁶ samba senen sipuririmanua samba sikatonemi aku, ta mamatei nia buru. Matonem leu bagam nenda?”

²⁷ Aleginangan nia si Marta, “Oo Tuhan, matonem bagaku ekeu le Kristus, Togat Taikamanua siooi ka polak.”

Jesus musou

²⁸ Lepa aikua nene ei nia isogai sarainania si Maria, kasatnakenangan ngangania masikua, “Aian si Guru sene; aisogai ekeu.”

²⁹ Arep aiarep nia si Maria, olaakenangan iei masitagetnake Jesus.

³⁰ Enan poi ta sesege Jesus ka laggai, ai pei le nia ka kudduat paailiatda si Marta.

³¹ Sia tai Jahudi sipakudduake si Maria ka lalep masipusuibi bagania, kele araitco olat bagat Maria mutuitui, tutrangan nia, ka bagada poi mei nia ka ratei musou sedda.

³² Kele aisege ka bebet Jesus si Maria samba aiitco nia, purapponangan ka matat Jesus, kuanangan, “Ai bai ekeu se Tuhan, ta ilalango maniuku.”

³³ Kele aiitco Jesus ipusou si Maria samba saaleinia tai Jahudi leu musou, magolunangan bagania pagalu sou baga.

³⁴ Kuanangan, “Kaipa anurateiake kam nia?” Aleginangan nia, “Konan Tuhan nuitco nia.”

³⁵ Pusounangan leu Jesus.

³⁶ Kuarangan tai Jahudi, “Itco pei katet bagania ka tubunia.”

³⁷ Tapoi ai leu ka talagada sipasikukua, “Nia sibukaake matada simapeset, ta pa momoi igalai bui ilango sinene?”

Si Latsarus tusuru

³⁸ Magolunangan bagania minca Jesus, ei nia ka ratei. Ratei nene ia te sara ngaliu siputakke bukku.

³⁹ Kuanangan Jesus, “Akkatnake kam bukku!” Kuanangan si Marta, maniu simamatei, “Tuhan, amabutean, aipoi epat ngagogoian.”

⁴⁰ Kuanangan ka matania Jesus, “Ta akukuangan ka matam: Ke matonem bagam, ta isosoppi nuitco pulatsanan Taikamanua?”

⁴¹ Lepa akkatnakerangan bukku. Teilaakenangan matania ka pata Jesus, kuanangan, “Ukkui, kukua sura kekeu, kalulut anuarepi aku.

⁴² Kuagai mariuriu le nuarepi aku, tapoi kalulut sirimanua simigi sipuririo se, kutiboi le nia, bule imatonem bagada, ekeu le aikoiniake aku.”

⁴³ Kele aikua nene, pusoganangan sabeu nganga, “Latsarus, belaake ekeu!”

⁴⁴ Bela aibela simamatei, rere samba kabeinia ai pei le tutatabut komang, matania aitatabbo komang poposat attinang. Kuanangan ka matada Jesus, “Buka kam tabut ka tubunia ipuenung.”

Pukerekat bagada masimateiake Jesus

⁴⁵ Maigi sia tai Jahudi siooi masibalou si Maria, kele araitco sigalai Jesus, Matonemnangan bagada ka tubunia.

⁴⁶ Tapoi ai piga pa sieei ka tai Parise masisegeake ka matada sigalai Jesus.

⁴⁷ Ia geti naraakerangan Rapat Sabeu tai imam sabeu samba tai Parise, kuarangan, “Kipangan le tagagalai, maigingan poi aigalai kerek sirimanua nene?

⁴⁸ Ke taoreake bai nia, ta isosoppi sangamberi sirimanua mutonem baga ka tubunia, oirangan leu tai Roma, rauraurangan Uman Taikamanua samba bangsata!”

⁴⁹ Ia geti panibonangan sara ka talagada sipuoni si Kayafas, imam sabeu ka rura nenda, kuanangan, “Ta neagai kam apa pa,

⁵⁰ samba ta nupaatu kam, maeru pei le ka sita matei sara sirimanua punu tubut simigi, bui sangalio bangsata masubu.”

⁵¹ Tapoi kei ikukua nene ta sibara ka tubunia, kalulut imam sabeu le nia ka rura nene, poiliatnangan kamamatei Jesus punu tubut bangsa Jahudi.

⁵² Samba ta sarat uktuk bangsa Jahudi, tapoi bule iruruake leu tatogat Taikamanua sipusasabu bailiu musara.

⁵³ Barania ka gogoi nenda pakerenangan bagada masimateiake Jesus.

⁵⁴ Kalulut nene taan amugejek Jesus ka simatoila ka Judea, ikaddiuake le, ei nia ka sara laggai simalegere ka simatangeu, sipuoni Epraim, sedda le ikuddu sambada sipasiuluinia.

⁵⁵ Ka teteret nenda malegerengan Punen Paskada tai Jahudi, maigi sia sibara ka laggai nenda mei ka Jerusalem musuru kei bara Paska.

⁵⁶ Ia geti gabarangan Jesus, ai sia muririo ka Uman Taikamanua, patiborangan pasasambada, “Kipa nupaatu kam? Ta pa momoi nia ka punen?”

⁵⁷ Tai imam sabeu samba tai Parise geti arakauan parenta, bule kasei siagai kaipa kudduatnia, buita ipoiliat nia, bule ralaba nia.