Joh. 10 - BUKO SIPUNENAN

Pasikat pagalaiat biribiri samba sipasijajago

¹ “Kukua nia ka matamui: Kasei ta masiguruki matatbaliu iei ka gelit biribiri, tapoi ikarai le geli, sipananangkou samba sipasiraraurau le nia.

² Situguguru ka matatbaliu geti, ia te sipasijajago biribiri.

³ Sipasijajago geli masibukaake matatbaliu ka sia, sabiribiri raarepi ngangania ka teteret isogai biribirinia ka oninda, lepa taroakenangan sia ka gerat.

⁴ Bela ibelaake biribirinia sangamberinia, ei nia muenung ka mata, tutrangan nia sabiribiri, raagai poi ngangania.

⁵ Sirimanua sabagei geti ta ratutut, rapuloloto le nia, ta poi raagai ngangania.”

⁶ Pasikat nene aitiboi ka matada Jesus, tapoi ta raagai apa kuanennia ka matada.

Jesus sipasijajago sipulelelek

⁷ Ia geti kuanangan minca Jesus, “Kukua nia ka matamui: Aku te matatbaliu sieei ka biribiri.

⁸ Sangamberi siooi kei moi aku, sipananangkou samba sipasiraraurau le sia, samba sabiribiri ta raarepi nganganda.

⁹ Aku te matatbaliu; kasei siguruki aku maaarau, guru nia, bela nia, sesenangan pukomannia.

¹⁰ Sipananangkou geti, manangkou le iooi, masimatei samba masipakatai. Akuoi kaku geti, bule ibara purimanuaiatda sirimanua, purimanuaiat sitaimagulai.

¹¹ Aku te sipasijajago sipulelelek. Sipasijajago sipulelelek ikau le engania punu tubut biribirinia.

¹² Siupaiji geti, ta sipasijajago, samba ta sibakkat biribiri, kele aiitco ioi arimau tui nia kaddiuakenangan biribiri, pasakbanginangan biribiri arimau, sabuakenangan nia.

¹³ Mutuitui le nia, siupaiji le poi nia, ta ipuleletsei biribiri.

¹⁴ Aku te sipasijajago sipulelelek. Kuagai sangamberi biribiriku, biribiriku leu raagai aku,

¹⁵ kele Ukkui iagai aku, kisedda leu aku kuagai Ukkui, samba kukau le engangku punu tubut biribiri.

¹⁶ Ai pei le bagei biribiriku, biribiri ta ka geli nene; kupalululu leu sia samba raaarepi ngangangku, bailiunangan sia sangamungkuat, sara sipasijajago.

¹⁷ Makate bagat Ukkui ka tubuku, kukau poi engangku bule kusilo nia minca.

¹⁸ Ta anai kasei pa sioi masiala ka tubuku, teu bagaku le kubuluake nia. Ka gegeku le kubuluake nia, ka gegeku leu kusilo nia minca. Ia te patonekat siniloku sibara ka Ukkuiku.”

¹⁹ Ia geti pajoggolorangan minca tai Jahudi kalulut tiboiet nene.

²⁰ Maigi sia sipasikukua, “Aipasaileuan nia sanitu samba airoroan nia, apananmui nuaarepi kam nia?”

²¹ Sabagei masikua, “Nene ta tiboiet sirimanua pinasaileu sanitu, momoi pa ibukaake matat simapeset sanitu?”

Taiobara masisilo Jesus tai Jahudi

²² Ia geti ailinangan punen pasirepdeman Panegekat Uman Taikamanua ka Jerusalem; ka teteret nenda rura simaleppet.

²³ Pugejeknangan Jesus ka Uman Taikamanua ka laibokat Salomo.

²⁴ Ia geti purutrangan nia tai Jahudi, kuarangan ka matania, “Teret pigamoian le ipuari nupaingo kai? Ke bulatnia ekeu Kristus, kua simakolou ka matamai.”

²⁵ Aleginangan nia Jesus, “Akukuangan ka matamui, tapoi ta matonem bagamui; sangamberi galajet sigalaiku ka onin Ukkuiku, ia te simunengake aku;

²⁶ tapoi ta matonem bagamui, kalulut ta biribiriku kam.

²⁷ Biribiriku geti raaarepi le ngangangku, kuagai sia, samba ratutut aku.

²⁸ Kukakau ka tubuda purimanuaiat sitaitatata, bulat ta malilimai sia buru, samba beri sara siraurau sia ka kabeiku.

²⁹ Ukkuiku siake sia ka tubuku, nia le abeu ka sangamberi, ta anai siooi masiraurau sia ka kabei Ukkui.

³⁰ Aku samba Ukkui sara le.”

³¹ Alarangan minca bukku tai Jahudi masibaijuk Jesus.

³² Kuanangan ka matada Jesus, “Maigi galajet simaeru sibara ka Ukkuiku akupatoila ka kam; galajet kipa nenda sibailiu paluluat nubaijuk kam aku?”

³³ Alegirangan nia tai Jahudi, “Ta kubabaijuk kai ekeu kalulut galajet simaeru, kalulut palololoinu le Taikamanua, ai pei bagei sirimanua le ekeu, tapoi nukau tubum Taikamanua!”

³⁴ Kuanangan ka matada Jesus, “Ta atusuratnan ka buko Surukatmui: Aikua Taikamanua, ‘taikamanua le kam?’

³⁵ Ke muoni sia ‘taikamanua’ sipaninilo tiboiet Taikamanua – aipoi Surat Sipunenan ta momoi tupakatai –,

³⁶ nukukua pei le koi kam ka tubut sipunenin Ukkui samba sikoiniakenennia ka polak: Nupaloloi Taikamanua, kalulut kukuaku Togat Taikamanua aku?

³⁷ Ke ta bai kugalai galajet Ukkuiku, eddangannia ta nukatonemi kam aku.

³⁸ Tapoi ke kugalai, kenanen ta nukatonemi kam aku, katonemi kam galajetku nene, bule nuagai kam samba imakolou ka bagamui, Ukkui ai ka tubuku samba aku ai ka tubut Ukkui.”

³⁹ Gelerangan minca ralaba nia, tapoi bela le nia ka kabeira.

⁴⁰ Lepa ei minca Jesus ka silat Jordan, ka kudduat Johannes siburu masirau sirimanua, pukuddunangan sedda.

⁴¹ Maigi sia siooi masitagetnake nia, kuarangan, “Si Johannes ta anai aigalai kerek, tapoi sangamberi siniboi Johannes pagalaiat sirimanua nene, bulat aisesengan.”

⁴² Oto maigi sia sedda simatonem baga ka tubut Jesus.